— Robrazéb u hã oto, te za inharĩ 'wa, ãne: “Hâiwa wẽ di za, hâiwa pré wẽ wa, ãhã na hã.” 3 Duré awẽm na mararé hã te za inharĩ 'wa, ãne: “Tã te za we tita'a, hâiwa pré dâ'â wa.” Marĩ hã aima 'madâ'â waihu'u pese za'ra wa'aba di, hâiwa na marĩ 're ihâimana za'ra mono na hã. Tane nherẽ, sadaihu'u za'ra wa'aba õ di, ã bâtâ mono na 're iromhâimana mono zé ãma iwaihu'uzéb da, iwairébé mono hã. 4 Dapoto téb 're, dawasété na 're idahâimana za'ra mono hã duré 'Re ihâimana u'âsi mono ma sena na 're idahâimana za'ra mono õ hã te waptẽrẽ za'ra ni, marĩ dama i'manharĩ waihu'u õ hã. Tane nherẽ, marĩ dama i'manharĩ waihu'u'õ hã aima ihâimana za'ra wa'aba da hã, mare di. Zonahã ma iromhâimanazép si, te za aima tihâimana za'ra wa'wa, ãma iwaihu'u za'ra wa'aba zéb da hã.

Tawamhã Zezusi hã ihawib za'ra ma tô oto mo.

5 Tawamhã Zezusihi siré 're inomro mono norĩ hã ma tô saprĩ za'ra, Galiléia isõ'u na. Tane nherẽ, ma tô po're ha'âri za'ra, i'u'ẽtẽ wapu na. Te te siré 'mai'âri za'ra õ di. 6 Tawamhã Zezusi hã te tãma nharĩ za'ra, ãne:

— Ma'ãpé, asimiza'rese sina 're aihâimana za'ra wa'aba mono. Duré ãma 're pibui pese za'ra wa'aba mono, farizeu norĩ te, duré saduceu norĩ te, i'u'ẽtẽ wapu mapuzé wi hã.

7 Tawamhã isiré 're inomro mono norĩ hã ãne hã te te wapari za'ra wamhã, ma tô sima nharĩ za'ra, ãne:

— I'u'ẽtẽ wapu hã wa te wei wasiré 'mai'âri za'ra õ wa, ma tô ãne hã wama waihu'u za'ra.

8 Tawamhã Zezusi hã te te sima inharĩ za'ra zé te te wapari wamhã, ma tô sadanharĩ za'ra, ãne:

— E niha ĩsurure, 'Re ihâimana u'âsi mono asina 're i'umnhasi za'ra wa'aba mono zé hã! E marĩ da, te asima inharĩ za'ra wa'wa, i'u'ẽtẽ wapu hã baba wa. 9 E zahadu bété, sadaihu'u za'ra wa'aba ã bâ. E ãma aipo're pu'u za'ra wa'aba ã bâ, imrotõ na i'u'ẽtẽ wapu te iwẽ'ẽi mono na hã, 5 miu na aibâ norĩ ma hã. E niha si'õno hã ma tô ãma asiwi i'masisi 'wa. 10 E duré bété 7 na i'u'ẽtẽ wapu na, 4 miu na aibâ norĩ ma hã. E niha si'õno hã ma tô ãma asiwi i'masisi 'wa. 11 E sadaihu'u za'ra wa'aba ã bâ, i'u'ẽtẽ wapu na te inharĩ õ na hã. Ma'ãpé 're asi'madâ'â pese za'ra wa'aba mono, farizeu norĩ te, duré saduceu norĩ te, i'u'ẽtẽ wapu mapuzé wi hã.

12 Tawamhã isiré 're inomro mono norĩ hã ma tô oto sadaihu'u za'ra, i'u'ẽtẽ wapu mapuzém na te te tãma inharĩ za'ra õ na hã. Tazahã, 're si'madâ'â pese za'ra mono da, farizeu duré saduceu norĩ nhimiroti wi hã.

13 Tawamhã Zezusi hã, Filipihi te Cézaréia na ti'a nhisi niwĩ wisi wamhã, ma tô sadanharĩ za'ra, isiré 're inomro mono norĩ hã, ãne:

— E 'wa hã 're imorĩ na, te da te dasima 're wasu'u za'ra, Ti'ai ãma Dasiré Ipodo hã.

14 Tawamhã isiré 're inomro mono norĩ hã ma tô siwi sada'â, ãne:

— Ni'wam norĩ ma hã, a hã u, Zuwã Batista. Duré u a hã, Elias. Duré ni'wam norĩ ma hã a hã u, Zeremia. Duré ni'wam norĩ ma hã a hã u, nima hã 'Re ihâimana u'âsi mono zadawa 'mahârâ'wa.

15 Tawamhã Zezusi hã te sina sadanharĩ za'ra, ãne:

— A norĩ wa'wa hã bété, e niha ma tô asima 're ĩwasu'u za'ra wa'aba mo.

