Tiro malcap mandacünin Hiramwanmi Salomon limalinacun
5
Chaypïta Tiro malcap mandacünin Hirammi mandacü Davidwan allinpä apanaculcäla.
Chaymi Davidpa pudirnin chulin Salomon mandacü cananpä japächaśha caśhanta yaćhälul puydï yanapänincunacta caćhala.
2 Chaymi Hiramta Salomon nichila:
3 “Am tuquictam yaćhayanqui papäní David pilyallaćhu cayalcal Tayta Diosninpa alawana wasinta lulay mana atipäśhanta.
Chaynu alcaycula ćhïnicünincunacta maquinman Tayta Dios ćhulaycamunancamalämi.
4 Cananꞌa Tayta Diosní lluy malcacunäwanmi jawcallacta cawsaycachiman;
manañam ćhïnicünïcunapis,
nï sasachacuycunapis canñachu.
5 Chaymi Tayta Diosnïpä alawana wasinta canan śhalcachishä.
Tayta Diosmari papäní Davidta nila:
‘Pudirniqui mandacüpa ćhulaśhä chuliquim alawana wasïta śhalcachinꞌa’ nil.
6 Chaymari Libano muntipïta cedro ilucunacta nunayquicunawan cuchuchimunqui.
Yaćhaśhayquinüpis amcunanuꞌa manam nunäcuna ilu cuchuyta yaćhapäcunchu.
Chaymi nunayquicuna yaꞌapa nunäcunawan cuchupämunꞌa.
Nunayquicunacta nimäśhayquimannümari pägaśhä” nil.
7 Chaynu Salomon nichishanta Hiram uyalïlulmi alli-allicta cushiculcul nicuyan:
“Cay jatun nasyunta mandacunanpä allin yaćhayniyu chulicta Davidman uycuśhanpïta Tayta Dios alawäśha cachun” nil.
8 Nilcul-pacham Salomonman willacachimula:
“Mañacamäśhayquita ćhasquilämi.
Chayurá munaśhayquimannümi maychicactapis cedro,
cipres ilucta cuchuchipamuśhayqui.
9 Nunäcunam Libano muntipïta aśhta lamarcäcama apapämunꞌa.
Chaypïtam nimäśhayquicama wataycul lamar janallanpa apachimuśhä.
Chaypïñam pasquiycul pasachipäcunqui.
Amñatacmi lluy ayllücunapä micuyta apachimunqui” nil.
10 Nilculmi cedroctawan,
cipres ilucta Salomon mañaśhanmannu Hiram apachila.
11 Salomonñatacmi micapäcunanpä watan-watan apachila tawa millun tawa paćhac walanga (4ꞌ400,000) quïlu trïgucta,
tawa paćhac tawa ćhunca walangaa (440,000) litru ulïbus allinnin asaytictapis.
12 Tayta Diosñatacmi limalicuśhanmannu sumä yaćhayta Salomonman uycula.
Chaymi Salomonwan Hiram limanaculcal jawca cawsayćhu cawsapäcula.
13 Mandacü Salomonmi camachila jinantin Israelćhu wayapacunacta juntupämunanpä.
Chaymi quimsa ćhunca walanga (30,000) wayapacunacta juntülälila.
14 Paycunactam ćhunca walanganpi-cama (10,000) quillan-quillan Libano muntiman caćhapäcula.
Chaymi juc quilla lulapämul wasinćhüñatac ishcay quilla jamapäcula.
Chay luläcunäpa puydïninmi Adoniram cala.
15 Chaynütacmi anćhish ćhunca walanga (70,000) ilu apänincunapis cala;
ulꞌucunäćhüpis pusä ćhunca walangam (80,000) lumi labränincunapis cala.
16 Jinaman quimsa walanga quimsa paćhacmi (3,300) luläcunäpa puydïnincunapis cacula.
17 Alawana wasip simintunpämi mandacü Salomon apachimula jatućhäcama allinnin labräśha lumicunacta.
18 Chayurá Salomonpa,
Hirampa nunancunam,
jinaman Gebal malcapi wayapacunämi alawana wasipä ilucunäta llällapäcula,
lumicunätapis labrapäcula.