23
Chaymi mandacü Josias Juda lädućhu,
Jerusalenćhu lluy yaśhacunäta ayächimun.
2 Jinalculmi Tayta Diospa alawana wasinman mandacüca lipäcula:
Juda lädućhu,
Jerusalenćhu lluy yaćhäcunäwan,
sasirdüticunäwan,
willacücunäwan,
jinaman jinantin nasyunwan.
Puydïpis mana puydïpis lluy-lluymari lipäcula.
Chay alawana wasićhu limalicuśhan librućhu lluy cäcunätam,
paycunap ñawquin mandacüca lïgila.a
3 Jinalculmi Tayta Diospa ñawquin śhäcunan cä paradïrunpa lädunman mandacüca śhaycucuycul limalicula,
llapan śhunꞌunwan,
llapan cawsayninwan Tayta Diosta sirbinanpä.
Jinaman nishancunacta,
yaćhachicuynincunacta,
camachicuynincunacta cäsucunanpämari limalicula.
Chay librućhu lluy limalicuycunacta lulayman ćhulaycälinanpäpis limaliculcälatacmi.
Chaynu lulaycälinanpämi lluy nunacunäpis limaliculcäla.
Mandacü Josiasmi allinman lluy muyuchin
4 Chaypïta mandacü Josiasmi puydï sasirdüti Hilciasta,
chayman atimünin sasirdüticunäta,
puncu täpäcunätapis nin:
“Tayta Diospa alawana wasinpïta julupäcuy,
taytacha Baalta,
Aseracta,
jinaman sïlüćhu imaymana uyllurcunäta alawananpä lluy japächaśhancunätapis” nil.
Chaymi Jerusalenpïta julalcälimul Cedron pampaćhu lluy cañaycälälila;
ućhpantapis Bet-elmanmi apälälila.
5 Jinaman Juda lädup mandacünin ćhulaśhan sasirdüticunätapis alapacülam.
Awari paycuna Juda lädup malcancunaćhu Jerusalenpa muyülïnin ulꞌucunäćhümi insinsiucta cañaycapäcunapä capäcula.
Chay Baalman,
intïman,
quilläman,
jinaman imaymana uyllurcunaman insinsiu cañananpä cä ćhulaśhan sasirdüticunätamari alapacüla.
6 Chaynütacmi Tayta Diospa alawana wasinćhu cä Asera mamachacta alawananpä śhalcachisha iluctapis,
Jerusalenpi jululcul Cedron pampaćhu cañaycüla ućhpayänancama.
Jinalculmi pampaculcänanman mächiycüla.b
7 Chaynütacmi Tayta Diospa alawana wasinćhu taytachacunacta alawayninwan umri-pula waticaculcänan cuartuctapis tunïla.
Chayćhümi walmicunapis mamacha Aserapa catacuncunacta awapäcü cala.
8 Chaypïtam Juda lädup lluy malcancunaćhu cä sasirdüticunäta ayachimula.
Chay sasirdüticuna ulꞌucunäćhu insinsiucta cañapäcunanpä cä uycunacunäta,
pinꞌay anlamanmi ćhulaycüla,
Gebapi aśhta Beersebacama.
Jinaman malcap puydïnin Josuepa puncunpa yaycunanćhu cä,
achatucunäpä lulaśhan uycuna patactapis lluymi camacaycüla.
Chay cayäla malcap puncunpa ichünin lädućhümi.
9 Ñatac ulꞌucunäćhu cañaycü sasirdüticunaca,
manamá lipäculachu Jerusalenćhu cä Tayta Diospa uycuna patacninmanꞌa.
Sinuꞌa sasirdüti-masincunallawanmi,
mana libadürayu tantacunacta micapäcula.
10 Chaynütac mayanpis walaśh-wamla chulincunacta,
taytacha Molocmanc manaña cañaycapäcunanpämi,
Hinom pampaćhu cä Tofet nishan uycunacta,
pinꞌay anlaman ćhulaycul mandacü Josias camacaycüla.d
11 Jinaman Juda lädup mandacünincuna intïta alawaycälinanpämi,
japächaśhan cawallucunätapis camacaycüla.
