3 (Farizeu norĩ hã duré uburé Zudeu norĩ me hã 're saihuri waihu'u mono õ di, 're simisõi pese za'ra mono ãna hã, tihi'rata norĩ hâimanazéb zarina.) 4 Ro ubumroi hawi 're sihutu mono wamhã, 're sisib'rata upsõi pese za'ra mono õ ré hã, 're saihuri mono õ di. Te te duré 're 'madâ'â pese za'ra isiré norĩ, ahâ na ihâimanazé tãma 're ihâimana za'ra mono hã, hâsizé upsõzém na hã, piza'a duré isi'uwazi 'manharĩ hã, tihi'rata norĩ hâimanazéb zarina.

5 Tahawa, te farizeu norĩ duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ, Zezusi hã siwi sadanha, ãne:

— E niha bâ, asiré 're inomro mono norĩ hã wahi'rata norĩ hâimanazéb zarina hâimana za'ra õ di. Simisõi ãna te tisa hã tihu.

6 Tawamhã Zezusi hã ma ãma sada'âbâ za'ra, ãne:

— Aihâimana si'amoi pese na 're i'aihâimana za'ra wa'aba mono norĩ! E niha Izaias hã ma tô i'uwaibaba na ai'ãma rob'ui'éré za'ra wa'wa, ãne:

8 A norĩ wa'wa hã, 'Re ihâimana u'âsi mono nhimiroti zahi na 're asapa'a za'ra wa'aba mono õ di. Ti'ai ãma danhimiroti si, te 're i'madâ'â pese za'ra wa'aba mo.

9 Tawamhã ãne te duré tãma nharĩ za'ra:

— A norĩ wa'wa hã 'Re ihâimana u'âsi mono nhimiroti, te taré 're isa'ra za'ra wa'aba mo, aihi'rata norĩ hâimanazém na si 're aihâimana za'ra wa'aba mono da. 10 Duréihã Mozési hã ma tô ãne dama roti: “Aimama 're wazé pese za'ra wa'aba mono, ana zama.” Ãne duré isimiroti amo hã: “Ni'wa hã timama ma, duré tina ma nherẽ, iwasédé te te pisutu wamhã, da te iwĩrĩ da si, i'ru zahi.” 11 Tane nherẽ, te ãne dama 're iroti za'ra wa'aba mo: “Ni'wai ma, marĩ hã hâimana wamhã, timama norĩ ãma aré isime da hã wẽ nherẽ, ãne te te nharĩ wamhã, ‘Ã hã 'Re ihâimana u'âsi mono ma si ãma ĩnhoprubzéb da si”, 12 ãne wamhã, timama norĩ ãma hã simei õ di za. 13 Ãne wa, 'Re ihâimana u'âsi mono nhimiroti upana te aihi'rata norĩ nhimiroti na si dama 're iroti u'âsi za'ra wa'aba mo. Ãne hã te duré aimawi hã ahâ na 're i'manharĩ za'ra wa'aba mo.

14 Tawamhã Zezusi hã te duré sima dazô hâ, te te dama roti da, ãne:

— Ma'ãpé, ĩwapari pese za'ra wa'aba, sadaihu'u za'ra wa'aba da. 15 Rowi hawi marĩ isébré hã dahâiba 're, ta hã te te dahâiba wamnarĩ õ di za. Tazahã dahawi iwatobro si te za dahâiba wamna. 16 Tahawa asimiparizé aima hâimana za'ra wa'aba wamhã, ma'ãpé wapari za'ra wa'aba!

17 Tawamhã Zezusi hã dahawi morĩ pari, 'ripara u sébré wamhã, isiré 're inomro mono norĩ hã ma tô siwi sadanha, marĩ te te wasu'u zô, rowasu'u na romnhimiré'é na hã. 18 Tawamhã ma tô tãma nharĩ za'ra, ãne:

— E a norĩ wa'aba zama, sadaihu'u za'ra wa'aba õ di. Marĩ, da te 're ihuri mono hã te te 're dahâiba wamnarĩ za'ra mono õ di za, 19 dahâiba uptabi u za sébré õ wa za, danomo u si za sébré wa, taha pari rob u za oto watobro wa.

Tawamhã ãne te te nharĩ wamhã, Zezusihi ma hã uburé dasa hã, da te 're ihuri mono hã simihâiba wamnarĩ õ di.

