Juda läducunäpä mandacüninpämi Davidta ćhulan
2
Chaypïtam Tayta Diosta David tapun:
“¿Judapa mayannin malcallanmanpis mandacuyta allaycunäpä lïmanchun?”
nil.
Niptinmi Tayta Dios:
“Aw,
linquimanmi” nin.
Niptinmi:
“Mayannin malcamanmi lïman” nin.
Chaynu niptinmi Tayta Dios:
“Hebron malcaman liy” nin.
2 Chaymi David ishcay walminwan lipäcula:
Jezreel lädu Ahinoamwan,
Nabalpi japanyäśha Carmel lädu Abigailwanpis.a
3 Jinaman lluy nunancunactapis aylluntin-camactam puśhala.
Chaymi Hebron malcaćhu lluy tacsha malcantinćhu-cama yaćhapäcula.
4 Chaypïtam Juda nunacunaca Hebronman lipäcul Davidta chayćhu japächapäcula paycunap mandacünin cananpä.
Chayćhümi Galaad lädućhu cä Jabes malcayu nunacunaca Saulta pampapäcuśhanta David yaćhäla.b
5 Jinaptinmi paycunaman David willacücunacta caćhala cay nil:
“Mandacüniqui Saulta cuyacuywan pampaycälishayquipïta Tayta Dios amcunacta allinpä licaycälishunqui.
6 Cananpïtá Tayta Dios amcunaman cuyacuynintawan chalapacuyninta licaycälichishunqui.
Chaynütacmi chaynu lulaycälishayquipi yaꞌapis allinpä licaycälishayqui.
7 Cananꞌa callpanchaculcay,
ama ćhinaśhyapäcuychu.
Masqui mandacüniqui Saul wañucuptinpis Juda nunacunämi mandacüniquipä japächaycäliman” nin.
Israel läducunämi Juda läducunäwan pilyapäcun
8 Ñatac Abnermi Saulpa chulin Is-bosetta Mahanaim malcaman puśhälun.
Abnerꞌa Nerpa chulin,
Saulpa pilyänincunap puydïninmi cala.
9 Chayćhümi Is-bosetta mandacü cananpä ćhulaycülun:
Galaad,
Gesuri,
Jezreel,
Efrain,
Benjamin malcacunap,
jinaman jinantin Israelpa mandacüninpä.
10 Chay Israel nunacunap mandänin cayta allaycul Is-boset tawa ćhunca (40) watantam liyäla.
Ishcay watam mandänin cala.
Juda nunacunäñatacmi ichá mandacüninpä Davidta licapäcula.
11 Davidmi anćhish wata süta quillayu Juda nunacunäpä mandacünin cala;
Hebron malcapïmari mandacula.
12 Ñatac Mahanaim malcapïtam Nerpa chulin Abner,
Saulpa chulin Is-bosetwan lluy pilyänincunawan Gabaon malcaman liculcan.
13 Davidpa pilyänincunawanñatacmi Hebron malcapïta Sarviap chulin Joab liculcan.
Chaymi ishcaynin parti Gabaon ućhap sircanćhu chimpa-chimpa cacuyalcäla.
14 Chayćhümi Joabta Abner nin:
“Ishcayninchic partipïta müsunchiccuna pilyapäcuchun” nil.
Niptinmi Joab:
“Allinmi” nin.
15 Chaymi Saulpa chulin Is-bosetpa pilyänincunapi ćhunca ishcayniyu (12) Benjamin ayllupi yalapäcula.
Chaynütac ćhunca ishcayniyu (12) Davidpa pilyänincunapïpis yalapäcula.
16 Chayćhümi umanpi-cama chalanacälälil wätanman-cama ispädanta śhatinacälälin.
Chaynüpamari llapanpis wañülälin.
Chaymi chay Gabaonćhu cä sityucta Ispädawan Tucsinacuna Pampac nil śhutichapäcula.
17 Chay muyun pilyuca sumä-sumä cacuptinmi Israel pilyäcunätawan Abnerta Davidpa pilyänincuna llallïla.
18 Chayćhütacmi Sarviap quimsan chulin cayalcäla:
Joab,
Abisai,
Asaelpis.
Ñatac Asael luychunüpis pälip-päliyä calmi,
19 Abnerta mana caćhaycul aticun.
20 Abnerñatacmi ipanta licalcuśhanćhu licälul nin:
“¿¡Manachun Asael cayanqui imatá!?”
nil.
Niptinmi:
“¡Awari,
Asaelmi cayá!”
nin.
21 Chaynu niptinmi Abner:
“Yaꞌacta amaña atiyämaychu.
Aśhwanpa wicniquićhu,
cayniquićhu cä jucnin nunap,
ima uywaśhantapis apacuy” nin.
Niptinpis Asaelꞌa mana uyalïtucuyculmi jinalla aticuyan.
22 Chaymi Abner yapa nicuyan:
“¡Amaña aticaćhamaychu!
Yanꞌalmi wañüchï imacman.
Jinäluptiꞌa ¿wawꞌi-caśhayqui Joabman ima cärawantá ćhäyäman?”
nil.
23 Ñatac Asael aticaćhayta mana caćhaycuptinmi Abner ispädanpa ipanwan tucsïlun.
Jinaptinmi ispädan waśhanpa pasäluptin Asael jinallaćhu juclla wañülun.
Chayninpa pasäcunämi Asael ayacta licälälil śhaycaycapäcü cala.
24 Ñatac Joabwan Abisaiñam Abnerta atiyta allacaycälin.
Chaymi inti jiꞌalpuyta Amma nishan ulꞌüman ćhälälin.
Chay cala Gia malcap chimpanćhu,
Gabaon chunyäcäman lï caminup patanćhümari.
25 Benjamin ayllucunäñatacmi Abnerwan juntunacuycul ulꞌup puntanćhu juc pilyä-yupaylla ćhulanacälälin pilyapäcunanpä.
26 Chayćhümi Joabta Abner ayaycaćhacuyan:
“¿Imay timpupis wañuchinacuyllaćhüchun caśhun?
¿Manachun yaćhanqui caycuna llaquicuyllacta apamuśhanta?
¿Imaycamatá alcayanqui wawꞌi-caśha-pula aticaćhayta manalcachinayquipä?”
nil.
27 Niptinmi Joab nin:
“Tayta Diosta tistïgupä ćhulayculmi limalicú,
mana nimaptiquiꞌa pilyänïcuna wälanancamam wawꞌi-caśhancunacta aticaćhanman cala” nil.
28 Nilcul curnitillacta tucächiptinmi lluy pilyänincuna aticaćhayta śhaycälälila;
jinaman manañam mastá pilyapäculañapischu.
29 Chay tucuy tutam Abnerwan lluy nunancuna Araba pampacta pasälälin.
Chay anyaśh wälañatacmi Jordan mayucta chimpalcul Bitron lädup pasapäcula Mahanaim malcaman ćhäpäcunancama.
30 Chaynütac Joabpis aticaćhayta manalcul-pacha cuticalcämulmi lluy pilyänincunacta juntuycula.
Chayćhu Joab fintaptinmi Asaelpis jinaman ćhunca isunniyu (19) Davidpa pilyänincunapis mana cañächu.
31 Davidpa pilyänincunañatacmi Benjamin ayllupïta cä Abnerpa pilyänincunacta quimsa paćhac süta ćhunca (360) pilyäcunacta wañülächiña.
32 Chaypïtam Asaelta papänin pampaläśhan Belenman pampälälimula.
Joabñatacmi lluy nunancunawan walächi lipäcul Hebron malcaćhu ayllïlälila.