“Papäní David palasyunta lulananpä cedro ilucunacta apachimuśhayquinu,

cananpis apachimumay.

4 Canan Tayta Diosnïpämari alawana wasicta lulaycapul japächaycapuśhä,

chayćhu mishqui aśhnä insinsiucta cañaycunäpä,

Tayta Diosllapä japächäśha tantacta imaypis ćhulaycapunäpä,

chaynütac israelcunaca wälanpa tardinpa,

jamana muyunćhu,

llullu quillaćhu,

jinaman Tayta Diosninchicpä lluy fistancunaćhüpis cañaywan uycunacunacta uycunäpäpis.

Chaynümari israelcunäćhu imaypis lulaycälishä.

5 Tayta Diosní lluy dioscunapïpis mas jatu-jatun captinmi,

jatu-jatun alawana wasicta lulaycapuśhä.

6 Ñatac ¿janay pachaca maynu jatun cayalpis payta mana camayaptinꞌa,

mayanmá alawana wasicta^a lulaycapunman?

¿Mayantá alawana wasicta lulaycapunäpä,

jinaman insinsiucta cañaycapunalläpäpis yaꞌa cayá?

7 Chayurá ama chaynu callaychu,

caćhamumay ürućhu,

illayćhu,

jïrrućhu,

brunsićhu,

jinaman murädu,

puca,

asul puchcacunaćhu lulay yaćhäta.

Chaynütac tacaywan liträtu lulay yaćhäta caćhamumay papäní David mincaśhancunawan Judaćhu Jerusalenćhu lulapäcunanpä.

8 Jinaman Libano lädupi apachimumay:

cedro,

cipres,

sandalo ilucunacta.

Caynu ilucunacta cuchupäcunanpä nunayquicuna ishpisha-ishpishamari capäcun.

Yaꞌapa nunäcunapis nunayquicunacta yanapapäcunꞌa,

9 achca-achca ilucunacta alistapämunanpämi.

Cay alawana wasi lulanäca,

jatu-jatun,

sumä tuqui-tuquimari cacunꞌa.

10 Chay ilucunäta cuchü nunayquicunactam uycuśhä:

tawa millun tawa paćhac walanga (4,400,000) quïlu trïgucta,

tawa millun tawa paćhac walanga (4,400,000) quïlu siwäta,

tawa paćhac tawa ćhunca walanga (440,000) litru bïnucta,

tawa paćhac tawa ćhunca walanga (440,000) litru ulïbus allinnin asaytictapis” nil.

“Tayta Dios malcanta cuyalmi mandacüninpä ćhulaycuśhulanqui.

12 Janay pachäta cay pachäta camaycü israelcunäpa Tayta Diosnin alawäśha cachun.

Paymi mandacü Davidta allin tantiayniyu,

fisyusapa,

yaćhayniyu chulicta uycun,

Tayta Diospa alawana wasintawan quiquinpa palasyunta lulaycunanpä.

13 Yaꞌañatacmi allin tantiaysapa lulaypa yaćhä Hiram-abicta caćhayämú.

14 Paypa maman Dan ayllupïtam,

taytanñatacmi Tiro malcapïta.

Paymi ishpisha-ishpisha ürućhu,

illayćhu,

brunsićhu,

jïrrućhu,

lumićhu,

ilucunaćhu ima lulaypäpis cacullan.

Chaynütacmi murädu,

puca,

lïnu,

asul puchcacunawan lulaycunactapis yaćhacullan.

Jinaman imaymana liträtucunacta lulaypäpis juluypäpis ishpisha-ishpishamá.

Paymari nunayquicunawan,

jinaman papäniqui tayta Davidpa alli-cama nunancunawan cusca lulapäcunꞌa.

15 Chayurá taytay,

limalicuśhayquimannu cay nunallayquicunaman apachimuy trïgucta,

siwäta,

asayticta,

bïnuctapis.

16 Chayćha ayca ilucuna munaśhayquitapis Libano lädupi cuchupämuśhä.

Jinalcul ilucunacta matallacta wataycul luläśhawan Jopecama yacu jananpa^b apachimuptí,

amñatac Jerusalenman apachinqui” nil.