29
Chaypïta jinantin malcätam mandacü David nin:
“Alawana wasicta lulananpä chulí Salomontam Tayta Dios aclaycula.
Caynu sumä jatun lulaycunacta lulaycunanpä chulí anchap walaśhllalämi.
Manamari nunallapächu lulaycunꞌa sinuꞌa quiquin Tayta Diospämi.
2 Tayta Diosnïpa alawana wasinpä sumä callpanchacuywanmi alistayculá:
üructa,
illayta,
brunsicta,
jïrructa,
iluctapis tincuśhanmannu lulaycunanpä.
Chaynütacmi alistayculá imaymana licchä tuquish lumicunacta,
onice lumicta,
yana lumicta,
imaymana culur lumicunacta,
achca marmul lumicunactapis.a
3 Chaynu lluy alistaśhäcunäpïpis Tayta Diosnïpa alawana wasin-laycum quiquïpa lluy ürücunacta illaynïcunactapis uycú:
4 Paćhac walanga (100,000) quïlu Ofir lädu üructa,
allinnin ishcay paćhac quimsa ćhunca walanga (230,000) quïlu illayta.
Chaycunawanmari alawana wasip pilanta llutapäcunꞌa.
5 Chaycunawantacmi yaćhayta luläcunaca lulapäcunꞌa ürupi cäcäta üruwan,
illaypi cäcäta illaywan.
Canan má,
¿mayanniquimá Tayta Diospa alawana wasinpä uycuyta munapäcunqui?”
nil.
6 Niptinmi śhunꞌunpi yaluśhanta-cama uycapäcula:
wasinpi-cama puydïnincuna,
ayllucunap puydïnincuna,
walanga (1,000) paćhac (100) pilyäcunap puydïnincuna,
jinaman mandacücäpa ćhaclancunaćhu lulänincunap puydïnincunapis.
7 Chaynu Tayta Diospa alawana wasin lulaśha cananpämi uycapäcula:
paćhac süta ćhunca pichayu walanga (165,000) quïlu üructa,
ćhunca walanga (10,000) üructa,
quimsa paćhac quimsa ćhunca walanga (330,000) quïlu illayta,
süta paćhac walanga-yupay (600,000) quïlu brunsicta,
quimsa millun quimsa paćhac walanga (3,300,000) quïlu jïrructapis.
8 Jinaman tuquish lumicunacta apamücunäpis Tayta Diospa alawana wasip illay juntünin,
Gersonpa milaynin Jehielmanmi uycapäcula.
9 Chaynu Tayta Diospa alawana wasinpa śhunꞌun yalamuśhanpi apapäculmi malcantin cushisha cayalcäla.
Chaynütacmi mandacü Davidpis cushicula.
Tayta Diostam David alawan
10 Chaynu mandacü Davidpis cushiculmi,
jinantin malcäpa ñawquin Tayta Diosta alawaycula:
“Awquillunchic Israelpa Tayta Diosnin wiña-wiñaypä alawäśha cachun.
11 Tayta Diosllay,
amllam sumä munayniyu canqui;b
sumä cayniquipis,
llalliycuycäpis,
altuman juluycuśha caycäpis amllapämá.
Cay pachäćhu janay pachäćhu lluy cäcunäpis amllapämá.
Am Tayta Diospamá mandacuycäpis;
ampa maquillayquićhümá lluy imapis cayan.
12 “Lluy imapis maquillayquićhu cayaptinmá,
rïcuyaypis altuman juluycuśha caypis ampïta śhamun.
Maquillayquićhümá cayan callpapis,
munaypis,
jinaman altuman juluycuypis,
munayta lluyman uycuypis.
13 Chaymi Tayta Diosllay,
sumä cayniquipi
amllacta alawaycälic,
altuman julaycälic.
14 “Ñatac caynu lluy uycälinacpä yaꞌapis,
malcäpis manam imapischu capäcullá.
Rasunpa lluy imapis amllapamá;
ampi ćhasquiycälishallätamari uycälicpis.
15 Ampa ñawpäniquićhuꞌa awquillücunanümi
mana Israel caśhta,
pulicülla capäcú.
