Tayta Dios Libraycuśhan Fistactam Josias lulachin
35
Chaypïta Josiasmi allaycuy quillap ćhunca tawayu (14) muyunninćhu Tayta Dios Libraycuśhan Fistactaa Jerusalenćhu lulachila.
2 Sasirdüticunätañatacmi lulaynincunaman-cama ćhulaycul,
Tayta Diospa alawana wasinćhu lulapäcunanpä callpanchaycula.
3 Jinaman israelcunäta yaćhachï Tayta Diosllapäña japächäśha cä levitacunätam Josias nin:
“Israelpa mandacünin Davidpa chulin Salomon lulachishan alawana wasiman chuya babulta ćhulapäcuy.
Manañamá umruycaćhapäcunquiñachu.
Cananꞌa Tayta Diostawan Israel malcantari sirbiycäliy.
4 Jinaman Israelpa mandacünin Davidpa chulin Salomon camachishanmannuꞌari ayllunpa-cama tücachinacuypa ćhulanaculcay.b
5 Chaynütac alawana wasićhu israelcunäpa pudirnin capäcunayquipä ayllupi-cama jucta aclapäcuy.
6 Jinaman Libraycuśhan Fistapä uwishcunacta wañuchipäcuy,
jinaman chuyanchaculcay,
chaynütac Israel aylluyquicunapä alistapäcuy Moiseswan Tayta Diospa camachicuyninmannu lulapäcunanpäpis” nil.
7 Nilculmi Libraycuśhan Fistapä chayćhu cäcunäta mandacü Josias quiquinpa uywancunapi uycula:
capishtawan uwishta quimsa ćhunca walangacta (30,000),
wäcactapis quimsa walangacta (3,000).
8 Chaynütacmi mandacücäpa puydï yanapänincunapis quiquinpa śhunꞌunpïta yalamuśhanta upäcula nunacunäman,
sasirdüticunäman,
levitacunämanpis.
Jinaman Tayta Diospa alawana wasinćhu licaycünin Hilcias,
Zacarias,
Jehielpis uycapäcula ishcay walanga süta paćhac (2,600) uwishcunactawan quimsa paćhac (300) wäcacunactam.
9 Chaynütacmi chay fistapä Conaniaspis wawꞌi-caśhan Semaiaswan Natanael uwishcunacta,
wäcacunacta uycapäcula.
Jinaman levitacunap puydïnin Hasabias,
Jeiel,
Josabadpis levitacunäman uycapäculam.
Chayurá lluy-lluy uycapäcula picha walanga (5,000) uwishcunacta,
picha paćhac (500) wäcacunactamari.
10 Chaynu lulanacta alistaculculmi mandacüca nishanmannu sasirdüticunaca imam lulanancunäman ćhulanaculcäla.
Chaynütac levitacunäpis yanapänanmanmi tücachinacuypa ćhulanaculcäla.
11 Chaypïtam chay fistapä uywacunäta wañuchipäcula.
Levitacunaca wañuchipäcul yawarninta camapäcuptinmi sasirdüticunäñatac uycuna patacman chächuycapäcula.
12 Chaypïtam Moises camachishanmannu Tayta Diosman cañaywan uycälinanpä wilancunacta jululcul ayllunpa-cama.
Chaynütacmi wäcacunäwanpis lulaycapäcula.
13 Jinalculmi camachicuyćhu nishanmannuc fistapä cä aychacunäta cancaycapäcula.
Japächäśha cä aychacunätañatacmi ichá mancacunaćhu,
pirulcunaćhu,
casitucunaćhu yanupäcula.
Jinalculmi lluy nunacunäman juclla aypuycula.
14 Chaypïtam levitacunaca quiquincunapäwan sasirdüticunäpä lluy alistana cäcunäta alistapäcula.
Chaynu lulapäcula Aaronpa milaynin sasirdüticunaca tutacama cañaywan uycuna cäcätawan wilacunäta uycuy-uycuy cayalcaptinmari.
15 Chaynütac David,
Asaf,
Heman jinaman mandacü Davidpa willacünin Jedutun nishancunamannümarid Asafpa milaynin taquïcunäpis lulananćhu-cama cayalcäla.
Chaynütacmari puncu täpäcunäpis lulananćhu-cama cayalcäla;
levita-masincuna paycunapis micapäcunanpä caśhanta uycäliptinmari lulaśhancunäta nï caćhaycapäcüchu cala.
16 Chaynüpam mandacü Josias nishanmannu chay muyun camachinaculcäla Tayta Dios Libraycuśhan Fistacta lulapäcunanpä,
jinaman uycuna patacćhu Tayta Diosman cañaywan uycälinanpäpis.
17 Chaymi chayćhu cä israelcunaca anćhish muyun lulapäcula Tayta Dios Libraycuśhan Fistactawan Mana libadürayu Tanta Fistacta.e
18 Chaynu willacü Samuel lulaśhanpïñam caynu fista Israel lädućhu nï lulaśhachu cala.
Manamari Josias lulaycuśhannuꞌa mayanllan mandacüpis chaynu fistactá lulayculachu sasirdüticunäwan levitacunäwan,
Juda lädu Israel lädu nunacunäwan,
Jerusalenćhu yaćhäcunäwanpis.
19 Chaynu Tayta Dios Libraśhan Fistaca lulaycuśha cala ćhunca pusäniyu (18) wata Josiaspa mandacuyninćhümari.
Mandacü Josiastam wañuchin
20 Chaynu Tayta Diospa alawana wasinta Josias allichachiyta camacäluptin unaypïtañam Egiptop mandacünin Necao pilyananpä śhamula,
Eufrates mayup patan Carquemisman.
Chaymanmi Josias pilyä lila.
21 Chaymi mandacü Necao willacünincunawan nichimula:
“Am,
Juda lädup mandacüninta,
¿imanayacmi?
Manam amwan pilyächu śhayämú sinuꞌa ćhinicüní Carquemis malcawan pilyämi.
Quiquin Tayta Diosmari jucllaña pilyanäpä niyäman.
Chayurá yanapamäní Tayta Dios nishanta ama mićhacuychu;
yanꞌalmi pay camacaycüśhunquiman” nil.
22 Chaynu Tayta Dios Necaopa willachishanta Josias mana cäsucuyculmi pilyananpä cä müdananwan ćhulaculcul Meguido pampaman Necaowan pilyamü licula.
23 Chayćhümi flïchawan ćhächïcunaca mandacü Josiasta ćhächin.
Jinaptinmi yanapänincunacta:
“Sumä dañädüśham cacuyällá;
caypïta julällämay” nin.
24 Niptinmi yanapänincuna carritanpïta julalcälil juc carritaman aśhulcachil Jerusalenman apaculcäla.
Chayćhu wañucuptinmi awquilluncuna pampaläśhancäman pampälälila.
Chaymi Juda lädućhu,
Jerusalenćhu yaćhäcunaca alli-allicta Josiaspi waꞌaculcäla.
25 Josias wañucuptinmi yalpayninwan aya taquicta Jeremiasf julula.
Chayta wañücunaćhu taquïcämi walmipis wayapapis canancama yalpapäcun Josias wañucuśhanta.
Chay taquicunam Israelćhu custumriña cala.
Chay aya taqui Llaquicuy nishan librućhümari isquirbïsha cayan.