Tayta Diosmi Salomonman limalicun
9
Chaynu Tayta Diospa alawana wasinta,
quiquinpa palasyunta,
ima lulay munaśhantapis lulayta Salomon camacäluptinmi,
2 Gabaona malcaćhu Tayta Dios payman licalishancänu yapa licalïlun.
3 Chayćhümi nin:
“Cay mañacamäśhayquita,
ayacamäśhayquita uyaliycucmi.
Wiña-wiñay yaćhanäpä lulapamäśhayqui wasictam japächaycú.
Chayćhümi ñawïpis śhunꞌüpis caycunꞌa.
4 Canan papäniqui Davidnu llapan śhunꞌuyquiwan,
manchacuywan allin cawsaycuptiquiꞌa,
lluy nishäcunacta lulaycuptiquiꞌa,
camachishätapis,
yaćhachishätapis lulayman ćhulaycuptiquiꞌa,
5 wiña-wiñaypämi mandacuyniquita Israelćhu tacyaycachishä.
Paytamari nilá:
‘Ampa milayniquicunallapïtam Israelpa mandacünin imaypis caycunꞌa’ nil.b
6 Ñatac amcuna ütac milayniquicuna camachishäta,
yaćhachishäta unꞌaycul juc taytachacunacta alawanayquipä,
sirbinayquipä japächaculcaptiquiꞌa,
7 yaꞌa quiquïmi cay uycuśhac allpapïta Israelta alapacüśhä.
Alawapämänayquipä japächaśhá wasictapis caćhaycüśhämari.
Jinaptïmi Israel malcaca lluy malcacunap asipäculcänan,
burlaculcänan canꞌa.
8 Cay alawana wasi pampaman muyüśha caśhanta licapäculmi pasäcunaca äśhalayllaman camäśha burlaculcal nipäcunꞌa:
‘¿Imapïtan Tayta Dios,
cay alawana wasictawan cay malcacta caynu-caynüpaña lulälun?’
nil.c
9 Niptinmi uyalïcunaca nipäcunꞌa:
‘Awquilluncunacta Egiptopi julamünin Tayta Diosninta caćhaycul juc taytachacunacta alawapäcuśhanpi,
sirbipäcuśhanpïmi caynu cayalcan.
Chaymi paycunaman Tayta Dios caynu sumä llaquicta caćhaycülun’ ” nil.
Salomonmi imaymanacta lulachin
10 Chayurá mandacü Salomonmi Tayta Dios alawana wasintawan quiquinpa palasyunta ishcay ćhunca (20) wata ishpichila.
11 Lluy chaycunapämi Tiro malcap mandacünin Hiram apachimula cedro,
cipres ilucunacta.
Chaynütacmi mandacü Salomon munaśhanmannu ürucunactapis apachimula.
Salomonñatacmi Galilea lädućhu ishcay ćhunca (20) malcacunacta Hiramman uycula.
12 Chaymi mandacü Hiram Tiro malcapi lila chay uycuśhan malcacunäta licä.
Chaycuna śhunꞌunpächu manam caña.
13 Chaymi nin:
“Taytay,
¿ima-nilä malcacunactam uycamanqui?”
nil.
Jinalmi chay particta Cabuld allpa nila.
Cay śhutiwanmi canancamapis lisipäcun.
14 Mandacü Hiramꞌa quimsa walanga isun paćhac süta ćhunca (3,960) quïlu ürücunactamari mandacü Salomonman apachila.
15 Mandacü Salomonmi nunacunäta juntuycul dinbaldilla lulachila Tayta Diospa alawana wasinta,
quiquinpa palasyunta,
patyup ućhcuncuna pampatäśhancäta,
Jerusalenpa murällancunacta,
jinaman Hazor,
Meguido,
Gezer malcacunätapis.
16 Má,
Cay Gezer malcacta Egipto nasyunpa mandacünin Faraonmi unay llallïla.
Jinalculmi chayćhu yaćhä Canaan läducunäta wañulcachil malcactapis cañaycüla.
Chay Gezer malcactam Faraonca wamla chulinman palpaycüla Salomonwan casaracuptin.
17 Chaynu Gezer malcaca cayaptinmi Salomon muśhüpi śhalcachila,
chaynütac ulay lädu Bet-horon läduntapis.
18 Chaynütacmi chunyäcäćhu cä Baalat,
Tadmor malcacunactapis muśhüpi śhalcachila.
19 Jinaman micuy ćhulacunan malcacunactapis,
pilyananpä cä carritancunap,
cawallucunap wasincunactapis śhalcachilam.
Jinaman Jerusalenćhu,
Libano ulꞌucunäćhu,
maquinćhu cä intirućhümi lluy munaśhanta mandacü Salomon śhalcachila.
20 Ñatac mana Israel caśhtam capäcula Amhor,
Het,
Ferez,
Hev,
Jebus lädu puchücunaca.
21 Paycunap quïdä milaynincunactam Israel caśhtacuna chincachiyta mana atipapäculachu.
Paycunactamari mandacü Salomon sasa lulaycunacta dinbaldilla lulachila.
Chaynüllamari canancamapis paycuna cayalcan.
22 Israel caśhtacunätam ichá uyway nunactanüchu nï lulachila.
Aśhwanpa paycuna capäcula:
pilyäcuna,
pilyäcunap puydïnincuna,
mas puydïnincunapis.
Jinaman pilyananpä cä carritancunap cawalluncunap puydïnincunamá capäcula.
23 Mandacü Salomon lulachishan nunancunap puydï licänincuna picha paćhac picha ćhunca (550) licäcunam capäcula.
24 David malcapïtam Salomonpa muśhü wasi lulachishancäman Faraonpa wamla chulinta puśhala.
Chayćhüña cayaptinñam inti ishpimunan lädućhu patac cananpä allpawan Salomon pampatäla.
25 Watäćhu quimsae cutim Tayta Diosman uycuna patac ishpichishancäćhu allin cawsaśhanpi uycunapä cäcunactapis uycula,
uywacunactapis cañaycapula;
jinaman insinsiucunactapis cañaycapulam.
Chaynüpam alawana wasicta lulayta camacäla.
26 Chaynütacmi mandacü Salomon barcucunacta lulachila Puca Lamarf patanćhu,
Ezion-geber nishan malcaćhu.
Chay malcaca cayan Edom lädup chimpan Elot malcap sircanćhümi.
27 Mandacü Hirammari barcu manijänincunacta Salomonpa nunancunawan cusca lipäcunanpä caćhala.
Chay Hirampa manijänincuna sumä-cama,
lamartapis tuquicta lisï-camam caculcälläla.
28 Paycunamá Ofir läducama barcuwan lipäcul ćhunca tawayu walanganu (14,000) quïlu ürucunacta mandacü Salomonman apapämula.