Sedequiaspa mandacuynin
52
Sedequias ishcay ćhunca jucniyu (21) watanta liyalmi mandacuyta allaycula.
Paymi ćhunca jucniyu (11) wata Jerusalenpïta mandacula.
Mamanpa śhutinmi Hamutal cala.
Paymi Libna lädu Jeremiaspa walmi chulin cala.
2 Paypis Joacim lulaśhannümi,
Tayta Diospa ñawquin mana allincunacta lulala.
3 Chaymi Jerusalen malcapä,
Juda lädupä Tayta Dios sumä piñacülul puntanpïta alapacüla.
Chaypïtam Sedequias Babilonia mandacücäpa cuntran śhalcula.
4 Isun wataña Sedequias Jerusalenćhu mandacuyaptinmi,
ćhunca quillap ćhunca muyunninćhu Babiloniap mandacünin Nabucodonosor lluy pilyänincunawan Jerusalenta camacaycü lipäcula.a
Jinalmi malcacta cunćhacaycälil murällap lädunman allpacta juntälälin yaycapäcunanpä.
5 Chaynu cunćhalapäcula Sedequias ćhunca jucniyu mandacuśhan watacamam.
6 Chay malca lulićhu micuy wanayca mas-masña cacuyaptinmá tawa quillap isun muyunninpá imacta micapäcunanpäpis manaña calañachu.
7 Chaynu cacuyalcalñam chay malcapb murällanta ućhcülälila.
Jinalculmi chayninpa ayiculcäla masqui Babiloniap pilyänincuna cunćhalayalcaptinpis.
Tutanpamari chay ishcay murällap ćhawpinćhu cä puncup yalulcul mandacücäpa wirtanpa ayiculcäla;
Araba läduman lï caminunnintamari ayiculcäla.
8 Ñatac Caldeo läducunap pilyänincuna mandacü Sedequiasta atipäculmi Jericopa pampanćhu alcansälälin.
Jinaptinmi Sedequiaspa pilyänincunañatac caćhaycul wicta-cayta ayiculcan.
9 Chayćhu Sedequiasta chalalcälilmi Babiloniap mandacüninman pasachiculcäla.
Paymi Hamat lädu Ribla malcaćhu cayäla.
Chayćhümi imanuypa mućhuycachisha cananpäpis niycuśha cala.
10 Chay Ribla malcaćhümi Sedequiaspa ñawquin lluy chulincunactawan Juda lädućhu lluy puydïcunäta mandacüca muꞌuywan wañülächin.
Chaynütacmari Juda lädućhu lluy puydïcunätapis wañülächin.
11 Sedequiastañatacmi ñawinta jululcachil brunsi cadinawan ćhänalcul Babiloniamanc puśhachila.
Chayćhümi wañunancama Sedequias prïsu cala.
Alawana wasictam camacaycun
12 Babiloniap mandacünin Nabucodonosor ćhunca isunniyu (19) wata,
picha quillap ćhunca muyunninćhu mandacü cayaptinmi Jerusalenman ćhälun Nabuzaradan.
Paymi palasyućhu täpäcunäpa puydïnin,
mandacücäpa puydï licaycünin cala.
13 Paymari Tayta Diospa alawana wasinta,
mandacücäpa palasyunta,d
mas allincunäpa jatućha-cama wasincunacta,
jinantin Jerusalenćhu lluy wasicunätapis cañaycülun.
14 Puydïnin Nabuzaradanwan śhapämü jinantin pilyäcunämi Jerusalenpa lluy murällancunacta camacaycülun.
15 Chaynüpam Nabuzaradan Babiloniaman prïsu puśhacula Jerusalen malcaćhu quïdäcunäta,
Babiloniap mandacünin partiman pasacücunäta,
jinaman ima lulay yaćhäcunätapis.
16 Mas wacchannincunactam ichá caćhaycüla üba lantacunäta,
ćhaclacunäta lulapäcunanpä.e
17 Babilonia lädu nunacunämi Tayta Diospa alawana wasinćhu brunsipi cä paradïruncunacta,
brunsipi cä simintuncunacta,
brunsipi yacu ćhulacuncunactapis paquiypa pawälun.
