Chulin Salomontam David limapan
2
Davidpa wañuynin jiꞌacaycayämuptinmi chulin Salomonta caynu nin:
2 “Lluy nunanüpis juc bïdaman pasacuśhannüñam yaꞌapäpis pasacuná ćhämun.
Chayurá callpanchacul sumä nunanu cawsaycuy.
3 Tayta Diospa munaśhantari lulaycuy.
Paypa nishantanülla lulaycul Moisespa isquirbishanćhu cä camachicuyninta,
nishanta,
yaćhachicuyninta cäsucuy.
Chaynu cawsayculmi ima lulaśhayquićhüpis,
mayta lishayquićhüpis allin caycunqui.
4 Quiquin Tayta Diosmari limalicamäla:
‘Chuliquicuna yaꞌapa munaśhämannu cawsapäcul llapan śhunꞌunwan,
almanwan cäsucalcämaptinꞌa milayniquicunapïtam Israelpa mandacünin imaypis caycunꞌa’ nil.a
5 “Ñatac am yaćhanquimá jawcayay timpućhu cayal gïrraćhünu Sarviap chulin Joab imacta lulamäśhantapis.
Paymari Israelpa pilyänincunap puydïnincunacta wañüchila:
Nerpa chulin Abnertawan,b
Jeterpa chulin Amasacta.c
Chaynu lulala pilyućhu cayänu llallishanchicpïtamá.
Chaynüpamá yawarwan wiꞌaw watacuntapis,
śhucuynintapis anlatacüla.
6 Chaymi allin yaćhaywan lulaycunayqui.
Amari awquishyänancama cawsachiychu;
aśhwanpa wañüchiy.
7 Ñatac Galaad lädu Barzilaipad chulincunactam ichá allinpä licaycunqui.
Amwantacmi palasyuyquićhüpis micuycunꞌa.
Paycunamari wawꞌi-caśhayqui Absalonpïta yanapaycapämäla.
8 Chaynütacmi amwan cayan Bahurim lädu Benjamin ayllupïta cä Gerap chulin Simei.
Paymi Mahanaime malcacta liyaptí mana allin canäpä nimäla.
Ñatac Jordan mayuman quiquin talipämaptinmi Tayta Diospa śhutinćhu limaliculá mana wañuchinäpä.f
9 Amñatacmi ichá ama pampachanquichu.
Amꞌa yaćhayniquimannümá paywan lulaycunqui.
Pasaypi mana allin wañuchun” nil.
Davidmi wañucun
10 Nilculmi David wañucula.
Jinaptinmi taytancuna pampaläśhan Davidpa Malcan nishanman pampapäcula.
11 Paymi tawa ćhunca (40) wata Israelćhu mandacula:
anćhish watam Hebronpi,
quimsa ćhunca quimsayu (33) watañatacmi Jerusalenpi.g
12 Chaynu David wañucuptinmi chulin Salomonña pudirninh mandacü cala.
Paypa mandacuyninꞌa allinmi tacyaycula.
Adoniastam wañuchin
13 Chaypïta Haguitpa chulin Adoniasmi lila Salomonpa maman Betsabeman.
Chayćhümi Betsabe nin:
“¿Allin śhunꞌuwanchun śhayämunqui icha mana allin śhunꞌuwanchun?”
nil.
Niptinmi Betsabe:
“Má nimayꞌari” nin.
15 Niptinmi Adonias:
“Am yaćhanquim taytäpa pudirnin mandacü canäta.
Jinantin Israelcunäpis mandacü canätamari lluy alcayalcan.
Ñatac Tayta Dios munaśhanmannümi wawꞌi-caśhá Salomontaña mandacüpa ćhulälun.
16 Chayurá canan mañaculläśhayqui.
Amamá ‘manam atipaśhächu’ nimanquichu” nin.
Niptinmi Betsabe:
“Má,
nimay” nin.
17 Niptinmi Adonias:
“Ama chaynu caychu,
mandacü Salomonta niycapamay Sunem lädu Abisag wamlawan casarachimänanpä.
Amtá awnishunquimari” nin.
18 Niptinmi Betsabe:
“Allin,
mandacücäta má niycapamuśhayquiꞌari” nin.
19 Chaymi Adoniaspa mañacamü mandacü Salomonman Betsabe lila.
Mandacü Salomonñatacmi śhalcuculcul mamanta ćhasquiycula puntanman uyshucuycul.
Jinalculmi dispächunman taycucuycul mamanpäpis täcunacta apachimula.
Chaymi mandacücäpa allïnin lädućhu täcula.
20 Chayćhümi maman nin:
“Mañacümi śhayämú.
Awniycallämayꞌari” nil.
Niptinmi mandacü Salomon:
“Niycamay mamay.
Manamá ‘manam’ nishayquichu” nin.
21 Niptinmi maman:
“Sunem lädu Abisag wamlawan wawꞌi-caśhayqui Adoniasta casarachiy” nin.
22 Niptinmi mandacü Salomon nin:
“Mamay,
¿imapïtá Sunem lädu Abisagwan casarachinäpä niyämanqui?
Aśhwanpa mandacü pay cananpäpis nimayñari.
Mayur wawꞌi-caśhäwanmi sasirdüti Abiatarpis,
Sarviap chulin Joabpis cayalcan” nil.
23 Nilculmi Tayta Diosta licäpa śhaycaycachil mandacü Salomon limalicula:
“Cay mañamäśhanpïta Adoniasta mana wañuchiptiꞌa quiquin Tayta Dios sumä-sumäta mućhuchimächun.
24 Papäní Davidpa mandacuyninćhu mandacunäpä ćhulaycamal tacyaycachimä Tayta Diosta licäpa ćhulayculmi limalicú canan-pacha Adonias wañunanpä” nil.
