5
Chaynüpam Tayta Diospa alawana wasinćhu ima cänincunactapis mandacü Salomon lulayta camacäla.
Chaypïtam papänin David ürupi illaypi cänincuna japächaśhantaa Tayta Diospa wasinman apala.
Chaycunactam alawana wasićhu sumä ćhaniyünin caśhancunäman ćhulaycula.
Tayta Diospa babulnintam alawana wasiman Salomon apachin
2 Chaypïta mandacü Salomonmi jinantin israelpa yaśhancunacta,
Jerusalenćhu ayllucunap puydïnincunacta,
wasinpi-cama puydïnincunactapis juntüchila.
Paycunawanmi Tayta Diospa limalicuśhan chuya babulninta Davidpa Malcan nil śhutichäśha Sion malcapïta alawana wasiman apachimula.b
3 Chaymi anćhish quillaćhu cä Chucllachacuy Fistaćhu lluy israelcunaca mandacü Salomonwan juntunacälälila.
4 Chaynu Israel yaśhacunaca lluy ćhälälimuptinmi levitacunaca,
chuya babulta pallalcapäcula apapäcunanpä.
5 Chaynütacmi levitacunäwan sasirdüticunaca aśhuycunapä chuya carpactapis,
japächaśhan lluy cänincunactapis apapäcula.
6 Ćhaycachilmi mandacü Salomon lluy israelcunäwan,
chuya babulpa puntanćhu,
fintaytapis manaña atipäna nisyu-nisyu uwishcunacta,
wäcacunacta cañaywan uycapäcula.
7 Chaypïtam sasirdüticunaca Tayta Diospa limalicuśhan babulninta apaycapäcula,
alawana wasićhu Sumä Chuya Sityuman;
querubin anjilcunap laplanpa lulïninmanmari ćhulaycapäcula.
8 Chay querubin anjilcunap laplan quićhaläcämi babultawan apanan bärancunactapis täpaläla.
9 Babulcäpa bärancunap umancuna largu-cama captinmi punta lädućhu Chuya Sityupïpis camaläla.
Waśhapïtam ichá mana camalämulachu;
chaynüllamari canancamapis cayan.
10 Chay babulcäćhu ćhulaläla,
Sinai ulꞌućhu Moises lumipïta ishcay tablachacta ćhulaycuśhancällam.c
Chay ulꞌućhümari israelcunaca Egiptopïta yalapämuptin Tayta Dios limalicula.
11 Chaypïtam Chuya Sityupïta sasirdüticunaca yalapäcula.
Chayćhu cä sasirdüticunaca ima turnućhu cayalpis lluymi chuyanchacüśha cayalcäla.
12 Uycuna patacpa inti yalamunan lädunćhüñatacmi cayalcäla levita taquïcuna:
Asaf,
Heman,
Jedutun chulincunawan wawꞌi-caśhancunawan-cama,
lïnupi müdananwan müdacälälisha jinaman arpacunacta,
pandirïtacunacta,
latillucunacta tucaśhtin.
Paycunawantacmi paćhac ishcay ćhunca (120) sasirdüticuna curnitillacta tucaśhtin cayalcäla.
13 Chay cuscam curnitillancunacta tucapäcula taquipäcula Tayta Diosta sulpäta ucuśhtin.
Chaynu curnitillacunacta,
latillucunacta,
juc tucanacunacta tucaśhtinmari taquipäcula:
“Tayta Dios maynu sumä allinmi;
cuyacuynin wiña-wiñaypämi” nil.d