6 Chaynütacmi “Paradïru cuartu” nishantapis lulachila;

largunmanmi ishcay ćhunca ishcayniyu mitru ćhawpin (22.5) cala;

anchunmanñatac ćhunca quimsayu mitru ćhawpin (13.5) cala.

Chaypa chimpanćhu juc cuartum paradïruntin,

atacuntin cala.

7 Chaynütacmi dispächuntapis ütac cäraycunan cuartuctapis lulachila.

Chaytam cedro tablawan pampäpïta altuncama laꞌala.

8 Chay dispächunnüllam Salomonpa palasyunpis ipan lädućhu patyuntin cala.

Chaynütacmi Faraonpa wamla chulinwan casaracuśhan walminpäpis quiquinpa wasintanülla lulachipula.^a

9 Chaycuna lluy simintuncunapïta aśhta pilancunactapis lulïpapis,

janäpapis sumänin aclaśha lumicunawanmi lulachila.

Chay lumicunaca tincüllanman-cama janäpapis lulïpapis cuchüśha,

labräśham cala.

10 Simintuncunapis sumä allinnin jatućhä-cama lumiwan ćhulaśham cacula.

Waquinnin lumim tawa mitru ćhawpin cala.

Waquincunañatacmi quimsa mitru ćhawpin cala.

11 Chay simintup janäninpis allinnin lumi labräśhacunawan,

cedro ilucunawanmi sulïranpis cacula.

12 Chay jatun patyup muyülïninmanñatacmi quimsa pasay labräśha lumicuna cala.

Chaypa janäninmanmi cedro ilucuna ćhuläśha cala.

Chaynüllam Tayta Diospa alawana wasinpa luli patyunpis,

palasyup yaycunancäpis cala.

13 Chaypïtam mandacü Salomon Tiro malcaćhu yaćhä Hiramta ayachimula.

14 Paymi Neftali ayllupïta japanyäśha walmip wawin cala.

Papäninñatacmi Tiro malcaćhu brunsipïta ima lulaytapis yaćhaculläla.

Chaymi mandacü Salomon caśhanman Hiram ćhaycul nishanta lluy lulala.

15 Ishcay paradïrucunactam brunsipïta lulala;

altunninman pusä mitru-cama,

muyülïninñatac picha mitru ćhawpin cala.

16 Chaynütacmi ishcay uylu linlichacunacta lulala paradïruncunap umanman ćhulananpä.

Chay linlichacunam altunninman ishcay mitru cuartan cala.

17 Chay paradïrucunap umanćhu cäcunämi brunsipïta shimpäśha cadinawannu adurnäśha cala.

Chay paradïrupa-camam anćhish shimpäśha adurnucuna cala.

18 Chay cadina-yupaycäpa muyülïninćhü-cama brunsipïta ishcay pasaytam granadillacunanu lulaśha cala.

Chaycunam adurnucunäta täpalapäcula.

Chaynütam ishcaynin paradïrupäpis lulala.

19 Palasyup yaycunanćhu paradïrup puntanćhu linlichancunam liryu waytacunanu luläśha cala.

Chaycuna juc mitru pusä ćhunca (80) cintïmitruyümi cala.

20 Paradïrućhu linlincunap muyülïninćhu ishcay paćhac (200) granadillacunam ishcay fïlaćhu adurnäśha cala.

Cadina-yupaycäpa lädunćhümá ćhuläśha cala.

21 Chay paradïrucunactam alawana wasip puntanman śhaycachila.

Jinalculmi allï lädućhu cä paradïructa “Jaquin” nil śhutichäla;

ichü lädućhu cäcätañatacmi “Boaz” nil śhutichäla.

22 Chay paradïrucunap puntanmanmi liryu waytanu cä adurnucunacta ćhulala.

Chaynüpam paradïrucunäta lulayta camacäla.