25 Nilculmi Joiadap chulin Benaiasta caćhala Adoniasta wañuchimunanpä.
Chaymi lilcul wañüchimula.
26 Sasirdüti Abiatartañatacmi mandacü Salomon nin:
“Anatot malcayquiman wayra licuy.
Wañuchinacpä cayaptinpis canan manam wañuchishayquichu,
papäní Davidpai puntanta Tayta Diospa limalicuśhan babulninta apaśhayquipïta.
Jinaman papänïwan cusca lluy ñacaycunacta pasapäcuśhayquipïtam mana wañuchishayquichu” nil.j
27 Chaynüpamá sasirdüti cayninpïta Abiatarta wicapäla.
Chaynüpamari Silo malcaćhu Eli ayllupïta Tayta Dios willacuśhanca lulacacüla.k
28 Chay nishancunactam Joabpis yaćhäla.
Paymi Adoniasman śhalcula masqui Absalonman mana śhalcuyalpis.
Chaymari Tayta Diospa chuya carpanman ayicul uycuna patacpa wälaniläninman chalacuycula.
29 Chaynu Tayta Diospa chuya carpanman Joab ayicul,
uycuna patacćhu pacaläśhantam mandacü Salomonman willaycälälila.
Chaymi mandacüca Joiadap chulin Benaiacta caćhäla:
“Joabta wañüchimuy” nil.
30 Chaymi Tayta Diospa carpanman lilcul Benaia nin:
“Mandacücämi caypi yalunayquipä niyan” nil.
Niptinmi Joab:
“Caypi manam yalüchu.
Cayćhümi wañulpis wañuśhä” nin.
Chaynu Joab nishantam Benaia cutilcul mandacü Salomonman willaycula.
31 Chaymi mandacü Salomon nin:
“Pay nishantanu lulaycuy;
jinaćhu wañulcachimul pampämuy.
Chaynüpaćh mana juchayu nunacunacta Joab wañuchishanpïta manaña yaꞌapis nï ayllücunapis juchayüñachu capäcuśhä.
32 Ishcay sumä allin-cama nunacunacta wañuchishanpïtamari Tayta Dios wañüchinꞌa.
Papäní David mana yaćhaśhancamam Israelpa pilyänincunap puydïnin Abnerta ispädawan wañüchila.
Paymi Nerpa chulin cala.
Chaynütac Judapa pilyänincunap puydïnin Amasactapis wañüchila.
Payñatacmi Jeterpa chulin cala.
33 Paycunap wañuyninpïta Joabwan lluy milaynincuna wiña-wiñaypä mućhuchisha cachun.
Ñatac Davidpa ayllunćhu,
dispächunćhu,
mandacuyninćhümi ichá Tayta Dios jawca cawsayta uycunꞌa” nil.
34 Niptinmi Joiadap chulin Benaia lilcul wañüchimula.
Jinaptinmi chunyä ulꞌućhu cä wasinman Joabta pampämula.
35 Chaypïtam mandacüca pilyänincunap puydïnin cananpä Joabpa pudirninta ćhuläla Joiadap chulin Benaiacta.
Sasirdüti Sadoctañatacmi ćhulala Abiatarpa pudirninta.
36 Chaypïtam Simeita ayalcachimul mandacüca nin:
“Jerusalen malcaćhu wasiquita lulalcul chayćhu yaćhay.
Chaypïta amañam maytapis aśhunquichu.
37 Ñatac imaypis yalülul Cedron mayucta pasalcul-pachallam wañunqui.
Quiquillayquimari wañuyniquita ashïlunquiman” nil.
38 Niptinmi Simei:
“Allinmi taytay.
Am mandacüní nimäshayquitanümi lulayculläśhä” nin.
Chaynüpam Jerusalen malcäćhu Simei unaylä yaćhala.
39 Quimsa watapïtañatacmi Simeipa ishcay nunancuna ayiculcäla Maacap chulin Aquisman.
Paymi Gat malcap mandacünin cala.
Chaynu uyway nunancuna Gat malcaman ayiculcäśhantam Simeiman willaycälälin.
40 Chaymi nunancunacta ashï aśhnunta carunaculcul Gat malcaćhu cä Aquisman pasacun.
Chay Gat malcapi nunancunacta cutiyächimuptinñam,
41 Salomonta willälälin:
“Jerusalenpïta Gat malcäcama lishanpïtam Simei canan cutiyämun” nil.
42 Chaymi Simeita ayalcachimul mandacüca nin:
“¿Manachun Tayta Diosta licäninchicpä ćhulaycul:
‘Maytapis yalülulꞌa wañunquim’ nil limaliculac?
¿Manachun niptí amñatac:
‘Allinmi taytay.
Nimäśhayquitanümi lulayculläśhä’ nimälanqui?
43 ¿Imapïmá Tayta Diosta licäninchicpä ćhulaycul limalicuśhäta mana cäsuculanquichu?
¿Imapïtá yaꞌa nishactapis mana cäsuculanquichu?
44 “Am tuquictam yaćhacunqui papäní Davidta ima mana allin lulaśhayquitapis.
Chaymi quiquin Tayta Dios tincüniquiman mućhuchishunqui.
45 Mandacü Salomonñatacmi ichá allinpä licaycuśha caycunꞌa.
Davidpa mandacuyninta wiña-wiñaypämari Tayta Dios tacyaycachinꞌa” nil.
46 Nilculmi Joiadap chulin Benaiacta caćhala Simieta wañuchimunanpä.
Chaymi lilcul wañüchimula.
Chaynüpam Salomonpa mandacuynin tacyaycachisha cala.