24
Chay Juda lädućhu Joacim mandacuyaptinmi,
Babiloniap mandacünin Nabucodonosor Juda läduman yaycülul llallïla.a
Chaymi paypa maquinćhu quimsa wata capäcula.
Chaypïtam Nabucodonosorpa cuntran śhalcuyta allacaycälin.
2 Tayta Diosñatacmi Joacimta camacaycächinanpä caćhamula:
Caldeo,
Siria,
Moab,
Amon lädu pilyäcunactapis.
Chaynu caćhamula willacünincunawan nichimuśhannu,
Juda läducta pampaman muyuchinanpämari.
3 Chaynu Tayta Dios pasachila Manases lluy juchacunacta lulaśhanpïmari.
Chaymi Juda lädu calućhu cananpä alapacüla.
4 Jerusalenćhu mana juchayu nunacunäta maśhtaypa-maśhtaycüluptin,
yawarllaña unyaśhanpïtamari camacaycächila.
Chaycunapïtamá juchancunacta Tayta Dios mana pampachayculachu.
5 Ñatac Joacimpa mandacuyninćhu lluy lulaśhancuna,
Juda lädu mandacünincunap isquirbisha librunćhümari cayan.
6 Joacim wañucuptinñatacmi awquilluncuna caśhanman pampälälila.
Chayurá paypa pudirnin chulin Joaquinñamá mandacü cala.
7 Chay timpupa Babiloniap mandacüninmi,
Egiptop mayunpïta aśhta Eufrates mayucama maquinćhüña cachila.
Chaymi Egiptop mandacünin nasyunninpi pilyä manaña yalupäculachu.
Juda lädućhu Joaquinmi mandacun
8 Canan má,
Joaquin ćhunca pusäniyub (18) watanta liyalmi mandacuyta allaycula.
Paymi quimsa quilla Jerusalenpïta mandacula.
Mamanñatacmi cala Jerusalen malcayu Elnatanpa chulin Nehusta.
9 Joaquinpis taytan lulaśhannümari Tayta Diospa ñawquin mana allincunallacta lulala.
10 Chay timpu Babiloniap mandacünin Nabucodonosorpa pilyänincunam,
Jerusalen malcaman lilcälil pilyananpä cunćhacaycälin.
11 Chaynu pilyänincuna cunćhalayalcaptinmi,
Babiloniap mandacünin Nabucodonosorpis malcaman ćhämun.
12 Chaymi Juda lädup mandacünin Joaquin,
mamanwan,
nunancunawan,
yanapänincunawan,
pilyänincunap puydïnincunawanpis chay Babiloniap mandacüninta:
“Maquiquićhüñam capäcuśha” nipäcula.
Chaynüpam Babiloniap mandacünin pusä wata mandacuyal Joaquinta prïsu chalälälila.c
13 Chaypïta Tayta Diospa alawana wasinpïtawan palasyupïta lluy ćhaniyücunätam apacula.
Jinaman Tayta Dios willacachimuśhanmannümari,
Israel lädup mandacünin Salomon alawana wasipä aläjacuna lulachishancunactapis lluy paquiy pawäla.
14 Chaypïta Jerusalenćhu lluy yaćhäcunätam prïsu puśhacula:
puydïcunäta,
allinnin pilyänincunacta,
imacunactapis lulay yaćhäcunäta,
jinaman jïrru tacäcunätapis.
Lluy puśhaśhan cäcunaca ćhunca walanga-yupaymi (10,000) capäcula.
Juda lädućhu pasaypi wacchanllantañamari caćhaycüla.
15 Chaynütacmi Jerusalenpïta Babiloniaman prïsu puśhacula:
mandacü Joaquinta,
mamantinta,
walmincunacta,
puydï yanapänincunacta,
nasyunpa allinnin yaćhayniyünincunacta jinaman cäniyünincunätapis.d
16 Chaynütac Babiloniacta mandacüca puśhacula:
lluy pilyäcunactapis anćhish walanga-yupayta (7,000),
imaymana aläja lulayta yaćhäcunätawan jïrru tacäcunätañatac walanga-yupayta (1,000).
17 Chaypïtam Babiloniap mandacünin,
Joaquinpa pudirnin mandacü cananpä tiyun Mataniastaña ćhulälun.
Paypa śhutintañatacmi Sedequias nïman muyüchila.e
Juda lädućhu Sedequiasmi mandacun
18 Chay Sedequias ishcay ćhunca jucniyu (21) watanta liyalmi mandacuyta allaycula.
Paymi ćhunca jucniyu (11) wata Jerusalenpïta mandacula.f
Mamanpa śhutinmi Hamutal cala.
Paymi Libna lädu Jeremiaspa walmi chulin cala.
19 Paypis Joacim lulaśhannümi,
Tayta Diospa ñawquin mana allincunallacta lulala.
20 Chaymi Jerusalen malcapä,
Juda lädupä Tayta Dios sumä piñacülul puntanpïta alapacüla.g
Chaypïtam Babilonia mandacücäpa cuntran Sedequias śhalcula.