23 Chaynütacmi Hiram lulala fundïsha brunsipïta jatun uylu istanquicta.

Manyanpïta aśhta jucnin manyancama tawa mitru ćhawpinmi cala.

Wichayninmanñatacmi ishcay mitru cuartan,

quiquin uylup muyülïninꞌa ćhunca quimsayu mitru ćhawpinmi cala.

24 Istanquip patanćhu lluy muyülïninpa ulapayninmanmi calabäsanu cä adurnucta brunsipïta ishcay pasäta adurnäla.

Ćhawpi mitrućhü-camam ćhunca adurnucuna ćhulaśha cala;

istanquiwan juc pïsallatacmi fundïsha cala.

25 Chay istanquim täcula ćhunca ishcayniyu (12) luläśha brunsipi wäcacunap janäninćhu.

Quimsa wäcacunam inti yalamunan läduman licalapäcula.

Juc quimsäñatacmi inti jiꞌalpunan läduman,

juc quimsäñatac sur läduman,

juc quimsa wäcäñatac nurti läduman licalapäcula.

Chay wäcacunap lümunpi ipan lädumanmi istanquica taycächisha cala.

26 Chay istanqui titanninman pusä cintïmitrum cala.

Shiminñatacmi liryup waytannu cala.

Chay istanquimanmi tawa ćhunca tawayu walanga (44,000) litru yacu yaycula.

27 Chaynütacmi täcunancunactapis brunsipïta ćhuncacta lulala.

Largunman anchunmanꞌa juc mitru pusä ćhunca (1.80) cintïmitruyümi cala.

Altunninmanꞌa juc mitru quimsa ćhunca pichayu (1.35) cintïmitrum cala.

28 Chaycunam caynu luläśha cala:

Lluy täcunanmi tablapi luläśha marcuyü-cama cala.

29 Chay marcuyu tablacunäćhümi liyuncuna,

wäcacuna,

querubin anjilnincunap liträtuncuna luläśha cala.

Chay liyuncunap,

wäcacunap janapayninćhu ulapayninćhümi adurnucuna luläśha cala.

30 Chay täcunancunam brunsipïta luläśha tawa ruydayü-cama cala;

ruydacta chalänincunapis brunsipïtacmi cala.

Chay täcunancunap ulay lädun tawan isquinancunaćhümi linlin cäcunaca labaturyucunäta chalalänanpä cala.

Täcunancäpa ćhaquincunaćhüñatacmi waytacunawan adurnäśha cala.

31 Chay labaturyup täcunanmi lulipïta aśhta shimincama tawa ćhunca pichayu (45) cintïmitru cala.

Shiminñatacmi uylu ućhcu cala;

ućhcucta tacyachïcäñatacmi lulipïta aśhta altuncama süta ćhunca pusäniyu (68) cala.

Shiminćhüñatacmi adurnucuna luläśha cala.

Adurnup marcuncunañatac cuadrädu cala,

manam uyluchu.

32 Chay tawan ruydancunam marcuyu tablancunap lulïninćhu cala.

Ruydancunacta chalaläcäñatacmi täcunancäwan jucllapi luläśha cala.

Ruydancunam anćhish ćhunca pusäniyu (78) cintïmitru cala.

33 Chay ruydancunam carritacunap ruydannu cacula,

ruyda chalaläninpis,

ruydap ćhawpinćhu cäcunäpis,

räyu-nilänincunapis brunsipïtamari cala.

34 Tawan isquinanćhu täcunancunäpä tawa linlincunapis jucllapi luläśham capäcula.

35 Chay täcunanpa jananćhu cä uyluñatacmi altunninman ishcay ćhunca ishcayniyu (22) cintïmitru cala.

Täcunanpa jananćhu brunsipi tabla-niläcunäwan marcuncunapis jucllapi luläśham capäcula.

36 Chay tablacunamanpis marcuncunamanpis jäcüninmanmi querubin anjilcunacta,

liyuncunacta,

palmïracunacta lulala;

lluy muyülïnincunamanpis waytap liträtuncunactam lulala.

