Babulcätam alawana wasiman apan
8
Chaypïta mandacü Salomonmi jinantin Israelpa yaśhancunacta,
ayllucunap puydïnincunacta,
wasinpi-cama puydïnincunactapis juntüchila,
Tayta Diospa limalicuśhan chuya babulninta Davidpa Malcan nil śhutichäśha Sion malcapïta alawana wasiman apachimunanpä.a
2 Chayurá Chucllachacuy Fistaćhümi lluy israelcunaca mandacü Salomonwan juntunaculcäla.
Cay cala “Etanim” nishan anćhish quillaćhümari.
3 Chaynu Israel yaśhacunaca lluy ćhälälimuptinmi sasirdüticunaca babulta pallalcapäcula apapäcunanpä.
4 Chaynütacmi levitacunäwan sasirdüticunaca aśhuycunapä Tayta Diospa chuya carpantapis,
japächaśhan lluy cänincunactapis apapäcula.
5 Ćhaycachilmi mandacü Salomon lluy israelcunäwan babulpa puntanćhu juntunacuycul fintaytapis manaña atipäna nisyu-nisyu uwishcunacta,
wäcacunacta cañaywan uycapäcula.
6 Chaypïtam sasirdüticunaca Tayta Diospa limalicuśhan chuya babulninta apaycapäcula,
alawana wasićhu Sumä Chuya Sityuman.
Querubin anjilcunap laplanpa lulïninmanmari ćhulaycapäcula.
7 Chay querubin anjilcunap laplan quićhaläcämi babultawan apanan bärancunactapis täpaläla.
8 Bärancuna largu-cama captinmi punta lädućhu Chuya Sityupïpis camaläla.
Waśhapïtam ichá mana camalämulachu;
chaynüllamari canancamapis cayan.
9 Chay babulcäćhu ćhulaläla Horeb ulꞌućhu Moises lumipïta ishcay tablachacta ćhulaycuśhancällam.b
Tablachacunäćhumari isquirbïsha cala israelcunaca Egiptopïta yalapämuptin Tayta Dios limalicuśhancunaca.
10 Chay Chuya Sityupi sasirdüticunaca yalälälimuptinmi Tayta Diospa alawana wasinta pucutay juntäla.
11 Chaynu pucutaylla juntäluptinmi sasirdüticunaca lulaynincunacta manaña camacapäculañachu.
Tayta Diospa sumä cayninmari alawana wasinman lluy juntäla.c
Alawana wasictam Salomon japächan
12 Chayćhümi Salomon nin:
“Tayta Diosllay,
am nilanqui:
‘Tutawyayä pucutayćhümi’ yaćhaśha nilmi.
13 Cananꞌa alawana wasictam yaꞌa lulaycapuc,
chayćhu wiñaypä yaćhanayquipä” nil.
14 Nilculmi mandacüca lluy Israel nunacunaca juntuläśhanman muyulcul allin capäcunanpä nin:
15 “Papäní Davidman limalicuśhanta lluy lulaycuśhanpïta israelcunap Tayta Diosnin altuman juluśha cachun.
Caynümari limalicula:
16 ‘Egiptopi julaycamuśhá muyunpïpis jinantin israelćhu manamá mayannin ayllup malcallantapis aclalächu,
alawana wasïta lulapamaptin,
chayćhu alawäśha canäpä.
Aśhwanpam Davidta aclayculá Israel malcäta caminaycunanpä’ nil.d
17 Papäní Davidmi israelcunap Tayta Diosninpä alawana wasinta lulaypïta wañupacula.
18 Chaymi papäní Davidta Tayta Dios nin:
‘Alawana wasïta lulayta wañupacuśhayquicá allinmi allintá.e
19 Ñatac amchu manam lulachinqui;
sinuꞌa alawana wasïta chuliquim lulachinꞌa alawapämänanpä’ nil.f
20 “Chay limalicuśhantamari Tayta Dios canan lulaycun.
Pay nishannümari papäní Davidpa pudirnin Israelćhu canan mandacü cayá.
