Saulmi chulincunawan wañucun
10
Canan má,
israelcunäwan Filisteo läducunaca pilyapäcuptinmi israelcunaca ayiculcäla.
Chaymi Gilboa ulꞌućhu achcacta camacaycüla.
2 Jinaman Saultapis chulincunactapis aticulcalmi wañülächila:
Jonatanta,
Abinadabta,
Malquisuactapis.
3 Chay pilyayca llaqui-llaqui cacuyaptimi Saul-llactaña aticuyalcal flïcha ćhächïcunäpis ćhälächin.
4 Chaynu dañädüśha cayalmi atajachicu apäninta Saul nin:
“Wic mana siñalachicüśhacunacaa cushipapämal ñacayalcächimänantá ispädayquita jululcul tucsilpämay” nil.
Niptinpis yanapäninca sumä manchaculmi mana munalachu.
Jinaptinmi Saul quiquinpa ispädanta chalalcul tucsicalpula.
5 Chaynu Saul wañucuśhanta licälulmi yanapäninpis quiquinpa ispädanwan tucsilpucüla.
6 Chaynüpam Saulwan quimsan chulin,
yanapänin,
lluy nunancunapis chay muyunlla wañuculcäla.
7 Ñatac pampaćhu yaćhä israelcunämi licälälin malca-masin pilyäcunaca ayiyalcämuśhanta,
jinaman Saulpis chulincunawan wañülälishanta yaćhälälin.
Chaymi malcancunacta caćhaycul ayiculcan.
Jinaptinmi Filisteo läducunaca chay malcacunäta duyñuchacaycälila.
8 Chay walantintam wañüśhacunäpa lluy imantapis julapämunanpä Filisteo läducunaca lipäcula.
Chayćhümi Saultawan quimsan chulinta Gilboa ulꞌućhu wañüśha jitalayäta talïlälin.
9 Chaymi Saulpa müdananta jululcul umantapis armancunactapis apaculcäla.
Jinalculmi Filisteo läducunäpa lluy malcancunaman willacücunacta caćhälun taytachanta alawanancunäćhüpis willacalcämunanpä.
10 Chaypïtam Saulpa armancunacta taytachancunap alawana wasinman ćhulälälila.
Umantañatacmi taytachan Dagonpa alawana wasinman walcälälila.
11 Galaad lädućhu cä Jabes malcayücunämi Saulpa cuirpunta Filisteo läducunaca imacta lulälälishantapis yaćhälälin.
12 Chaymi mana manchalï allinnincuna pasaculcal Saulpa,
chulincunap cuirpuncunacta Jabes malcaman apapämula.
Chay Jabes malcaćhu cä encina lantap siquinmanmi pampälälila.
Jinalculmi anćhish muyun ayunapäcula.
13-14 Chaynüpa Saul wañula,
Tayta Diospa cuntran śhalcuśhanpam,
jinaman Tayta Dios nishannu payta mana tapuycul,
licacü walmicta tapucuśhanpamari.b
Chaymari Filisteo läducunäwan wañulcachil mandacuynintapis Isaipa chulin Davidman Tayta Dios uycula.c