3 Nilculmi mandacüca lluy Israel nunacunaca juntuläśhanman muyulcul allin capäcunanpä nin:

4 “Papäní Davidman limalicuśhanta lluy lulaycuśhanpïta,

israelcunap Tayta Diosnin altuman juluśha cachun.

Caynümari limalicula:

5 ‘Egiptopi julaycamuśhá muyunpïpis jinantin Israelćhu manamá mayannin ayllup malcallantapis aclalächu,

alawana wasïta lulapamaptin chayćhu alawäśha canäpä;

nïtac mayan ayllullactapis aclayculächu Israel malcäpa puydïnin cananpä.

6 Ñatac Jerusalentam aclayculá chayćhu yaćhanäpä.

Davidtañatacmari Israel malcäta mandacunanpä aclayculá’ nil.

7 “Papäní Davidmi israelcunap Tayta Diosnin altuman juluycuśha cananpä,

alawana wasinta lulaypïta wañupacula.

8 Chaymi papäní Davidta Tayta Dios nila:

‘Alawana wasïta lulay wañupacuśhayquica allinmi allintá.

9 Ñatac amchu manam lulachinqui,

sinuꞌa alawana wasïta chuliquim lulapamanꞌa,

alawapämänanpä’ nil.^a

10 “Chay limalicuśhantamari Tayta Dios canan lulaycun.

Pay nishannümari papäní Davidpa pudirnin,

Israelćhu canan mandacü cayá.

Jinaman israelcunäpa Tayta Diosninpa alawana wasintapis śhalcächipüñamá.

11 Cay wasimanmi Tayta Dios israelcunäwan limalicuśhan babulnintapis ćhulaycú” nil.

12 Nilculmi israelcunäpa ñawquin,

Tayta Diospa uycuna patacninpa puntanman,

Salomon śhaycucuycul maquinta altuman chacchalcula.

13 Má,

Salomonmi lulachilaña brunsipïta patacta,

ishcay mitru cuartan larguyüta,

ishcay mitru cuartan anchuyüta,

juc mitru quimsa ćhunca picha cintimitru altuyüta.

Chayta patyu ćhawpiman ćhulayculmi lluy israelcunap ñawquin chay pataccäman ishpila.

Chayćhu unꞌulacuyculmari maquinta altuman chacchalcul nin:

14 “Israelpa Tayta Diosnin,

amnuꞌa manamá juc canchu janay pachäćhüpis,

nï cay pachäćhüpis.

Amꞌa,

munaśhayquimannu llapan śhunꞌunwan cäsucücunäta limalicuśhayquita lulayculmari llaquipayniquita camalaycachinqui.

15 Nunayqui cä papäní Davidman limalicuśhayquitamá lulaycunqui.

Shimiquiwan limalicuśhayquitamari canan muyun licaśhanchicnüpis maquiquiwan lulaycunqui.

16 “Chayurá israelcunäpa cä Tayta Diosnillay,

nunayqui cä papäní Davidman juc limalicuśhayquitapis canan lulaycullayꞌari.

Paytam nilanqui:

‘Milayniquicuna am cawsaśhayquinu,

munaśhämannu cawsapäcuptinꞌa,

milayniquicunallamari israelcunäpa mandacünin taycuycunꞌa’ nil.^b

17 Chayurá Israelpa Tayta Diosnin nunayqui cä papäní Davidman limalicuśhayquitari lulaycullay.

18 “Ñatac ¿Tayta Diosllay rasunpachun cay pachäćhu nunacunäwan yaćhanquiman imatá?

Janay pachäpis,

sïlüpis jatu-jatun cayalpis mana camayäśhuptiquichun,

¿cay lulapuśhac alawana wasïlla camäśhunquiman imamá?^c

19 Chaynu captinpis Tayta Diosllay,

cay nunallayquip mañacuyllanta,

ayacuyllanta uyaliycallämay.

Ñawpäniquićhu cay nunallayqui ruygacuśhätari canan ćhasquiycallämay.

20 Cay alawana wasicta tutay muyunꞌari licaycullay.

Anmari nilanqui:

‘Cay wasićhümi yaꞌa yaćhaśhä’ nil.^d

Chayurá cay wasipi nunallayqui mañacuśhätari uyaliycallämay.

21 Chaynütac cay nunallayquip,

Israel malcayquip mañacuynintapis uyaliycälillämayꞌari.

Cay alawana wasiquipi mañacapämuptí janay pacha yaćhaśhayqui wasiquipïta uyaliycamalꞌari juchäcunacta pampachaycälillämay.

22 “Sïchuśh mayanpis nuna-masinpa cuntran mana allinta luläluptin,

cay wasiquićhu cä uycuna patacćhu limalicachiptinꞌa,

23 anmi janay pachäpïta uyaliycul nunayquicunacta cäraycunqui.

