Saulmi chulincunawan wañuculcan
31
Chaypïta caśhanmi Filisteo läducunaca Israel caśhtacunäwan pilyayta allacaycälin.
Jinaptinmi israelcunaca ayïta allacaycälil Gilboa ulꞌüćhu achca wañülälila.
2 Chayćhu Filisteo läducunaca Saultawan chulincunacta atipäculmi wañüchin chulin Jonatanta,
Abinadabta,
Malquisuactapis.
3 Jinalcul Saul-llactaña aticuyalcalmi flïcha ćhächïcunäpis ćhälächin.
Jinaptinmi Saul sumä-sumä manchälul,
4 atajachicu apäninta nin:
“Ispädayquita jululcul tucsilpämay.
Manam munächu wic mana siñalachicüśhacunaca yaꞌacta cushipapämal,
ñacachil,
wañuchimänanta” nil.
Niptinpis yanapäninca sumä manchaculmi mana munalachu.
Jinaptinmi Saul quiquinpa ispädanta chalalcul tucsicalpula.
5 Chaynu Saul wañucuśhanta licälulmi yanapäninpis quiquinpa ispädanwan tucsicalpul wañucula.
6 Chaynüpam Saul jinaman quimsan chulin,
yanapänin,
lluy nunancunapis chay muyunlla wañuculcäla.
7 Ñatac pampap wic-lädunćhu,
Jordan mayup inti ishpimunan lädućhu yaćha israelcunämi licälälin malca-masin pilyäcunaca ayicalcämuśhanta;
jinaman Saulpis chulincunawan wañülälishantapis yaćhälälinmi.
Chaymi malcancunacta caćhaycul ayiculcan.
Jinaptinmi Filisteo läducunaca chay malcacunäta duyñuchacaycälila.
8 Chay walantintam wañüśhacunäpa imantapis julapämunanpä Filisteo läducunaca lipäcula.
Chayćhümi Saultawan quimsan chulinta Gilboa ulꞌućhu wañüśha jitalayäta talïlälin.
9 Chaymi Saulpa umanta jululcul armancunactapis apaculcäla.
Jinalculmi Filisteo läducunäpa lluy malcancunaman willacücunacta caćhälun taytachanta alawanancunäćhüpis willacalcämunanpä.
10 Chaypïtam Saulpa armancunacta taytacha Astarotpa alawanan wasiman ćhulälälila.
Cuirpuntañatacmi Bet-san malcap murällanman walcälälila.
11 Galaad lädućhu cä Jabes malcayücunämi Saulpa cuirpunta Filisteo läducunaca imacta lulälälishantapis yaćhälälin.
12 Chaymi mana manchalï allinnincuna walächi Bet-san malcaman pasaculcan.
Chayćhümi Saulpa,
chulincunap cuirpuncunacta murällapi jululcul Jabes malcanta apaculcan.
Chayćhüñam chay cuirpuncunacta cañälälila.
13 Tulluncunactañatacmi Jabes malcaćhu cä lantap siquinman pampälälila.
Jinalculmari anćhish muyun ayunapäcula.