Juda lädućhu Manasesmi mandacun
21
Canan má,
Manases ćhunca ishcayniyu (12) watanta liyalmi,
Juda lädućhu mandacuyta allaycula.
Paymi Jerusalenpïta picha ćhunca pichayu (55) wata mandacula.
Mamanpa śhutinmi Hepsiba cala.
2 Ñatac Tayta Diospa ñawquin Manases mana allincunactamari lulala.a
Israelcunäpa puntanpïta alapacuśhan malcacunaca millachicuy lulaśhancunactanümari paypis lulaycula.
3 Papänin Ezequias wicapaśhan uycunacunätamari ulꞌup puntancunaćhu caśhan śhalcachila.
Jinaman Israel lädup mandacünin Acab lulaśhannümi,
taytacha Baalpa uycuna pactacta lulapula.
Jinaman Asera mamachacta alawananpä śhalcachisha iluctapis lulalamari.
Chaynütac sïlüćhu cä imaymana uyllurcunätapis alawalamari.
4 Jinaman Jerusalenćhümi wiña-wiñaypä yaćhaśhä nil Tayta Dios niyaptinpis,
chay alawana wasićhu uycuna pataccunactamari śhalcächila.b
5 Chay Tayta Diospa alawana wasinpa ishcaynin patyuncunaćhu,
uycuna pataccunacta śhalcächila,
sïlüćhu cä uyllurcunäta alawananpämari.
6 Jinaman chulintapis taytachanman cañaycapulam,
rüjacuycunactapis licacuycunactapis lulalam,
wañüśhap ispirituncunactapis ayalam.
Chaynu mana allincäta jicutaśhanwanmari Tayta Diosta piñachila.
7 Jinaman Tayta Diospa alawana wasinmanpis,
Asera mamachacta alawananpä śhalcachishan iluctam ćhuläla.
Chay alawana wasipïmi Davidta,
chulin Salomontapis Tayta Dios nin:
“Jinantin Israel ayllucunapïta aclacuśhá Jerusalenćhu cä alawana wasićhümi wiña-wiñaypä yaćhaśhä.
8 Chaynu caycuśha lluy yaćhachishäcunacta camachishäcunacta uyalicul,
cäsucul uywayní Moiseswan camachishämannu cawsapäcuptinmi.
Chaynütac awquilluncunaman uycuśhá allpapïta Israel läducunaca manañamari alapacüśha yanꞌal puliyalcanꞌañachu” nil.c
9 Ñatac paycuná manam cäsuculcälachu.
Aśhwanpa paycunap puntanpïta Tayta Dios alapacuśhan nasyuncunapïtapis,
mas piyurnin mana allin lulaycunactalämi,
mandacü Manases lulachila.
10 Chaymi willacünincunawan Tayta Dios nin:
11 “Punta Amhor läducunaca millachicuy juchacunacta lulaśhanpïpis mas piyurnintalämi,
Juda lädup mandacünin Manases lulala.
Chaynu taytachacunacta alawachiyninwanmari Juda läductapis juchapacachila.
12 Chaymi Israelpa Tayta Diosnin nin:
‘Sumä-sumä jatun mućhuchicuytam Jerusalenman,
Juda läduman caćhamuśhä.
Chayta uyalïcunaca muspayninćhünülämi licalipäcunꞌapis.
13 Chay Samaria malcactawan Acabpa milaynincunacta plumädawan tupushänümi,
Jerusalentapis tupuycuśha.
Anla lätucta paꞌalcul chacpaycuśha cäcänümi Jerusalen mana imayu pasaypi quïdanꞌa.
14 Parti malcätañatacmi lluy ćhïnicünincunap maquinman ćhulaycüśhä.
Jinaptïmi ima cänintapis waycalcul lluy calapatälälinꞌa.
15 Chaynu pasaycunꞌa Egiptopi awquilluncuna yalapämuśhanpïta,
canancama mana allincällacta lulapäcuśhanwan piñachipämäśhanpïtam’ ” nil.
16 Jinaman Manases manam Juda läducunällactachu Tayta Diospa ñawquin mana allincäta lulachila.
Sinuꞌa Jerusalenćhu mana juchayücunäta lluy wañüchiptinmari jinantin malcaćhu yawarlla unyacula.
17 Ñatac mandacü Manasespa lluy lulaynincuna,
jinaman mana allinta lulaśhancunapis Juda lädu mandacünincunap isquirbishan librunćhümari cayan.
18 Mandacü Manases wañucuptinmi awquilluncuna pampaläśhan palasyunćhu cä,
Uza nishan wirtaman pampälälila.
Chayurá paypa pudirnin chulin Amonñam mandacü cala.
Juda lädućhu Amonmi mandacun
19 Canan má,
ishcay ćhunca ishcayniyu (22) watanta liyalmi,
Amon mandacuyta allaycula.
Jerusalenpïta ishcay watam mandacula.
Mamanñatacmi Jotba lädu,
Haruzpa wawin Mesulemet cala.
20 Paypis papänin Manases lulaśhannümi,
Tayta Diospa ñawquin mana allincunallacta lulala.
21 Papänin mana allincunäta lulaśhannümari lluy lulaycula.
Papänin taytachacunacta alawaśhannümari paypis sirbiycula,
alawayculapis.
22 Awquilluncunap Tayta Diosnintá caćhaycülañam.
Manañamá paypa munaśhanmannüñachu cawsala.
23 Ñatac mandacü Amonpa nunancuna cuntran śhalcalcälilmi palasyullanćhu wañülächila.
24 Jinaptinmi mandacü Amonpa,
chay cuntran lluy śhalcücunäta malcaca wañülächila.
Jinalculmi mandacü Amonpa chulin Josiastaña pudirnin ćhulapäcula.