Cay pachäćhu cawsaynïcuna llantuynülla chincacüllamá.
16 Tayta Diosllay,
alawana wasiquita lulanäpä
lluy uycapäcuśhäcuna ampïtamá śhaycamun;
lluy-lluy amllapamari.
17 “Tayta Diosllay,
nunacunaca imanuy śhunꞌüwan capäcuśhäta
tuquictamá am lisiycunqui.
Allin cällanman lulaycücunätamari cuyaycunqui.
Chaymi śhunꞌüpi yalamuśhanpi lluy caycunacta uycullac.
Cayćhu juntunacuycul malcayquipis llapan śhunꞌunwan
cushicuywan uycapäcuśhuśhayquitamá licaycú.
18 Tayta Diosllay,
awquillú Abrahampa,
Isaacpa,
Israelpa Tayta Diosnin,
cay malcayquip cuyacuyninta jina chaynüllacta wiñaypä caycachiy.
Llapan śhunꞌunwan jinalla cuyaycälishunayquipätac caminaycuypis.
19 Chaynütac chulí Salomonta allin śhunꞌucta uycullay,
camachicuyniquicunacta,
nishayquicunacta,
yaćhachicuyniquicunacta lulayman ćhulaycunanpä.
Jinaman lluy alistaśhäcunawan alawana wasiquita
lulaycunanpäpis yanapaycullay” nil.
20 Nilculmi jinantin nunacunäta David nin:
“Tayta Diosninchicta canan alawapäcuy” nil.
Niptinmi jinantin nunacunaca awquilluncunap Tayta Diosninta alawapäcula.
Jinaman Tayta Diospa,
mandacücäpa ñawpäninmanmi unꞌulacaycälila.
Mandacü cananpämi Salomonta ćhulaycapäcun
21 Chay walantinñatacmi jinantin israelcunäpïta Tayta Diosman uycunancunactawan cañaywan uycunancunacta uycapäcula:
walanga malta wäcacunacta (1,000),
walanga uwishcunacta,
walanga ulu uwishcunacta (1,000) chaynütac jićhaywan uycunantinta-cama.
Jinaman juccunactapis uycapäculamari.
22 Chay muyun Tayta Diospa ñawpäninćhümi sumä cushicuywan micapäcula,
upyapäcula.
Chayćhümari Davidpa chulin Salomon,
puydïnu mandacuyta allaycunanpä yapa niycälil,
Tayta Diospa ñawpäninćhu asaytiwan llusiycapäcula.
Sadoctañatacmi sasirdüti cananpä japächaycapäcula.
23 Chaynüpam papänin Davidpa pudirninc Tayta Diospa malcanpä mandacünin Salomon yaycula.
Mandacuyninćhu lluy lulaśhancunaca allinmi caycula.
Jinantin israelcunäpis cäsupäculamari.
24 Lluy puydïcunaca,
alli-cama pilyäcunaca,
Davidpa lluy chulincunawanmi mandacü Salomonta yanapänanpä maquinman ćhulaculcäla.
25 Tayta Diosñatacmi jinantin Israelpa ñawpäninćhu Salomonta altuman juluycula;
mandacuyninćhüpis sumä caynin lisisha cananpämi yanapaycula.
Israelćhu punta mandacücuna paynuꞌa manamá mayanpis calachu.
Davidmi wañucun
26 Jinantin israelćhümá Isaipa chulin David mandacula.
27 Tawa ćhunca (40) watamari Israelćhu mandacula:
anćhish watam Hebronpi,
quimsa ćhunca quimsayu (33) watañatacmi Jerusalenpi.
28 Pay anchap yaśhañamari wañucula,
sumä cäniyu,
lluy nunap allinpä licaśha.
Pudirninñatacmi chulin Salomonña mandacula.d
29 Ñatac mandacü Davidpa allaycuyninpi camacaynincama lluy lulaśhancuna willacü Samuelpa,
Natanpa,
Gadpa isquirbisha libruncunaćhümá cayan.
30 Chayćhütacmi camalayan:
imanuy mandacuynin,
allin lulaynincuna,
jinaman payta ima pasaśhancunapis,
Israel nasyunwan juc nasyuncuna imanuy caśhancunapis cayan.