Cay librućhu willamanchic Israel malcaca Babilonia lädup maquinćhu cayalcäśhanpi libraycuśha canantam. Tayta Diospa munaynin Israel malcan Jerusalenman cutipäcul alawana wasicta caśhan śhalcachipäcunanmi cala. Mana Israel caśhta Persia lädup mandacünin Ciroctamá Tayta Dios aclaycula israelcunäta salbaycunanpä. Tayta Diospa munaynin captinmi lluy pilyaśhanćhu mandacü Ciro llalliycula. Cay librućhu willaycamanchic Israel caśhtacunaca Jerusalenman cutipämuśhantam. Chayćhümi alawana wasicta caśhan śhalcachipäcula. Ñatac imanuypa Tayta Dios alawapäcunanpäpis unꞌälälilañamá. Chaymi sasirdüti Esdras Tayta Diospa munayninman imanuy cawsaycuy caśhantapis yaćhaycachinan cala.

Chaynütacmi Tayta Diospa aclacuśhan malcannu yaćhaycälinan cala. Jinalmi walmin ütac wayapan ütac chulin mana Israel caśhta captinꞌa alapacunan cala. Masqui chay lulay sasa captinpis chaynütamá lulaycälinan cala, mana allin lulaycunaman mana apachiculcänanpä (Deut 23.1; Neh 13.1).