Jinaman israelcunäpa Tayta Diosninpa alawana wasintapis śhalcächipüñamá.
21 Chay wasićhümi limalicuśhan babulpäpis Chuya Sityucta japächaycú.
Chayćhu cayan Egiptopi julaycamul awquillunchiccunaman Tayta Dios limalicuśhancämá” nil.
22 Nilculmi israelcunäpa ñawquin Tayta Diospa uycuna patacninpa puntanman Salomon śhaycucuycul maquinta altuman chacchalcul nin:
23 “Israelpa Tayta Diosnin,
amnuꞌa manamá juc canchu janay pachäćhüpis,
nï cay pachäćhüpis.
Amꞌa,
munaśhayquimannu llapan śhunꞌunwan cäsucücunäta limalicuśhayquita lulayculmari cuyacuyniquita camalaycachinqui.
24 Nunayqui cä papäní Davidman limalicuśhayquitamá lulaycunqui.
Shimiquiwan limalicuśhayquitamari canan muyun licaśhanchicnüpis maquiquiwan lulaycunqui.
25 Chayurá israelcunäpa cä Tayta Diosnillay,
nunayqui cä papäní Davidman juc limalicuśhayquitapis canan lulaycullayꞌari.
Paytam nilanqui:
‘Milayniquicuna am cawsaśhayquinu,
munaśhämannu cawsapäcuptinꞌa milayniquicunallamari israelcunäpa mandacünin taycuycunꞌa’ nil.g
26 Chayurá Israelpa Tayta Diosnin nunayqui cä papäní Davidman limalicuśhayquitari tacyalpachiy.
27 “Ñatac ¿Tayta Diosllay,
rasunpachun cay pachäćhu yaćhanquiman imatá?
Janay pachäpis,
sïlüpis jatu-jatun cayalpis mana camayäśhuptiquichun,
¿cay lulapuśhac alawana wasïlla camäśhunquiman imamá?h
28 Chaynu captinpis Tayta Diosllay,
cay nunallayquip mañacuyllanta,
ayacuyllanta uyaliycallämay.
Ñawpäniquićhu cay nunallayqui ruygacuśhätari canan ćhasquiycallämay.
29 Cay alawana wasicta tutay muyunꞌari licaycullay.
Anmari nilanqui:
‘Cay wasićhümi yaꞌa yaćhaśhä’ nil.i
Chayurá cay wasipi nunallayqui mañacuśhätari uyaliycallämay.
30 Chaynütac cay nunallayquip,
Israel malcayquip mañacuynintapis uyaliycälillämayꞌari.
Cay alawana wasiquipi mañacapämuptí janay pacha yaćhaśhayqui wasiquipïta uyaliycamalꞌari juchäcunacta pampachaycälillämay.
31 “Sïchuśh mayanpis nuna-masinpa cuntran mana allinta luläluptin cay wasiquićhu cä uycuna patacćhu limalicachiptinꞌa,
32 anmi janay pachäpïta uyaliycul nunayquicunacta cäraycunqui.
Juchayücunätá tincüninmannümi mućhuycachinqui.
Mana juchayücätam ichá allinninmannu allinpä licaycunqui.
33 “Sïchuśh Israel malcayqui cuntrayqui mana allin lulapäcuśhanpïta ćhïnicünincunawan llallichiculcul anman cutiycälimul cay alawana wasiquićhu mañaculcaptinꞌa,
ruygaculcaptinꞌa,
34 janay pacha caśhayquipïta uyaliycunquim.
Jinalmi juchancunacta pampachaycul awquilluncunaman uycuśhayqui malcaman cutiycachinqui.
35 “Chaynütac cuntrayqui mana allinta lulaśhanpi sumä-sumä usyawan ñacachiptiqui cay alawana wasiquićhu mañaculcaptinꞌa,
altuman amta juluycuśhuptiquiꞌa,
jinaman ñacachishayquiwan juchanpi wanaculcaptinꞌa,
36 janay pacha caśhayquipïta uyaliycunquimá.