20 Tawamhã Zezusi hã ma duré ãma uzusi, ãne:

— Dapẽ'ẽ hawi 're iwairébé mono si te za te te 're dahâiba wamnarĩ za'ra. 21 Dapẽ'ẽ hawi, danhimirosa'rata wasédé hã te 're wairébé, dasina danhipsaihuri, danhimisaihuri duré dapãrĩ hã, 22 danhibrom na da'ruiwapari, marĩ iwasété 'manharĩ, dazadawa nhipe, marĩ na danhiminho'ru, danhisi wasédé, marĩ na 'râwi dasina dawada, duré da te 're rosa'rata za'ra mono ãna 're idamreme zusi mono, za iwa'rãmi marĩ dazada 're ihâimana za'ra mono na hã. 23 Uburé ã norĩ hã dapẽ'ẽ hawi 're iwairébé mono na, te za ãma 're dasihâiba wamnarĩ za'ra.

24 Tawamhã ta hawi ma tô mo Zezusi hã darob amoi u, Tiru na ti'a nhisi 'rata, daro 're ihâimana mono u. Tame ma tô ãzé, nimahã 'ri u. Te te sima wẽ õ di, ni'wa hã te te aré iwaihu'u da hã. Tane nherẽ, pi'uriwi hã hâimana waihu'u õ di. 25 Tamemhã te 're hâimana pi'õ, i'ra azarudu wa'uburé ré hã. Ta hã, Zezusihi wasu'u te te wapari wi, ma tô iteme mo. Itẽme wisi wamhã, hi'rãtitõ ma ipapara aime. 26 Pi'õ hã gregu, zudeu õ di, Siru Fenisia nhihudu. Ta hã Zezusihi wi ma tô waptẽ, wa'uburé ma, te te rob'ru da, i'ra si'azarutu hawi. 27 Tane nherẽ, Zezusi hã te tinha pi'õi ma, ãne:

— Imorĩ'rata na a'â ai'uté norĩ hã tisa te te huri. I'uwaibaba õ di, i'u'ẽtẽ wapu hã da'ra norĩ wi da te 're iwaibui mono da hã, wapsã ma, da te 're sãmra mono da.

28 Tawamhã pi'õ hã ma ãma sada'â, ãne:

— Ĩhe, Apito. Tane nherẽ, dasai pru, ai'uté wi wedeza zahâpâ 're irere'e mono hã, wapsã 'rare norĩ hã te te 're huri.

29 Tawamhã Zezusi hã te tãma tinha, ãne:

— We ĩzada'âbâ u'âbâ, te za oto aimo apâ, 'ri tẽme. Ai'ra hawimhã, ma tô wa'uburé hã watobro.

30 Tawamhã pi'õ hã tinhorõwa u apâ morĩ wamhã, ti'ra hã waptâ nomro ré ma tô sõpẽtẽ. Iwana ma tô watobro, wa'uburé hã.

31 Tawamhã Zezusi hã Tiru 'ri nho'õmo 'rata ti'a ihâimana hawi ma tô mo. Sidõ na ti'a nhisi wa'waibaba ma tô ro'razâ, duré Galiléia â zaihâ u, Decapoli ti'ai u zama. 32 Tawamhã tame ni'wam norĩ hã, Zezusihi u aibâ ipo'reptõ duré imreme tété hâ hã ma tô siwi ãwisi. Ma tô tiwi waptẽrẽ za'ra, tinhib'rada hã te te ãma hiri da. 33 Tawamhã Zezusi hã danhiti te te saprõni wamhã, tinhipto hã ma tô ipo're 're tiza. Tizadaipro na ma tô duré soto u'ré. 34 Taha pari, hâiwa u te rob'madâ. Ma tô pẽ'ẽ hâ. Tawamhã te aibâ ma tinha, ãne:

— Efata. (Ãma isaprĩzé hã: “Aipo're 'repu'u!”)

35 Ãne wa, aibâ hã awa'awi pesere ma tô po're 'repuru. Duré ma tô tinhoto wairo. Tahawa mreme wẽ di oto. 36 Tawamhã Zezusi hã te dawi sawi pese, ni'wa hã te te rowasu'u tõ da, iromhâimanazém na hã. Te te da'a'uwati nherẽ, te tô dapo're ãna da te rowasu'u pese za'ra, iromhâimanazém na hã. 37 Tawamhã isimirowasu'u, da te iwapari za'ra hã ma tô ãma tatob'uzu za'ra ni. Ãne te dasima wasu'u za'ra ni:

— Uburé te marĩ iwẽ hã te te dama 're ab'manharĩ wẽ. Ipo'reptõ norĩ ma, ma tô 'manharĩ za'ra, po're pese za'ra da hã. Duré imreme'õ norĩ ma, ma tô 'manharĩ za'ra, mreme wairébé da oto.