16 Tawamhã Simau Pedru hã ma tô sada'â, ãne:

— A hã Cristu, 'Re ihâimana u'âsi mono idâ'â'õ 'ra.

17 Tawamhã Zezusi hã ma tô waihu'u Pedruhu ma, ãne:

— Simau, Zuwãhã 'ra, aima rowẽ uptabi di. E marĩ wa. Ã hã, ni'wa ti'ai ãma a'uwẽ hã te te aima hâi'ré õ wa. Ĩmama hâiwa ãma 're isãmra mono si ma tô aima hâi'ré. 18 Tô sena wa za aima waihu'u, ãne: A hã Pedru. Ã hã ẽtẽ nhisiwi wa za sa'ra, uburé ĩzazei'wa norĩ hã. Tawamhã dadâ'â nhiptetezé hã te te ãma i'ai'uté da hã, mare di. 19 Wa za aima sõmri za'ra, 'ridawazém^a norĩ hã Hâiwa ãma 're Isãmra mono, da'ãma 're isib'a'uwẽ mono zéb u 're danhisisi mono da, 'ridawazé hã. Ti'ai ãma marĩ hã a hã sawi zahi wamhã, hâiwa ãma zama te za te te 're azawi, 'Re ihâimana u'âsi mono hã. Tane duré ti'ai ãma marĩ ma, a hã rowairébé wamhã, hâiwa ãma zama te za te te 're arowairébé.

20 Tawamhã Zezusi hã isiré 're inomro mono norĩ wi ma tô sawi pese, ni'wai ma te te wasu'u za'ra tõ da, õ hã Danho'reptui'wa na hã.

21 Tawamhã ta hawim haré Zezusi hã ma tô ãma sãna'rata, sõ'awi 're isiwasu'u mono zém na hã isiré 're inomro mono norĩ ma, tô i'ru zahi zarina za imorĩ na hã Zeruzalẽ u hã, duré tame za te te irobzépata za'ẽtẽ na hã, Zudeu norĩ ma roti'wa norĩ nhib'ratamhã, sasedoti norĩ ma ipire norĩ nhib'ratamhã duré 'Re ihâimana u'âsi mono nhimiroti zahi na dama rowahutu'wa norĩ nhib'ratab zama, za da te iwĩrĩ na hã, duré si'ubdatõ bâdâ ãma si'utõrĩ õ ré, za apâ ihâiwa'utu na hã.

22 Tawamhã Pedru hã ma tô saprõ, tisiré norĩ nhiti. Tame ma tô mreme tete na tãma tinha, ãne:

— 'Re ihâimana u'âsi mono te te aima i'rui õ da si! Ãne hã niwa aima iromhâimana da hã, mare di za!

23 Tawamhã Zezusi hã ma tô sô aipi'ra. Ãne te tinha, Pedruhu ma:

— Satanasi, ĩnhiti aimorĩ! A hã ẽne bâdâdi wa, te te 're ida'marõpãrĩ za'ra mono ne, te ĩma aihâiba. A hã, 'Re ihâimana u'âsi mono nhimirosa'rata zarina rosa'rata õ di. Ti'ai ãma danhimirosa'rata na te irosa'ra.

24 Tawamhã Zezusi hã te duré tinha, isiré 're inomro mono norĩ ma, ãne:

— Ni'wa hã ĩzarina 're morĩ da, te te sima wẽ wamhã, po're si'âri te te sima 're iwẽ mono zéb zarina 're ihâimana mono zém na hã, wedepo'o nhonhi'rãmi te te âri, ĩzarina morĩ da. 25 E marĩ wa. Ni'wa hã sisõ'reptu da wamhã, te za tihâimanazé hã simini. Duré ni'wa hã ĩ'u'âbâ tihâimanazé te te simini wamhã, te za sõpẽtẽ dahâimanazé tô sena hã. 26 E marĩ da bâ, ni'wai ma uburé marĩ ti'ai 'remhã tãma 're hâimana za'ra mono nherẽ, tô sena dahâimanazé hã te te simini wamhã. E marĩ na te te wa'âbâ da bâ, te te isiminizé, apâ ihâimanazé tãma 're hâimana mono da hã. 27 Ti'ai ãma Dasiré Ipodo hã, niwamhã te za wei mo tiwaihu'u pese ré, tite hâiwa hawi romhuri'wa norĩ ré. Tawapsi, te za awa'â dahâiba mono bâ, uburé marĩ da te tãma 're i'manharĩ za'ra mono zéb zarina. 28 Tô sena wa za aima waihu'u za'ra wa'wa, ãne: Ni'wam norĩ hã te ãme tihâimana za'ra, dâ'â za'ra õ ré, Ti'ai ãma Dasiré Ipodo hã Uburé Danhib'apito uptabi na, za apâ we imorĩzé hã, te te i'madâ'â za'ra hã.