3 Cay Josias walaśhllala cayalmi pusä wata mandacuyal awquillun Davidpa Tayta Diosninta ashiyta allacuycula.

Ćhunca ishcayniyu (12) wata mandacuyalñatacmi ulꞌuncunaćhu cä capillachacunacta,

Aserap liträtuncunacta,

jïrrupi luläśha taytachacunacta,

lumipi labräśha taytachacunacta juluyninwan Juda läductawan Jerusalenta chuyanchayta allacuycula.

4 Josias licapayällaptinmi camacaycüśha cala:

taytacha Baalpa^b uycuna patacnincuna,

janäninćhu cä insinsiu lupachicuncuna,

mamacha Aserap liträtuncuna,

lumipïta labräśha jïrrupi luläśha taytachacunapis.

Chaynu pulbuman muyulcachilmi taytachacunaman uycü nunacunap sipultürancunaman mächiycüla.

5 Chay sasirdütincunap tulluncunactapis uycuna pataccunaćhümi cañaycüla.^c

Chaynüpamari Juda läductawan Jerusalenta chuyanchaycula.

6 Chaynüllatacmi lulaycula Manases,

Efrain,

Simeon,

Neftali ayllucunap malcancunaćhüpis,

jinaman muyülïnincunaćhüpis.

7 Jinantin Israel lädućhu uycuna pataccunactamari camacaycüla.

Chay labräśha taytachacunacta,

mamacha Aserap liträtuncunacta pulbumanmi muyüchila.

Jinaman insinsiu lupachinapä uycuna pataccunactapis lluymi camacaycüla.

Chaynu jinalculmi Jerusalenman cuticula.

8 Josias ćhunca pusäniyu (18) wata mandacuyalñatacmi jinantin malcactawan alawana wasictapis chuyanchalcul Tayta Diospa alawana wasinta allichapäcunanpä caćhälun:

Azaliap chulin Safanta,

malcap licaycünin Maasiasta,

Joacazpap chulin isquirbï Joactapis.

9 Paycunamari puydï sasirdüti Hilciasman lipäcul,

Tayta Diospa alawana wasinćhu juntuśhan illaycäta uycapäcula.

Chay illaycäta puncucta täpä levitacunämari ćhasquipäcula Manases,

Efrain,

Benjamin ayllucunapïta,

jinaman Israel lädućhu,

Juda lädućhu,

Jerusalenćhu lluy quïdäcunäpïtapis.

10 Chay illaycätam alawana wasicta allichäcunäpa licäninman uycapäcula.

Payñatacmi Tayta Diospa alawana wasinta lluy allichäcunäman pägaycula.

11 Jinaman carpintïrucunäman,

albañilcunämanpis illaytam uycapäcula,

alawana wasi allichaśha cananpä ilucunacta,

labräśha lumicunacta lantipämunanpä.

Chaynüpamari Juda lädup punta mandacünincuna lluy pulumächishanta allichachila.

12 Paycuna mana manalcullalmari lulaycapäcula.

Licaycünincunañatacmi capäcula levita Merarip milaynin Jahatwan Abdias,

Coatpa milaynin Zacariaswan Mesulam,

jinaman imaymana tucanacunacta tucay yaćhäcunäpis.

13 Paycunamari cargäcunäpa,

ima lulayćhu lluy luläcunäpa licaycünin capäculapis.

Chay levitacunäćhu capäculamá isquirbïcuna,

puydïcuna,

puncu täpäcunapis.

14 Ñatac alawana wasiman apapämuśhan illaycunäta sasirdüti Hilcias juluyäśhanćhümi,

talïlun Tayta Dios Moiseswan isquirbichishan camachicuycuna cä pitwïsha libructa.

15 Chaymi isquirbï Safanta:

“Tayta Diospa alawana wasinćhümi camachicuycuna cä pitwïsha libructa talïlú” nil uycula.

16 Safanñatacmi mandacücäman chay pitwïsha libructa apalcul nin:

“Nunayquicuna lluy nishayquicunactam lulaycälin.

17 Tayta Diospa alawana wasinćhu cä illaycunäta juntuycälilmi allichäcunäpa licänincunaman,

luläcunäman uycapäcun” nil.

18 Nilculmi:

“Sasirdüti Hilciasmi cay libructa uycäman” nin.

Chayćhümi chay libructa isquirbï Safan mandacücäman lïgipäla.

