Juda lädućhu Manasesmi mandacun
33
Canan má,
Manases ćhunca ishcayniyu (12) watanta liyalmi Juda lädućhu mandacuyta allaycula.
Paymi Jerusalenpïta picha ćhunca pichayu (55) wata mandacula.
2 Ñatac Tayta Diospa ñawquin Manases mana allincunactam lulala.a
Jinaman israelcunäpa puntanpïta alapacuśhan malcacunaca millachicuy lulaśhancunactanümari paypis lulaycula.
3 Chaynütac papänin Ezequias wicapaśhan uycunacunätapis ulꞌup puntancunaćhu caśhanmi śhalcachila.
Jinaman taytacha Baalpa uycuna pactaccunactam śhalcachipula;
chaynütac Asera mamachacta alawananpä śhalcachisha iluctapis lulalam.
Jinaman sïlüćhu cä imaymana uyllurcunätapis allinpä licayculmi alawala.
4 Chaynütac Tayta Dios:
“Jerusalenćhümi wiña-wiñaypä yaćhaśhä” niyaptinpis chay alawana wasićhu uycuna pataccunactamari śhalcächila.b
5 Chay Tayta Diospa alawana wasinpa ishcaynin patyuncunaćhu,
uycuna pataccunacta śhalcächila sïlüćhu cä uyllurcunäta alawananpämari.
6 Jinaman Hinom pampaćhu chulincunactapis taytachanman cañaycapulam;
rüjacuycunactapis licacuycunactapis lulalam.
Wañüśhap ispirituncunactapis ayalam.
Chaynu mana allincunallacta jicutaśhanwanmari Tayta Diosta piñachila.
7 Jinaman Tayta Diospa alawana wasinmanpis Asera mamachacta alawananpä śhalcachishan iluctam ćhuläla.
Chaynütam lulala Davidta,
chulin Salomonta Tayta Dios:
“Jinantin Israel ayllucunapïta aclacuśhá Jerusalenćhu cä alawana wasïćhümi wiñay simpripä caśhä.
8 Moiseswan lluy yaćhachishäcunacta,
camachishäcunacta,
nishäcunacta uyalicul lulayman ćhulaycäliptinꞌa,
awquilluncunaman uycuśhá allpapïta israelcunäta manañamari imaypis alapacüśhächu” nil niyaptinpis.c
9 Ñatac Manasesꞌa manam cäsuculachu.
Aśhwanpa paycunap puntanpïta Tayta Dios alapacuśhan nasyuncunapïtapis mas piyurnin,
mana allincunactalämi Juda lädućhu,
Jerusalenćhu cä nunacunäta lulachila.
10 Manasestawan lluy malcäta Tayta Dios limapaptinpis paycuná manamari cäsuculcälachu.
11 Chaymi Asiriap mandacüninpa puydïnincunacta Tayta Dios caćhämula.
Chaymi mandacü Manasesta chalälälil cadinaycul Babiloniaman puśhaculcäla.
12 Chaynu Manases ñacayćhu cacuyalmi Tayta Diosninta mañacula.
Chayćhülämari awquilluncunap Tayta Diosninpa ñawpäninćhu uyshuyculapis.
13 Chay mañacuyninta Tayta Dios uyaliyculmi Jerusalenta cutichila caśhan mandacunanpä.
Chaynüpamá Manases tantiala Tayta Dioslla rasunpa Dios caśhanta.
14 Chaypïtam Davidpa Malcanpa waśha lädu murällanta,
Manases altu-altucta śhalcachila.
Chaynu murälläśha cala Gihon pucyup inti ishpimunan lädupi allayculmi wayunta lil Challwa nishan puncucama;
jinaman Ofel lädunpam muyumula.
Jinalculmari Juda lädućhu murälläśha malcacunäman pilyäcunap puydïnincunacta ćhulaycula.
15 Jinaman Tayta Diospa alawana wasinćhu cä taytachacunäta julülamá.
Chaynütacmi Tayta Diospa alawana wasin caśhan ulꞌućhu,
jinaman Jerusalenćhu lulachishan uycuna pataccunätapis malcap waśha lädunman wicapächila.
16 Chaypïta Tayta Diospa uycuna patacninta caśhan śhalcalcachilmi,
allin cawsaśhanpi uycunapä cäcätawan sulpäta uycunapä cäcäta chayćhu uycula.
Jinalculmi israelcunäpa Tayta Diosllantaña jinantin Juda läducunaca sirbipäcunanpä nila.
17 Ñatac nunacunaca Tayta Diosllapäña uycuyalcalpis jinallalämi ulꞌućhu cä uycuna pataccunäćhu cañaywan uycapäcula.
18 Mandacü Manasespa lluy lulaynincuna,
Tayta Diosta mañacuśhancuna,
Israelpa Tayta Diosninpa willacünincuna limaśhancunapis isquirbïsha cayan israelcunäpa mandacünincunap librunćhümari.
19 Chaynütac mañacuśhancuna,
mañacul imacta ćhasquishancuna,
mana allinta lulaśhancuna,
ipanchaśhancuna,
ulꞌucunäćhu uycuna pataccunacta lulachishancuna,
jinaman manalä wanacul mamacha Aserap liträtunta ćhulachishancunapis willacücunäpa librunćhümari isquirbïsha cayan.
20 Manases wañucuptinñatacmi palasyunpa wirtanman pampälälila.
Chayurá paypa pudirnin chulin Amonñamá mandacüca cala.
Juda lädućhu Amonmi mandacun
21 Canan má,
ishcay ćhunca ishcayniyu (22) watanta liyalmi Amon mandacuyta allaycula.
Jerusalenpïta ishcay watam mandacula.
22 Paypis papänin Manases lulaśhannümi Tayta Diospa ñawquin mana allincunacta lulala.
Papänin lulaśhan taytachacunactamari paypis sirbiycula,
alawaycula.
23 Ñatac papänin Manases uyshuycuśhannuꞌa pay manamá Tayta Diosman uyshuyculachu.
Aśhwanpam mas-mas juchallacta lulayta ćhapala.