Cay librućhu Tayta Diospa alawana wasinpïtam limayan. Chay alawana wasi sumä chuyam caycula. Chay quiquin Tayta Diospa caycunanmi calapis.

Chaynütacmi nimanchic Salomonpa mandacuynin camacäluptin ishcayman laquicacuśhanta: nurti lädućhu cäcunämi “Israel lädu” nisha capäcula. Sur lädućhu cäcunäñatacmi “Juda lädu” nisha capäcula. Cay malcacunaca mana cäsuculcäśhanpïmá ñacaycunacta pasapäcula. Chaynu mandacü Roboampis mana cäsucuśhanpïtamari, Egiptop mandacünin Sisac camacaycüla. Chaynütacmi mandacü Asanpis, Tayta Diosman mana chalapacul aśhwanpa Siria lädup mandacüninwan limalinaculcäśhanpïta ishyäla. Chaynütacmi mandacü Uziaspis alawana wasipä camachishanta mana cäsucuśhanpi ishyäla. Ñatac nurti lädućhu cä israelcunaca pasaypi mana cäsucu-cama capäcuśhanpïmi, pasaypi camacaycüśha capäcula. Chaymi paycunapi cay librućhu mana ancha limanchu.