Jinalmi sirbïniquicunap,
Israel malcayquip juchancunacta pampachaycul allin cawsapäcunanpä caminaycunqui.
Jinalculmi malcayquita uycuśhayqui allpaman tamyacta tamyaycachimunqui.
37 “Sïchuśh nasyuncäćhu micuy wana,
ima ishyaypis,
ütac usyawan lantacuna chaquiptinpis,
paćhcaśhcuna,
puyucuna,
ismuycuna camacaptinpis,
ćhïnicünïcuna camacapämänanpä malcäta cunćhalayaptinpis,
ütac ima mana allincuna,
ishyaycuna śhacamuptinpis,
38 amta mañacalcämuptiꞌa,
ayacalcämuptiꞌa uyaliycapämanquimari.
Chay sasachacuycunacta llapan śhunꞌunwan tantiacul cay alawana wasi läduman chacchalämul jinantin Israel ruygaculcäśhunquimá.
39 Jinaptinmi janay pacha yaćhaśhayquipïta uyaliycamul pampachaycunqui.
Lulaśhanman tincütamá lluyta licaycunqui.
Amllamari lluy nunacunäpa śhunꞌunta tuquicta lisiycunqui.
40 Caynüpam awquillücunaman allpa uycapämäśhayquićhu cawsapäcuśhä-cama lluy nunayquicuna manchacuywan cawsaycälilläśhä.
41 “Chaynütacmi mana Israel juc caśhtacunaca maynu munayniyu sumä lisisha caśhayquita uyalil śhapämunꞌa.
42 (Uyalipäcunꞌa sumä munayniquipïtawan śhutiquipïtamari.)
Paycunapis cay alawana wasiquićhu mañaculcaptinꞌa,
43 janay pacha yaćhaśhayquipi uyaliycamulmi lluy mañacuśhanmannu uycunqui.
Chayćha jinantin pachäćhu malcacunaca śhutiquita lisipäcunꞌa.
Jinaman Israel malcayquinüpis manchacuywan licapäcuśhunqui.
Chaynüpamari cay lulapuśhac alawana wasićhu śhutiqui altuman juluycuśha caśhanta yaćhapäcunꞌa.
44 “Sïchuśh malcayqui ćhïnicünincunawan pilyananpä caćhaśhayqui may lädupïtapis lulachipuśhac Wasiman licalayämul Tayta Diosta mañacuptinꞌa,
45 chay mañacuyninta,
ruygacuyninta janay pachäpïta uyaliyculćha yanapaycunqui.
46 “Cay pachäćhu lluy nunamari juchaculcan.
Chayurá juchacta luläläliptinꞌa piñacülulmi ćhïnicünincunap maquinman ćhulaycülunqui.
Jinaptinmi caluctapis ütac sircactapis prïsu puśhaculcanꞌa.
47 Ñatac chay puśhaśhan malcaćhüña tantiapacälälil ayacuśhunquiman:
‘Mana allintam lulälälí,
juchapacalälïmi,
ampa cuntrayquim lulälälillá’ nil.
48 Chaynu ćhïnicünincuna puśhaśhan malcaćhu cayalcal llapan śhunꞌunwan,
almanwan wanaculcul awquilluncunaman uycuśhayqui allpaman,
aclacuśhayqui malcaman,
ampä lulachipuśhá wasiman licalayalcal mañaculcaptinꞌa,
49 janay pacha yaćhaśhayquipïta ayacuyllanta,
mañacuyllanta uyaliycullayꞌari.
Jinal yanapaycullay.
50 Malcayqui cuntrayqui mana allin lulapäcuśhancunactawan juchancunacta pampachaycullay.
Chay prïsu puśhäcunäpis llaquipaycälillächun.
51 Ampa aclacuśhayqui malcayquimari callan.
Egiptoćhu śhanśhay-śhanśhay urnućhu cayalcä-yupaytam julaycamulanqui.j
52 “Cay nunallayquip mañacuyllanta,
Israel malcayquip ayacuyllanta uyaliycallämay.