Chaycuna cala Tayta Diospa alawana wasinpa yaycunanpä puncunćhu,
puydï yanapänin Natan-melecpa dispächunpa ñawpäninćhümari.
Jinaman intïpä japächaśhan carritacunactapis cañaycülam.
12 Chaynütac Juda lädup mandacünincuna palasyup tïchunćhu cä,
Acaz yaćhaśhanpa lädunćhu uycuna patactapis lluy-lluymi pampaman muyüchila.
Jinaman Tayta Diospa alawana wasinpa patyunćhue Manases śhalcachishan ishcay uycuna pataccätapis pampamanmari muyüchila.
Chaynu lluy lulalculmi Cedron wayuman amuncunallactaña wicapaycüla.
13 Chaynütac Jerusalenpïta inti ishpimunan lädu Camaycü Ulꞌupf nishan sur lädunćhu cä,
uycunacunactam lluy camacaycüla.
Chaycunacta Israel lädup mandacünin Salomonmi śhalcachila,
taytacha Sidon läducunap anla taytachan Astoretpa,
jinaman Moab läducunäpa anla taytachan Quemospa,
chaynütac Amon läducunäpa millachicuy taytachan Milcompäpis.g
14 Chaynütac mamacha Aserap liträtuncunacta,
lumipi cä taytachacunactapis tunilculmi pudirnintaña nunacunap tulluncunacta muntunaycüla.
15 Chaynütac Israel läducta juchapacachï Nabatpah chulin Jeroboam,
Bet-elćhu śhalcachishan uycuna patactawan uycunancunactapis,
pampamanmi muyüchila.
Chaynu ućhpayänancamamari cañaycüla.
Asera mamachacta alawananpä śhalcachisha iluctapis cañaycülamari.
16 Chaypi Josias cutiyalmi ulꞌucunäćhu pampaśhan ućhcucunacta licälun.
Chaymi chayćhu cä tulluncunacta julalcachimul,
uycuna patacćhu cañaycüla,
pinꞌay anlaćhu cananpä.
Chaynüpamari willacüninwan Tayta Dios willachimuśhanca lulacacüla.i
17 Chaypïtam mandacü Josias nin:
“Wic licaśhäca ¿mayanpa nïchuntan?”
nil.
Niptinmi nunacunaca nipäcun:
“Juda lädupïta śhamü willacücämi wicćhu pampalayan.
Cay Bet-elćhu cä uycuna patacwan lulaycuśhayquica pasananpä,
willaycü śhamücämari cayan” nil.j
18 Niptinmi mandacü Josias nin:
“Chayllaćhu cacuchun.
Tulluncunacta amam mayanpis cuyuchipäcunꞌachu” nil.
Chaynüpam paypa tulluncuna,
jinaman Samariapi śhamü willacücunäpa tulluncunapis nï cuyuchishachu cala.
19 Chaypïta Tayta Diosta piñachinanpä Israel lädu mandacücunaca Samaria malcaćhu uycunacunacta lulachishancunactapis camacaycülam.
Chay Bet-elćhu lulaśhannümari lluy camacaycüla.
20 Chaynütac ulꞌucunäćhu cä sasirdüticunäta uycuna patacpa jananćhu lluy wañulcachilmi,
jananman nunacunap tulluncunacta ćhulaycul lluy cañaycüla.
Chaypïta Jerusalentañam cuticula.
Tayta Dios Libraycuśhan Fistactam Josias lulan
21 Chaypïta lluy malcantin nunacunätam mandacü Josias nin:
“Cay limalicuśhá librućhu nishanmannu,
Egiptopi Tayta Diosniqui Libraycäliśhuśhayqui Fistactak lulaycäliy” nil.
22 Chay fistacta,
Israel lädućhu caminaycücuna mandaculcäśhanpïtamari manaña lulapäculachu.
