Juda lädućhu Josiasmi mandacun
22
Canan má,
Josiasa pusä watanta liyalmi mandacuyta allaycula.
Paymi Jerusalenpïta quimsa ćhunca jucniyu (31) wata mandacula.
Mamanñatacmi Boscat lädu Adaiap wawin Jedida cala.
2 Josiasꞌa allincunätam lulaycula.
Awquillun Davidnümi Tayta Diospa śhunꞌunpänu imaypis cawsaycula.
Pay manamá wicman caymanchu muyuycaćhayäla.
Tayta Diospa camachicuynin libructam talin
3 Chaynu ćhunca pusäniyu (18) wata mandacuyalmi,
mandacü Josias caćhälun isquirbïnin Safanta Tayta Diospa alawana wasinman linanpä.
Paymi Mesulampa chulin,
Azaliap willcan cala.
Paymi caynu nin:
4 “Puydï sasirdüti Hilciasmanmi linqui.
Paymi Tayta Diospa alawana wasinman malcaca apapämuśhan illaycäta juntupäcunꞌa.
Chay illaycätamá puncućhu täpäcunaca jucllaman juntupäcunꞌa.
5 Chay illaycäta Tayta Diospa alawana wasinta allichäcunäpa licänincunaman uycuchun.
Chayćha paycuna alawana wasicta lluy allichäcunäman uycunꞌa.
6 Jinaman ilupi luläcunäman,
albañilcunäman,
lumi labräcunämanpis uycunꞌa.
Chaynütac alawana wasi allichaśha cananpä ilucunacta,
labräśha lumicunacta lantinanpäpis illayta uycunꞌatac.
7 Ñatac chay illay uycücunäta amaña imaćhu gastaśhantapis mañayächunñachu.
Paycuna chalapacuna nunacunamá” nil.
8 Niptinmi puydï sasirdüti Hilcias nin:
“Tayta Diospa alawana wasinćhümi camachicuycuna cä libructa talïlú” nil.
Nilcul Hilcias chay camachicuyta isquirbï Safanman uycüluptinmi pay lïgila.
9 Jinalculmi Safan mandacücäman lilcul nin:
“Yanapäniquicunam Tayta Diospa alawana wasinćhu illay cäcunäta juntulcälil uycälälinña,
alawana wasicta allichäcunäpä licänincunaman” nil.
10 Jinaman mandacücätam Safan nin:
“Sasirdüti Hilciasmi juc libructa uycaman” nil.
Nilculmi mandacücäpa ñawpäninćhu chay libructa lïgiycula.
11 Chay librućhu nishanta uyalïlulmi mandacüca,
llaquicuypi müdanantapis laćhyacuyan.
12 Chaypïtam sasirdüti Hilciasta,
Safanpa chulin Ahicamta,
Micaiaspa chulin Acborta,
isquirbï Safanta,
jinaman mandacücäpa yanapänin Asaiastapis nin:
13 “Cay librućhu nishancunacta manam yaꞌapis,
malcäpis,
jinantin Juda lädu quïdäcunäpis cäsuculanchicchu.
Tayta Dios sumä piñäśhaćhari cayan,
awquillunchiccunapis mana cäsuculcäśhanpi nï lulaymanpis ćhulapäcuśhanpi.
Chaycunapi niycamänanchicpä Tayta Diosta tapuycamuy” nil.
14 Niptinmi sasirdüti Hilcias,
Ahicam,
Acbor,
Safan,
Asaiaspis liculcan,
Jerusalenpa muśhü baryunćhub yaćhä willacü Huldaman.
Paypa wayapanmi Salum cala,
Salumpa papäninñatac Ticva,
awquillunñatac Harhas cala.
Mandacücäpa müdanancunacta licaycücäñatacmi Salum cala.
Chaynu willaycäliptinmi,
15 Hulda nin:
“Israelpa Tayta Diosnin caynümi nin:
Tapucü caćhamuśhüniqui nunäta caynu niycamuy:
16 Tayta Diosmi nin:
‘Juda lädup mandacünin lïgishan librućhu cä mućhuchicuycunätam,
cay jinantin Juda läduman,
cayćhu cäcunäman ćhächimuśhä.
17 Yaꞌacta caćhaycul taytachacunaman insinsiucunacta cañaycapäcuśhayquiwan lulapäcuśhayquicunawanmari,
sumä-sumä piñachipämälanqui.
Chaymi cay malcapä piñacuyní sumä walayal mana pasanꞌachu’ nil.
18 Chayurá israelcunap yaꞌa Tayta Diosninta tapumänayquipä caćhamuśhüniqui,
Juda lädup mandacüninta caynu nimuy:
‘Cay librućhu cäcunäta amcuna uyaliculcälanquim.
19 Cay malca lluy nunantin pampaman muyuchisha cananta,
jinaman mana allinpä licaśha cananta uyalïlälilmi śhunꞌuyqui alalaycula.
Jinaptinmi uyshuycapämuśhayquita,
müdanayquita laćhyapäcuśhayquita,
ñawpänïćhu waꞌapäcuśhayquitapis yaꞌa Tayta Dios licayculá.
20 Chaymi cay malcacta sumä-sumä camacaycuśhäta manaña licanquichu.
Aśhwanpa allin wañuypa wañul awquilluyquicuna caśhanman pampaycuśham canqui’ ” nil.
Chaynu niptinmi mandacücäta willaycälimü cutipämula.