Ruygacalcämuptí uyaliycälillämayꞌari.
53 Anmi Tayta Diosllay,
jinantin pachäćhu malcacunäpïta malcayqui cananpä japächayculanqui.
Chaynütamari Egiptopi julaycamuśhayquićhu uywayniqui Moisespacama awquillücunacta nilanqui” nil.
54 Chaynu Salomon mañacula unꞌulacuycul,
maquintapis altuman pallaculcul Tayta Diospa alawana wasinćhu cä uycuna patacpa puntanćhümi.
Mañacuyta camacalculmi śhalcula.
55 Jinalculmi jinantin Israel malcacta allin capäcunanpä callpa-callpawan nin:
56 “Tayta Dios alawäśha cachun,
lluy limalicuśhanmannu Israel malcanman jawca cawsayta uycuśhanpi.
Uywaynin Moisespacama lluy limalicuśhanta lluy-lluytamari lulaycula.k
57 “Cananꞌa Tayta Diosninchic yaꞌanchicwan cachun awquillunchiccunawan caśhannu.
Ama imaypis caćhaycamäśhunchu nï unꞌaycamäśhunchu.
58 Aśhwanpa śhunꞌunchicta payman muyuycachichun munaśhanmannu cawsaycunapä,
awquillunchiccunacta camachishanmannu,
nishanmannu,
mandaśhanmannu lulaycunapäpis.
59 Cay mañacuśhäcunäta Tayta Diosninchic tutay muyun yalpalcuchun,
cay nunallantapis,
malcantapis muyun-muyun nisitäśhanpa yanapaycunanpä.
60 Chayćha jinantin pachäćhu cä malcacunäpis yaćhapäcunꞌa Tayta Diosnu juc mana mayanpis caśhanta.
61 Chaymi canan muyunnu Tayta Diosllanchicćhu śhunꞌuyqui caycunman,
camachicuynincunacta lulayman ćhulaycul yaćhachicuynincunactapis cäsucunayquipä” nil.
62 Chaypïtam mandacü Salomon lluy israelcunäwan Tayta Diosman cañaywan uycapäcula.
63 Allin cawsaśhanpi Tayta Diosman uycunactapis ishcay ćhunca ishcayniyu walanga (22,000) wäcacunactawan,
paćhac ishcay ćhunca walanga (120,000) uwishcunactam Salomon uycula.
Chaynüpam mandacü Salomon jinantin israelcunäwan Tayta Diospa alawana wasinta japächaycapäcula.
64 Chay muyunllatacmi Tayta Diospa alawana wasinpa ñawpäninćhu cä jatun patyuntapis mandacü Salomon japächaycula.
Chayćhümi cañaywan uycula.
Jinaman allin cawsaśhanpi uycunancätapis allinnincunacta wilacunätapis uycula.
Chayćhu lluy uycula Tayta Diospa wasinpa ñawpäninćhu cä brunsipïta lulaśhan uycuna patacca mana camaptinmi.
Manamari camalachu uywacunacta cañaycunanpä,
micuycunacta uycunanpä,
allin caśhanpi uycunapa cä wilacunäta uycunapäpis.
65 Chay muyunćhümi mandacü Salomon jinantin israelcunäwan Tayta Diospa puntanćhu anćhish muyun Chucllachacuy Fistacta lulapäcula.
Jinaman anćhish muyun mastalämi lulapäculapis.
Chaynüpam ćhunca tawayu muyun fistachaculcäla.
Chaypämi śhapämula Hamat malcap yaycunanpïta aśhta Egipto mayüpïta.
66 Chay fista lluy camacäluptinmi lluy śhamücunäta mandacüca:
“Malcayquiman-cama cuticulcay” nin.
Chaymi sulpäta uculcal wasinta-cama cushisha,
allin liculcäla uywaynin Davidtawan,
Israel malcanta Tayta Dios yanapaycuśhancunapïta.