Cay librućhu David mandacuśhanpïtam willaycamanchic. Tayta Dios nishanta David cäsucuptin mandacuynin allinmari caycula. Quiquin Tayta Diosmari limalicula Davidpa mandacuynin wiña-wiñay cananpä. Pay mana Israel caśhtacunactapis mandacuyninćhu ćhasquiyculamá. Chay muyülïninćhu cä juc nasyuncunätapis llallilculmi mas jatunman mandacuyninta David muyuchila.

Ñatac yaćhaśhanchicnüpis Israel caśhtacunaca ishcayman laquinacüśham cayalcäla. Jucninmi Israel lädu ütac nurti lädu nisha capäcula. Paycuna Saulman chalapäcuśha capäculmi Saul wañucuptinpis chulintaña mandacüninpä ćhulapäcula. Juccä läduñatacmi Juda lädu ütac sur lädu nisha capäcula. Cay ishcay lädu gïrraćhümi capäcula.

Chaypïtam pulan lädup mandacüninman David licalïla. Chaymi alawana wasinta lulananpäpis Tayta Dios mana munalachu. Chaynütac juc wayapap walminwan mansibaculcul chay wayapanta wañuchishanpïtapis Tayta Dios sumämi piñacüla. Chay lulaśhanpïta Davidpäpis sumä llaquicuymi cala: chulin Amon paninta abusäluptin, chaynütac chulin Absalon papänin mandacü cananta mana munayninwan cuntran śhalcuśhanpis.