2 Crónicas
Malcanpa Cawsayninpi Ishcay Cä Isquirbishan
Yaćhaytam Salomon mañacun
1
Canan má,
Tayta Diosninpa yanapayninwanmi Davidpa chulin Salomonpa mandacuynin tacyaycul sumä-sumä lisishaman muyüla.
2 Chaymi Salomon lluy israelcunäta ayachimula:
walanga (1,000) pilyäcunap,
paćhac (100) pilyäcunap puydïnincunacta,
malcap licaycünincunacta,
Israelpa camachicünincunacta,
jinaman ayllućhu-cama puydïnincunactapis.
3 Lluy paycunawanmari Salomon lipäcula Gabaon ulꞌup puntanman.
Má,
chay ulꞌućhümari Tayta Dioswan tincuna carpaca cayäla.
Chayta Tayta Diospa sirbïnin Moisesmari chunyäcäćhu unayña lulachila.
4 Chay Tayta Diospa babulninta Quiriat-jearim malcapïta Davidmi apachimula,
Jerusalenćhu śhalcachishan carpaman.a
5 Chaynu captinpis Hurpa willcan Urip chulin Bezaleel brunsipïta lulaśhan uycuna pataccäñatacmib ichá Gabaon ulꞌullaćhülä cayäla,
Tayta Diosman aśhuycuna carpap ñawpäninćhu.
Chaymanmari Tayta Diosta tapucü ayachishan lluy nunacunäwan Salomon lipäcula.
6 Chay Tayta Diospa ñawpäninćhümi tincuna carpap puntanćhu brunsipïta cä uycunan patacman Salomon ishpila.
Chayćhümari walanga (1,000) uywacunacta cañaywan uycula.
7 Chay tutam Salomonman Tayta Dios licalilcamul nin:
“Ima munaśhayquitapis mañacamay jinalla,
uycuśhayquim” nil.
8 Niptinmi Salomon:
“Papäní Davidta sumämi llaquipayculanqui.
Paypa pudirnin mandacunäpämari yaꞌacta ćhulaycamanqui.
9 Chayurá Tayta Diosllay,
papäní Davidman limalicuśhayquimannuꞌari lulaycuy.
Anmá allpänu cä achca-achca nunacunap mandäninpä ćhulaycamanqui.c
10 ¿¡Caychica-caychica nunayquicunacta mayanmá caminaycunman!?
Chayurá cay malcayquita caminaycunäpäri tantiaytawan yaćhayta uycallämay” nil.
11 Niptinmi Tayta Dios nin:
“Am manamá mañacamanqui rïcuyänayquipächu,
cäniyu canayquipächu,
nï altuman juluycuśha canayquipächu,
nï ćhïnicüniquicuna wañunanpächu,
nï achca wata cawsanayquipächu sinuꞌa mandacüpa ćhulaycuśhá malcäta caminaycunayquipämi tantiaytawan yaćhayta mañacamanqui.
12 Chaymari tantiaytawan yaćhayta uycuśhayqui.
Jinaman uycuśhayquitacmi rïcu canayquipä,
cäniyu canayquipä,
altuman juluycuśha canayquipäpis.
Amnu mandacü manamá puntacta calachu nïtacmi śhamücunäćhüpis canꞌatacchu” nil.
13 Chaypïta chay Gabaon ulꞌüćhu Tayta Dioswan tincuna carpap ñawpäninpïtam,
Jerusalenman Salomon cutilcamul Israelćhu mandacuyta allaycula.
Carritacunactawan cawallucunactam Salomon lantin
14 Má,
mandacü Salomonmi juntüchin walanga tawa paćhac (1,400) carritacunacta,
ćhunca ishcayniyu walanga (12,000) sïlläducunacta.d
Chay cawallucunätam laquila pilyananpä carritacuna caśhan malcacunäman.
Juccunätañatacmi Jerusalenćhu mandacücäta täpananpä laquila.
15 Chaynütacmi mandacüca alli-alli śhalactanüña illaytawan üructa Jerusalenman juntüchila.e
Chaynütacmi Sefela lädućhu ïgus munti jaćhacunätanu cedro ilucunactapis apachimula.
16 Mandacü Salomonpä cawallucunacta Egiptopïtawanf Ciliciapïtamg apapämula.
Chaycunapïtamari yanapänincuna lantipämü capäcula.h
17 Egiptopïmi carritacunäta süta paćhac (600) illaywan lantimü cala;
cawallucunätañatacmi paćhac picha ćhunca (150) illaywan.
Mandacü Salomonpïñatacmari Het,
Siria läducunäpa mandacünincuna lantipäcü capäcula.