37 Chaynu brunsipïtam ćhuncantin täcunancunacta lulala,

chaynü-camallacta,

chay tamäñullacta.

Chaycuna juc muldillaćhümi fundïsha capäcula.

38 Chaynütacmi brunsipïta ćhunca labaturyucunactapis lulala;^b

juc mitru tawa-cuartayü-camacta,

pusä paćhac pusä ćhunca (880) litru yaycümi capäcula.

Chay ćhunca cä täcunancunämanmi juc labaturyucta-cama ćhulala.

39 Chay alawana wasip allïnin lädumanmi pichacta ćhulala,

juc pichätañatacmi ichünin läduman.

Istanquitañatacmi alawana wasip ichü lädun,

inti yalamunan läduman ćhulala.

40 Chaynütacmi Hiram lulala brunsipïta mancacunacta,

pälacunacta,

tasuncunactapis.

Chaynüpam mandacü Salomon nishantanu Tayta Diospa alawana wasinta Hiram ishpichila:

41 Ishcaynin paradïruncunacta,

paradïrup umanćhu cä ishcay uylu-cama linlichancunacta,

chay umanćhu adurnuncunacta,

42 chaynütac ishcaynin shimpanacüśhanu cäcäpa tawa paćhac (400) granadilla adurnucunactapis.

Shimpaćhu-camam ishcay fïla granadilla adurnucuna cala.

Chaycunam uylu-cama ishcay linlichacunäta täpalapäcula.

43 Chaynütacmi ishpichila ćhunca täcunancunactapis,

chaypa jananćhu cä ćhunca labaturyucunätapis.

44 Chaynütacmi istanquictapis,

jinaman istanqui taycunanpä cä ćhunca ishcayniyu wäcacunätapis ishpichila.

45 Jinaman mancacunätapis,

wishlacunätapis,

tasuncunätapis ishpichilamari.

Chayurá lluy caycunacta mandacü Salomon nishantanümi Tayta Diospa alawana wasinpa cänincunacta Hiram lulala.

Chaycunacta sumä chipyayä brunsipïmi lulala.

46 Caycunacta quiquin mandacücämi fundichila Sucotwan Sareda lädu tincupulaśhan Jordan mayu pampaćhu,

llinca mitupi luläśha muldićhu.

47 Achca-achcactamari brunsipïta imactañapis Salomon lulächila.

Chaymi manaña pïsachilañachu ayca llasä-cama caśhantapis.

48 Chaynütacmi Salomon lulachila Tayta Diospa alawana wasinćhu ima cäcunätapis:

ürupi uycuna patacta,^c

Tayta Diosllapa japächaśha tanta ćhulanapä cä mïsacunacta,^d

49 chaynütac Sumä Chuya Sityup puntanćhu ürunllanllanpi cä jatun michïracunätapis;^e

picham allï lädućhu cala,

juc pichäñatacmi ichü lädućhu cala.

Lulachilatacmi michïrup waytancunactapis,

puntanćhu walanancunactapis,

ürupi cä śhanśha julucuntapis.

50 Jinaman lulachilam:

ürunllanllanpi cä labaturyucunäta,

micha cuchucuncunacta,

täsancunacta,

wishlancunacta,

ürunllanllanpi insinsiu cañacuncunactapis.

Chaynütacmi Chuya Sityup,

jinaman Sumä Chuya Sityup puncun muyunanpä täcunantapis ürunllanllanpïta lulachila.

51 Chaynüpam Tayta Diospa alawana wasinćhu ima cänincunactapis mandacü Salomon lulachiyta camacäla.

Chaypïtam papänin David ürupi illaypi cänincuna japächäśhanta Tayta Diospa wasinman apala.^f

Chaycunactam alawana wasićhu sumä ćhaniyünin caśhancunäman ćhulaycula.