Amalec caśhtacunaca Siclag malcacta waycäluptinpis Davidmi llallin
30
Chaynu cuticul quimsa muyuntam David lluy nunancunawan Siclag malcaman ćhälälila.
Ćhänanpämi Amalec caśhtacunaca Neguev lädupïta aśhta Siclag malcacta camacaycäläliña,
cañaycäläliña.
2 Masquiae jucllacta mana wañuchilpis walmictapis,
umrictapis,
chulincunactapis lluymi puśhaculcäña.
3 David nunancunawan ćhänanpämi malcanta cañäśhactaña talïläliña.
Walmincunactapis walaśh wamla chulincunactapis prïsuctam puśhaculcäña.
4 Chaymi Davidwan lluy nunancuna illacänan-cama alli-allicta awćhuculcäla.
5 Davidpa ishcaynin walmintapis prïsum puśhaculcäña:
Jezreel malcayu Ahinoamta,
Carmel malcayu Abigailta wayapan Nabalpi japanyäśhätapis.a
6 Lluy nunacunäñatacmi walaśh wamla chulincuna mana caśhanpïta sumä-sumä piñäśha cayalcal tamshänanpä limacuyalcan.
Chaymi David ancha-anchap llaquicuyalpis Tayta Diosman chalapacuyninwan callpanchacula.
7 Chaymi Ahimelecpa chulin sasirdüti Abiatartab David nin:
“Ama chaynu caychu,
Tayta Diosta tapunäpä chalicucta apämumay” nil.
Chaynu Abiatar apämuptinmi David,
8 tapula Tayta Diosta:
“¿Cay suwacunäta atishächun icha manachun?
¿Alcansayta atipaśhächun icha manachun?”
nil.
Niptinmi Tayta Dios:
“Atiy jinalla.
Paycunacta alcansayculmi prïsu puśhaśhancunätapis libraycamunqui” nin.
9 Chaymi David süta paćha (600) liwshi nunancunawan liculcal Besor nishan wayuman ćhalälin.
Chayćhümi quïdapäcula,
10 pishipäśha cäcunaca ishcay paćhac (200) nunancuna;
manañamá Besor wayucta chimpayta atipapäculañachu.
Davidñatacmi tawa paćhac (400) nunancunallawanña pasaculcäla.
11 Chay lipäcuśhanćhümi Egipto nunawan tincülälil Davidman puśhälälila.
Chayćhümi micuyta micaycachipäcula,
yacuctapis upyaycachipäcula.
12 Chaynütac ïguspi,
übapi culpachäśhacunactapis uycälila.
Chayta micucuyculmi cawsapacämun quimsa tuta,
quimsa muyun imallactapis mana micuśha caśhanpïta.
13 Chayćhümi David nin:
“¿Maypïmi canqui?
¿Mayanpa sirbïninmi canqui?”
nil.
Niptinmi Egipto nunaca nin:
“Egiptopïmi cá.
Amalec caśhtap uywayninmi callá.
Ishyäluptïmi quimsa muyunña patrunní cayćhu caćhaycäman.
14 Cereteocunap sur lädunćhu cä Juda caśhtacunäta,
Caleb caśhtacunäta waycämari lipäculá.
Siclag malcactapis cañaycälälilämi” nil.
15 Niptinmi David:
“¿Manachun chay suwacuna caśhancäman puśhämanquiman?”
nin.
Niptinmi Egipto nunaca nin:
“Tayta Diosta licäninchicpä śhaycaycachil mana wañuchimänayquipä nï patrunnïpa maquinmanpis ćhulaycamänayquipä limalicuptiquiꞌa puśhaśhayquim” nil.
16 Chaypïtam waycäcunäman puśhälun.
Paycunam Filisteo läducunäpi,
Juda ayllucunäpi waycamuśhanta fistachacuycul wicćhu cayćhu micuyalcäla,
upyayalcäla.
17 Chaymi wälalla paycunaman David yaycuycul walantin tardicama lluy camacaycülun.
Camïllu uywanman sillaculcul tawa paćhac (400) müsu ayïcunällañam iscapälälin.
18 Chaynüpam Amalec läducunaca lluy waycaśhancunactawan ishcay walmintapis David cutichicamula.
19 Chay apacuśhancunäpïta lluytamari David cutichicamula:
uchuyllactapis jatuntapis,
wamla walaśh chulincunactapis,
lluy ima ayca apaśhantapis.
Manamá imallapis chincayculachu.
20 Chaynütacmi uwishcunätapis,
wäcacunätapis David cutichicamula.
Chay uywacunacta cutichimü nunacunämi nipäcula:
“Caycuná Davidpäñam” nil.
21 Chaynüpamari ishcay paćhac (200) nunancuna anchap pishipäśha Besor wayućhu quïdäcunäman David cutila.
Paycunañatacmi Davidtawan nunancunacta ćhasquïnin yalapämula.
Jinaptinmi Davidpis limaycula.
22 Ñatac Davidwan lï nunancunaćhu pasaypi juyu lägacuna cäcunämi nicuyalcan:
“Paycuna mana yanapayämaptinchicꞌa cutichimuśhanchiccunäpi manam imactapis uycuśhunchu.
Walminta-cama chulincunacta-cama puśhaculcul liculcächun” nil.
23 Niptinmi David nin:
“Irmashcuna,
chaytanuꞌa amari lulapäcuychu.
Tayta Diosmari lluy imactapis uycamanchic,
licaycamanchic.
Paytacmi waycamäninchic suwacunätapis maquinchicman ćhulaycamula.
24 ¿¡Chay nipäcuśhayquita mayanmá awniycunman!?
Uycunacuśhanchiccunäćhu lluymi chay cusca ćhasquiycunanchic:
ipinchicta cuydäcunäpis,
pilyä lïcunäpis” nil.
25 Chay muyunpïtamari canancamapis Israel caśhtacunäćhu chay cuscalla aypunaculcänanpä camachicuyca,
yaćhachicuyca cayan.
26 Chaynu Siclag malcaman David ćhälälilmi lluy apapämuśhanpïta Juda ayllup apanacuśhan yaśhancunaman particta apachila.
Caynu nilmari apachila:
“Tayta Diospa ćhïnicünincunapïta apamuśhätam particta amcunaman apayächimú” nil.