Cay librućhu Davidpa mandacuyninpïmi jinalla limayan. David wañucuptin chulin Salomonñam mandacuyta allaycun. Paymi Tayta Diospa alawana wasinta Jerusalenćhu śhalcachila.

Ñatac juc lädu caśhta wamlacunawan mana casaracunanpä Tayta Dios niyaptinpis, Salomon mana cäsucuyculmi juc caśhta walmicunawan cuscäla. Chaymi chay taytachancunacta alawayta allacuycuptin Salomonpa mandacuyninta Tayta Dios ishcayman laquïla. Nurti lädum Israel lädu nisha cala. Sur läduñatacmi Juda lädu nisha cala. Chaymi Salomon wañucuptin ćhunca ishcayniyu ayllucunaca chay ishcay partiman lluy laquinacälälila.

Chaynütacmi Tayta Diospa willacünin Elias anyapan, nurti lädućhu cäcunaca imaymana taytachacunacta alawapäcuptin. Paycunañatacmi Tayta Diospa willacünincunacta wañuchiyta ćhapapäcula. Eliasta Tayta Dios ñawillanćhu caycachiptinñatacmi imanaytapis mana atipapäculachu. Aśhwanpam imaymana milagrucunacta Tayta Dios lulaycachila. Chaynüpam Tayta Dios sumä chalapacuna caśhanta camalaycachila.