Lluy brunsicunätamari apaculcäla.
18 Chaynütacmi apaculcan ućhpa ćhulacunta,
pälanta,
micha cuchucunta,
tinidurninta,
śhanśha ćhulacunta,
brunsipïta lluy sirbichicunancunactapis.
19 Chaynütacmi pilyäcunap puydïnin Nabuzaradan apacula ürupi illaypi cä insinsiu cañacuncunacta,
tasunnincunacta,
bäsuncunacta,
mancancunacta,
jatun michïructa,
lätuncunacta,
täsancunactapis.
20 Mandacü Salomon,
Tayta Diospa alawana wasinćhu lulachishan brunsipi cä ishcay paradïructa,
istanquicta,
chaypa täcunan ćhunca ishcayniyu (12) wäcactapis lluymari apacula.
Chay brunsicunaca achca-achcamari cacula;
tupuyta manaña atipanam.
21 Paradïrucunämi altunninman pusä mitru-cama cacula;
tita cayninñatacmi picha mitru ćhawpin cala.
Paradïrucunäpa ćhawpin jäcuyämi cala;
janäninñatacmi anćhish cintïmitru brunsipi cacula.
22 Chaypa umanćhu brunsipïta argullancuna,
granadillacunanu cäcämi altunninman ishcay mitru cala.
Chayćhümi brunsipïta campanillacuna adurnäśha cacula.
Chaynu adurnapacüśham ishcay paradïrucunaca capäcula.
23 Chay adurnäśha granadillacunänu cäca,
paćhacmi (100) lluy cala.
Ñatac isun ćhunca sütayu (96) granadillacunänu cäcunällatacmi licaśha cala.f
Juda läducunätam prïsucta puśhacun
24 Má,
caycunactam puśhacula:
puydï sasirdüti Seraiasta,
atimünin puydï sasirdüti Sofoniasta,
jinaman quimsan täpäcunätapis.
25 Chaynütacmi pilyäcunap puydïninta,
mandacücäpa anćhish yanapänincunacta,
pilyanancunapä juntulcachil isquirbï nunacta,
jinaman süta ćhunca (60) nunacunactapis prïsu puśhacun.
26 Lluy paycunactam Nabuzaradan puśhacula Riblaćhu cä Babiloniap mandacüninman.
27 Chaymi Babiloniap mandacünin Hamat lädu Ribla malcaćhu wañüchila.
Chaynüpam Juda lädu nunacunaca juc malcaman prïsu puśhaśha capäcula.
28 Nabucodonosor anćhish wata mandacuyninćhümi,
quimsa walanga ishcay ćhunca quimsayu (3,023) wayapacunacta Juda lädupi prïsu puśhacula.
29 Ćhunca pusäniyu (18) wata mandacuyalmi Jerusalenpïta prïsu puśhala pusä paćhac quimsa ćhunca ishcayniyu (832) nunacunacta.
30 Ishcay ćhunca quimsayu (23) wata Nabucodonosor mandacuyaptinmi puydï Nabuzaradan Juda lädupïta prïsu puśhacula anćhish paćhac tawa ćhunca pichayu (745) nunacunacta.
Chayurá lluy prïsu puśhaśhancunaca tawa walanga süta paćhac (4,600) nunacunam capäcula.
Joaquintam Babiloniap maquinpïta libraycun
31 Juda lädup mandacünin Joaquin quimsa ćhunca anćhishniyu (37) wataña Babiloniap maquinćhu cayaptinmi chay nasyunćhu Evil-merodac mandacuyta allaycula ćhunca ishcayniyu quillaćhu,
ishcay ćhunca pichayu (25) muyunćhu.
Paymi wamä wata mandacuyninćhu Joaquinta carsilcäpi caćhaycächila.
32 Jinalculmi Babiloniaćhu cä juc mandacücunäpïtapis mas allinpä licaycul mas allinninmanlä payta taycaycachila.
33 Chaynüpam Joaquin carsilćhu cä müdanantapis caćhaycul mandacücäwan cuscaña cawsaśhancama micapäcula.
34 Chaynütacmi wañucunancama Joaquinta micunanpä,
müdacunanpä Babiloniap mandacünin muyun-muyun illaywan yanapäla.