19 Mandacücäñatacmi librućhu nishancunäta uyalïlul llaquicuypi müdanancunacta laćhyacuyan.

20 Chay üram Hilciasta,

Safanpa chulin Ahicamta,

Micaiaspa chulin Abdonta,

isquirbï Safanta,

jinaman mandacücäpa yanapänin Asaiastapis nin:

21 “Cay librućhu nishancunacta manam yaꞌapis,

nï Israel lädu,

Juda lädu quïdäcunäpis cäsuculanchicchu.

Chaynu Tayta Diospa camachicuyninta awquillunchiccunapis mana cäsuculcäśhanpi nï lulaymanpis ćhulapäcuśhanpi sumä piñäśhaćhari cayan.

Má,

chaypi niycamänanchicpä Tayta Diosta tapuycamuy” nil.

22 Niptinmi mandacüca caćhaśhancunäwan Hilcias lipäcula Jerusalenpa muśhü baryunćhu^d yaćhä willacü walmi Huldaman.

Paymi Salumpa walmin,

Ticvap chulin,

Harhaspa willcan cala.

Salummi alawana wasićhu müdanacunacta licaycüca cala.

Chaynu willaycäliptinmari,

23 Hulda nin:

“Israelpa Tayta Diosnin caynümi nin.

Tapucü caćhamuśhüniqui nunäta caynu niycamuy:

24 ‘Yaꞌa Tayta Diosmi ní:

Juda lädup mandacünin lïgishan librućhu cä mućhuchicuycunätam cay jinantin Juda läduman,

cayćhu cäcunäman ćhächimuśhä.

25 Yaꞌacta caćhaycul taytachacunaman insinsiucunacta cañaycapäcuśhayquiwanmari sumä-sumä piñachipäcamalanqui.

Chaymi cay malcäpä piñacuyní sumä walayal mana pasanꞌachu.

26 “ ‘Chayurá israelcunap yaꞌa Tayta Diosninta tapumänayquipä caćhamuśhüniqui Juda lädup mandacüninta caynu nimuy:

“Am,

cay librućhu cäcunäta uyalil,

27 cay malcacta lluy nunantinta pampaman muyuchisha cananta mana allinca ćhänanta uyalil śhunꞌuyqui alalaycuptin uyshuycapämuśhayquita,

jinaman müdanayquita laćhyapäcuśhayquita,

waꞌapacuśhayquitapis yaꞌa Tayta Diosmari licaycú.

28 Chaymi cay malcacta lluy nunantinta sumä-sumä camacaycuśhäta manaña licanquichu.

Aśhwanpam allin wañuypa wañul awquilluyquicuna caśhanman pampaycuśha canqui” ’ ” nil.

Chaynu niptinmi mandacücäta willaycälï cutipämula.

29 Chaymi Juda lädućhu,

Jerusalenćhu lluy yaśhacunäta mandacü Josias ayächimun.

30 Jinalculmi Tayta Diospa alawana wasinman mandacüca lipäcula Juda lädućhu Jerusalenćhu lluy yaćhäcunäwan,

sasirdüticunäwan,

levitacunäwanpis;

chay uchuyllanpïta aśhta yaśhancunawanpis lluymari lipäcula.

Paycunap puntanćhümi alawana wasićhu talisha cä limalicuśhan libructa mandacüca lïgila.

31 Jinalculmi Tayta Diospa ñawquin śhäcunan cä paradïrunpa lädunman mandacüca śhaycucuycul limalicula llapan śhunꞌunwan,

llapan cawsayninwan Tayta Diosta sirbinanpä.

Jinaman nishancunacta,

yaćhachicuynincunacta,

camachicuynincunacta,

librućhu lluy limalicuynincunactapis lulayman ćhulaycunanpämari limalicula.

32 Chaynütacmi Jerusalenćhu yaćhäcunätapis Benjamin ayllucunätapis chaynu lulaycälinanpä limalicachila.

Chaymari Jerusalenćhu yaćhäcunaca awquilluncunap Tayta Diosninman limalicuśhanmannu lulaycapäcula.

33 Jinantin Israelćhu millachicuy mana allincuna cäcunäta mandacü Josias chincächilam.

Jinalculmi Israelćhu lluy cäcunaca Tayta Diosllacta alawapäcunanpä nila.

Pay cawsaśhancama awquilluncunap Tayta Diosninpïta manamari japächaculcälachu.