Alawana wasictam Salomon lulachin
3
Má,
Jerusalenćhu cä Moriah ulꞌućhümi papänin Davidman Tayta Dios licalïla.
Chayćhu cä Jebus malcayu Ornanpaa ïrantam,
David lantila Tayta Diospa alawana wasinta lulachinanpä.
Chayćhümari alawana wasicta Salomon lulachiyta allaycula.
2 Chaynu allaycula tawa wata,
ishcay quilla,
ishcay muyun mandacuyninćhümari.
3 Tayta Diospa alawana wasinpa simintuncunacta Salomon simintachila caynütam:
largunman ishcay ćhunca anćhishniyu (27) mitructa,
anchunmanꞌa isun mitructam.
4 Chay alawana wasip yaycunanćhu curridurninñatacmi anchunmanpis altunmanpis isun mitru-cama cala.b
Chay curridurpa lulintam chuya ürunllanllanwan laꞌachila.
5 Jatun cuartup pilantañatacmi cipres tablawan laꞌachila.
Chaypa jananmanñatacmi ürunllanllanwan laꞌalcachil palmïractanu cadina-nilätanu liträtucunacta lulachila.
6 Chaynütacmi alawana wasicta sumä tuqui-cama aläja lumicunawan ćhulachila.
Üruñatacmari Parvaim lädupïta cacula.
7 Chay üruwanmi alawana wasicta,
sulïrancunacta,
puncup umralnincunacta,
pilancunacta,
puncuncunactapis laꞌachila.
Pilancunamanñatacmi querubin anjil liträtucunacta lulachila.
8 Alawana wasip Sumä Chuya Sityuntañatacmic anchunman largunman isun mitructa-cama lulachila.
Lulï lädu pilantañatacmi ishcay ćhunca walanganu (20,000) quïlu ürunllanllanwan laꞌachila.
9 Ürupïta cä läbucunäñatacmi ćhawpi quïlu-cama llasapäcula.
Jinaman altuśhćhu cä cuartucunactapis üruwanmi lluy laꞌachila.
10 Sumä Chuya Sityućhüñatacmi ishcay querubin anjilcunacta ilupi lulalcachil üruwan laꞌachila.
11 Pulan querubincunäpa laplancunañatacmi isun mitru largunman cacula.
Jucnin laplan ishcay mitru cuartan cäcämi,
alawana wasip pilanman tupalayäla.
Jucnin laplanñatacmi juc querubincäpa laplanwan tupanacuyäla.
12 Chaynütacmi juc querubin anjilcäpa laplanpis,
juccäpa midïdannülla cala.
Paypa laplanpis alawana wasip pilanmanmi tupalayäla.
Jucnin laplanñatacmi juc querubincäpa laplanwantac tupanacuyalcäla.
13 Chay pulan querubin anjilcunap laplancunam,
jucninpa puntanpi aśhta juccäpa puntancama isun mitru cala.
Pulanmi śhäcuyal alawana wasi läduman licapayalcäla.d
14 Chaynütacmi Chuya Sityupïta,
Sumä Chuya Sityucta laquinanpä curtïnacta asul,
murädu,
puca cawpüśha fïnu lïnupïtapis lulachila.
Chaymantacmi querubin anjilcunactapis tuqui-tuquicta burdächila.e
15 Alawana wasip puncunćhüñatacmi ishcay paradïrucunacta lulala,
altunninman ćhunca sütayuf (16) mitructa.
Chaycunap puntanćhu uylu linlichayu adurnucunäñatacmi ishcay mitru cuartan cala.
16 Jinaman shimpäśha cadinactanu lulayculmi paradïrucunap umanman ćhulaycula.
Chaynütacmi paćhac granadillacunactanu lulaycul chay shimpäśha cadina-yupaycäman ćhulaycula.
17 Chay paradïrucunactam alawana wasip puntanman śhaycachila.
Jinalculmi allï lädućhu cä paradïructa Jaquing nil śhutichäla;
ichü lädućhu cäcätañatacmi Boazh nil śhutichäla.