2 Samuel
Samuelwan Śhutichäśha Ishcay Cä Isquirbishan
Saul wañucuśhantam David yaćhälun
1
Chaynu Saul wañucuptinmia Amalec läducunäta David llallilcul Siclagb malcaman cuticula.
Chayćhümi ishcay muyunña cayäla.
2 Quimsa muyuncäćhüñatacmi Saulpa pilyänincunapi juc nuna müdanan laćhyäśha,
umanpis allpay-allpay ćhaycamul Davidpa puntanman unꞌulacuycun.
3 Chayćhümi David:
“¿Maypïmi śhayämunqui?”
nin.
Niptinmi:
“Israelcunaca jamapäcuśhanpïmi ayicamú” nin.
4 Niptinmi David:
“¿Imatá pasälun?
¡Má,
willaycallämayꞌari!”
nin.
Niptinmi:
“Pilyä israelcunämi llallichicälälil lluy ayiculcan.
Achcamari wañülälin;
Saulwan chulin Jonatanpis wañuculcanmari” nin.
5 Niptinmi David:
“¿Am imanuypatan yaćhanqui Saulwan chulin Jonatan wañuculcäśhanta?”
nin.
6 Niptinmi:
“Unꞌaypi Gilboa ulꞌüman ćhälulmi licälú Saul ispädanman chalapacuyäta.
Jinaman ćhïnicücäpa sillädancunapis carritancunapis jiꞌacaycayämulañam.
7 Chayćhu Saul muyulcamul yaꞌacta licämalmi ayacayäman.
Chaymi:
‘Cayćhümi cayá’ nilá.
8 Niptïmi:
‘¿Mayanmi canqui?’
niman.
Nimaptinmi:
‘Amalec caśhtam cayá’ nilá.
9 Chayćhümi niman:
‘Ama chaynu callaychu,
aśhuycamul wañulpächimay.
Piswalpuyalpis manamá wañulpüchu’ nil.
10 Chaynu wañuypa patanćhüña caśhanta tantiälulmi aśhuycul wañulpächilá.
Jinalculmi umanćhu cä mandacü curunantawan liclanćhu cä aläjanta julülá am taytäman apamunäpä” nil.c
11 Chayta uyalïlälilmi Davidwan chayćhu cäcunaca llaquicuypïta müdananta laćhyacuyalcan.
12 Chaynu Saul,
chulin Jonatanpis,
Tayta Diospa Israel pilyänincunapis,
jinantin Israel nasyunca ispädawan camacaycälälisha capäcuśhanpïtamari tutalpunancama awćhuculcäla,
micuytapis manalcapäcula.
13 Chaypïtam David tapun:
“¿Maypïmi canqui?”
nil.
Niptinmi:
“Juc lädu malcayu Amalec caśhtam callá” nin.
14 Niptinmi David:
“¿Imanuypatan mana manchacuycul Tayta Diospa japächacuśhanman maquiquita pallalcuyanquiman cala?
15-16 Quiquiquimari juchayu canqui wañunayquipä.
Shimiquiwanmari cunca cuchuyniquita ashicülunqui:
‘Tayta Diospa japächaśhanta yaꞌami wañüchilá’ nishayquiwan” nin.
Nilculmi jucnin nunanta ayalcamul:
“¡Cayta wañuchiy!”
nin.
Chay nishanta cäsuculmari pay wañüchin.
Saulwan Jonatan wañucuśhanpïtam aya taquicta David taquin
17 Chaynu Saulwan chulin Jonatan wañucuśhanpïtam cay aya taquicta David ishpichila.
18 Jinalculmi Judapa milaynincunacta yaćhachinanpä nila.
Chay taquimari Jaser librućhud caynu niyan:
19 “¡Ay Israel!
Sumä cayniqui ulꞌucunäćhümi camacälun.
¡Allin-cama pilyäcunämi palpülun!
20 Gate malcaćhu ama willapaculcaychu.f
Ascalong malcap cällincunaćhu ama äśhaycaćhapäcuychu;
Filisteo walmicunaca mana cushiculcänanpä;
Mana siñalachicüśhacunaca mana fistachaculcänanpä.
21 “¡Gilboa ulꞌucuna,
tamyapis,
śhullipaypis amcunaman amaña ćhaycamuchunchu!
¡Ćhaclacunäpis pasaypi amya mana wayümanña muyuchun!
Chayćhümari Saulpa japächäśha atajachicunta jalutacälälila;
¡Chayćhümi allin-camacunäpä atajachicunta pinꞌayman ćhulälälila!
22 “¡Jonatanpa flïchan wañücunäpa yawarninwan maćhacuyculꞌlämi cutimü cala;
Saulpa ispädanpis ćhïnicünincunap wilanwan millachicüśhañam cutimü cala!
23 “Ama-pacha nishá,
cuyaśhá Saulwan Jonatan,
cawsaycäpis wañuycäpis manam japächaycälishulanquichu.
Ancacunäpïpis mas bïbu-camam capäcula.
Liyuncunäpïpis mas callpasapa-camam capäcula.
24 “Israelpa wamla chulincuna Saulpïta awćhupäcuy.
Paymari lïnu fïnupi müdanacunawanlä müdachipäcuśhulanqui;
ürupi aläjacunawanlä ćhulachipäcuśhulanquipis.
25 ¡Sumä-cama allinnincuna imanuypamá pilyućhu palpülälila!
¡Ulꞌuyquicunaćhümi Jonatan wañucun!
26 Irmash Jonatan,
ampïta manañam bïdäpis bïdachu.
Maynu-maynümá apanaculanchic.
Walmicunap cuyacuyninpïtapis mas-maslämi cuyacuyniquiꞌa cacula.
27 ¡Imanuypamá sumä-allincunaca palpülälila!
¡Imanuypatá pilyananpä cä ispädancuna mana caśhanman muyülälila!”
nil.