Juchayücunätá tincüninmannümi mućhuycachinqui.

Mana juchayücätam ichá allinninmannu allinpä licaycunqui.

24 “Sïchuśh Israel malcayqui cuntrayqui mana allin lulapäcuśhanpïta,

ćhïnicünincunawan llallichiculcul anman cutiycälimul,

cay alawana wasiquićhu mañaculcaptinꞌa,

ruygaculcaptinꞌa,

25 janay pacha caśhayquipïta uyaliycunquim.

Jinalmi juchancunacta pampachaycul awquilluncunaman uycuśhayqui malcaman cutiycachinqui.

26 “Chaynütac cuntrayqui mana allinta lulaśhanpi sumä-sumä usyawan ñacachiptiqui,

cay alawana wasiquićhu mañaculcaptinꞌa,

altuman amta juluycuśhuptiquiꞌa,

jinaman ñacachishayquiwan juchanpi wanaculcaptinꞌa,

27 janay pacha caśhayquipïta uyaliycunquimá.

Jinalmi sirbïniquicunap,

Israel malcayquip juchancunacta pampachaycul allin cawsapäcunanpä caminaycunqui.

Jinalculmi malcayquita uycuśhayqui allpaman tamyacta tamyaycachimunqui.

28 “Sïchuśh nasyuncäćhu micuy wana,

ima ishyaypis,

ütac usyawan lantacuna chaquiptinpis,

ütac paćhcaśhcuna puyucuna ismuycuna camacaptinpis,

ütac ćhïnicünïcuna camacapämänanpä malcäta cunćhalayaptinpis,

ütac ima mana allincuna,

ishyaycuna śhacamuptinpis,

29 amta mañacalcämuptiꞌa,

ayacalcämuptiꞌa uyaliycapämanquimari.

Chay sasachacuycunacta llapan śhunꞌunwan tantiacul,

cay alawana wasi läduman chacchalämul mayanpis ütac jinantin Israel ruygacuśhuptiquipis uyaliycunquimá.

30 Janay pacha yaćhaśhayquipïtamari uyaliycamul pampachaycunqui.

Lulaśhanman tincütamá lluyta licaycunqui.

Amllamari lluy nunacunäpa śhunꞌunta tuquicta lisiycunqui.

31 Chaynüpam awquillücunaman allpa upämaśhayquićhu cawsapäcuśhäcama,

lluy nunayquicuna manchacuywan munaśhayquinu cawsaycälilläśhä.

32 “Chaynütac mana Israel juc caśhtacunaca,

maynu munayniyu sumä lisisha caśhayquita uyalilmá śhapämunꞌa.

Paycunapis cay alawana wasiquićhu mañaculcaptinꞌa,

33 janay pacha yaćhaśhayquipi uyaliycamulmi,

lluy mañacuśhanmannu uycunqui.

Chayćha jinantin pachäćhu malcacunaca śhutiquita lisipäcunꞌa.

Chaynütacćha Israel malcayquinüpis manchacuywan licapäcuśhunqui.

Chaynüpamari cay lulapuśhac alawana wasićhu,

śhutiqui altuman juluycuśha caśhanta yaćhapäcunꞌa.

34 “Sïchuśh malcayqui ćhïnicünincunawan pilyananpä caćhaśhayqui may lädupïtapis,

cay aclaśhayqui malcaman,

lulachipuśhac wasiman licalayämul mañacuptinꞌa,

35 chay mañacuyninta,

ruygacuyninta janay pachäpïta uyaliyculćha ćhïnicünincunapïta amachaycunquipis.

36 “Cay pachäćhu lluy nunamari juchaculcan.

Chayurá juchacta luläläliptinꞌa piñacülulmi ćhïnicünincunap maquinman ćhulaycülunqui.

Jinaptinmi caluctapis ütac sircactapis prïsu puśhaculcanꞌa.

37 Ñatac chay puśhaśhan malcaćhüña tantiapacälälil mañacuśhunquiman:

‘Mana allintam lulälälí,

juchapacalälïmi,

ampa cuntrayquim lulälälillá’ nil.

38 Chaynu ćhïnicünincuna puśhaśhan malcaćhu cayalcal llapan śhunꞌunwan,

almanwan wanaculcul ichapis mañaculcäśhunqui.

Chayćhu awquillücunaman uycuśhayqui allpaman,

aclacuśhayqui malcaman,

ampä lulachipuśhá alawana wasiman licalayalcal mañaculcaptinꞌa,

39 janay pacha yaćhaśhayquipïta chay ayacuyninta,

mañacuyninta uyaliycunquimari.

Jinalmi malcayqui mana allin lulapäcuśhancunacta pampachaycul yanapaycunqui.

40 “Tayta Diosllay,

sumäta licaycälillämay,

uyaliycälillämay cay wasipi mañaculcäśhäcunäta.