Tayta Diospa alawana wasintam Salomon lulan
6
Israelćhu tawa wataña Salomon mandayalmi,
Zif quillaćhu Tayta Diospa alawana wasinta śhalcachiyta allaycula.
Tawa paćhac pusä ćhunca (480) wataña Egiptopi yalapämuśhanpi cayalcaptinmi śhalcachiyta allaycula.
2 Tayta Diospa alawana wasinta mandacü Salomon śhalcachishanmi largunpa ishcay ćhunca anćhishniyu (27) mitru cala;
anchunmanñatac isun mitru,
altunninmanꞌa ćhunca quimsayu ćhawpi (13.5) mitrum cala.
3 Chay alawana wasip anchunmannüllam yaycunanćhu curridurnin isun mitru cala,
largunmanpis tawa mitru ćhawpin.
4 Alawana wasip bintanancunactapis rïjaśhniyütam Salomon lulachila.
5 Alawana wasip lluy muyülïninman juc wasichacunactam laꞌachila.
Chay cala Chuya Sityup jinaman Sumä Chuya Sityu nishanpa matäninman laꞌachisham.
6 Chay wasichacunam quimsa altuśhniyü-cama cala.
Pampäćhu cä wasichap anchunmi ishcay mitru juc cuartan cala.
Chaypa janäninćhu cä cuartup ishcay mitru quimsa cuartanmi cala.
Quimsa cä altuśhpañatacmi quimsa mitru ćhunca pichayu cintimitru cala.
Chay alawana wasip waśha lädu pilancuna mïnuscasca piläśha cala jïrrucunäta chacaycunanpämi;
wasip pilan manaña ućhcuśha cananpämari.
7 Alawana wasin labräśha lumi apachimuśhancunawanmi pilaśha cala.
Chaymi chay pilapäcuśhanćhuꞌa manaña uyalilanchicchu martillu,
ächa,
sinsil,
nï ima jïrru suynätapis.
8 Chay muyülïninćhu cä wasichacunäpa puncun alawana wasip allïnin lädunćhümi cala.
Chay puncup yaycuyculmi ishcay,
quimsa altuśhcämanpis muyu-muyu iscalïrap ishpinapä cala.
9 Chaynu alawana wasicta Salomon ishpilcachilmi tïchunman ćhulachila cedropi ilucunactawan tablacunacta.
10 Cay alawana wasip muyülïninćhu wasichacunäpa altunninmanmi ishcay mitru juc cuartan cala.
Chay wasichacunam cedro ilucunawan alawana wasiman chalachisha cala.
11 Chaypïtam Salomonta Tayta Dios nin:
12 “Cay alawana wasïta lulayächiptiquim canan nishayqui:
camachishämannu,
nishämannu,
lluy yaćhachishämannu cawsaycuptiquiꞌa papäniqui Davidman limalicuśhätam lulaycuśhä.
13 Chaymari Israel caśhtacunäwan yaćhaśhä;
manamá Israel malcäta caćhaycuśhächu” nil.
14 Chaypïtam alawana wasicta Salomon ishpïchila.
15 Chaynu ishpicalcachilmi lluy lulïninta pampäpïta aśhta tïchuncama cedro tablawan ćhulächila.
Chaynütacmi pïsuntapis cipres tablawan ćhulächila.
16 Chaynütacmi alawana wasip lulï tunäninćhu Sumä Chuya Sityu nishanpä isun mitructa laquila.
Chaytapis pampäpïta aśhta tïchuncamam cedro tablawan ćhulächila.a
17 Chay Sumä Chuya Sityup puntan lädućhu cuartuñatacmi ćhunca pusäniyu (18) mitru largunman cala.
18 Alawana wasip lluy lulïninmi cedro tablawan ćhuläśha cacula.
Chay tablamanñatacmi calabäsa,
wayta-niläcunacta labrächila.
Chaynu cedrowan lluy ćhuläśha captinmi juc lumillapis mana camalalachu.
19 Chay Sumä Chuya Sityuctam Salomon allichala Tayta Diospa limalicuśhan babulninta ćhulananpä.
20 Chay sityum largunman isun mitru,
anchunman isun mitru,
altunmanpis isun mitru cala.
Janäninmanmi ürunllanllanwan lluy laꞌala.
Cedropïta lulachishan uycuna patactapis ürunllanllanwanmi laꞌachila.
21 Chaynütacmi alawana wasip lulintapis üruwan laꞌala.
Jinaman Sumä Chuya Sityuctapis üruwan laꞌalculmi ürupi cadinawan wićhäla.
22 Chaynu ürunllanllanwan laꞌachila jinantin alawana wasip lulïnintawan,
puntanćhu cä uycuna patactam.b
23 Chaynütacmi Sumä Chuya Sityućhu ulïbus ilupïta ishcay querubin anjilcunacta lulachila.
Altunninmanmi tawa mitru ćhawpin-cama capäcula.
24 Laplancunañatacmi ishcay mitru juc cuartan cala.
Chayurá jucnin laplanpïta aśhta juc laplanpa puntanman tawa mitru ćhawpinmi cala.
25 Chay juc querubin anjilcäpis chaynu tawa mitru ćhawpinmi cala.
Chayurá pulanpis chaynü-nilä-camallam capäcula.
26 Altunmanpis pulanmi tawa mitru ćhawpiyü-cama capäcula.
27 Cay querubin anjilcunätam Sumä Chuya Sityuman Salomon ćhulala laplan quićhacacüśha-camacta.
Pulanpis matalla cayalcaptinmi jucnin laplanpa puntan cay-lädu pilaman tupaläla.
Juccäpa laplanñatacmi wic lädu pilaman tupaläla.
Jucnin laplancunap puntanñatacmi chay sityup ćhawpinćhu tupanaculcäla.
28 Jinalculmi chay querubin anjilcunäta ürunllanllanwan laꞌala.c
29 Chaynütacmi alawana wasip muyülïnin pilancunap lulïninmanpis waśhanmanpis querubin anjilcunap,
palmïracunap,
waytacunap liträtunta labrachila.
30 Chaynütacmi Sumä Chuya Sityupwan Chuya Sityup pïsuncunactapis aśhta waśhacama üruwan lluy laꞌala.
31 Chuya Sityuman yaycunapämi puncucunacta ulïbus ilupïta lulala.
Chay puncup umralninwan paradïrunmi picha isquinayu cala.
32 Chay ulïbus ilupi cä puncumanmi querubinpa,
palmïrap,
waytacunap liträtuncunacta labrächila.
Jinalculmi chay aläjacunäta üruwan lluy pasächila.
33 Chaynütacmi alawana wasip puncunpäpis tawa isquinayüta ulïbus ilupïta marcunta ćhulachila.
34 Chay puncu ishcay üjayu cipres ilupïtam cala;
üjacunaca ishcayman dublana-camam capäcula.
35 Chaynütacmi chay puncucunämanpis querubin anjilcunap,
palmïracunap,
waytacunap liträtuncunactapis labrächila.
Jinalculmi üruwan lluy pasächila.
36 Alawana wasip lulinćhu cä patyuntapis labräśha lumicunawanmi quimsa pasayta lulala.
Chay quimsa pasayćhu-camam cedro ilucta ćhulachila.d