Manañatacmi mandacücunaca,
Israelćhu Juda lädućhu mandaculcäśhan timpucunaćhüpis lulapäculañachu.
23 Josias ćhunca pusäniyu (18) wataña mandacuyaptinmi,
Tayta Dios Libraśhan Fistacta Jerusalenćhu lulapäcula.
Juda läducunäpa Tayta Dios jinallam piñäśha cayan
24 Chaynütacmi Josias,
Juda lädućhu Jerusalenćhu lluy chincächila:
rüjacunacta,
licacücunacta,
imaymana taytachacunacta,
lluy millachicuy cäcunactapis.
Chaynu lulaycula Tayta Diospa alawana wasinćhu,
sasirdüti Hilcias talishan librućhu lluy nishancunäta lulaycunanpämari.
25 Cay mandacü Josiasnuꞌa,
manam juc mandacü calachu Moisespa yaćhachicuyninmannu llapan śhunꞌunwan,
almanwan,
cawsayninwan Tayta Diosman cutiycamuꞌa.
Awari paynuꞌa juc mandacü manamari puntacta calachu,
nï śhamücäćhüpis canꞌachu.
26 Chaynu lulaycuyaptinpis Manases lluy mana allin lulaynincunawan piñachishanpïtamari,
Tayta Diospa piñacuynin jinalla Juda lädupä walayäla.
27 Chaymi Tayta Dios nin:
“Israel läducta caćhaycuśhänümi Juda läductapis caćhaycüśhä.
Aclacuśhá Jerusalen malcactapis,
jinaman chayćhümi yaꞌa yaćhaycuśhä nishá wasictapis caćhaycuśhämari” nil.
Mandacü Josiasmi wañucun
28 Ñatac Josiaspa mandacuyninćhu lluy lulaśhancuna Juda lädu mandacünincunap isquirbisha librunćhümari cayan.
29 Chay timpum Egiptop mandacünin Necao,
Eufrates mayuman lila,
Asiriap mandacüninta yanapänanpä.
Mandacü Josiasñatac mandacü Necaopa cuntran liyaptinmi,
Necao licälul-pacha Meguido malcaćhu Josiasta wañüchin.
30 Jinaptinmi yanapänincuna aya Josiasta carritaman ćhulculcul,
Meguido lädupïta Jerusalenman apaculcäla.
Chayćhümari pampälälin.
Chaypïtam jinantin malcaca Josiaspa chulin Joacazta,
papäninpa pudirnin mandacü cananpäña japächaycapäcula.
Juda lädućhu Joacazmi mandacun
31 Canan má,
ishcay ćhunca quimsayu (23) watanta liyalmi,
Joacaz mandacuyta allaycula.
Pay quimsa quillallam Jerusalenpïta mandacula.
Mamanmi cala Libna lädu Jeremiaspa walmi chulin Hamutal.
32 Joacazpis awquilluncuna lulapäcuśhannümari,
Tayta Diospa ñawquin mana allinta lulala.
33 Ñatac Jerusalenćhu Joacaz mana mandacunanpämi,
Egiptop mandacünin Necao prïsu wićhäla,
Hamat lädućhu cä Ribla malcaman.
Jinaman quimsa walanga quimsa paćhacniyu (3,300) illaytawan quimsa ćhunca quimsayu (33) quïlu üructa Juda lädu alcabälanta pägapäcunanpämi nila.
34 Jinalculmi Josiaspa pudirnin mandacü cananpä,
chulin Eliaquimta mandacü Necao ćhulälun.
Paypa śhutintam Joacim nïman muyüchila.
Joacaztañatacmi Egiptoman puśhäluptin chayćhu wañucula.l
35 Ñatac mañaśhan illaycätawan üructa Joacim pägala mandacü Necaotam.
Chaypämi jinantin malcanta camachila illaynincunapi üruncunapi alcabälacta upäcunanpä.
Juda lädućhümi Joacim mandacun