Jerusalen malcactam llallin
39
Juda lädućhu mandacü Sedequias isun wata,
ćhunca quilla mandacuyaptinmi Babiloniap mandacünin Nabucodonosor lluy pilyänincunawan Jerusalen malcap cuntran lipäcula.
Ćhayculmi muyülïninman lluy ćhulanacälälila.
2 Ñatac mandacü Sedequias ćhunca jucniyu wata,
tawa quilla,
isun muyun mandacü cayaptinmi pilyäcunaca malcap murällanta ućhcuycälil yaycälälila.
3 Chaypamari Babilonia mandacücäpa puydïnincuna yaycapäcula.
Paycunam cala:
Nergal-sarezer,
Samgar-nebo,
capachicüśhacunäpa puydïnin Sarsequim,
sirbïcunäpa puydïnin Nergal-sarezer,
jinaman juc puydïcunapis.
Paycunamari ćhawpićhu cä puydïnin puncuman ćhulanacälälila.
4 Chayta licälulmi Juda lädup mandacünin Sedequias lluy pilyänincunawan tutanpa ayiculcäla.
Chay ishcay murällap ćhawpinćhu cä puncup yalulculmi mandacücäpa wirtanpa ayiculcäla,
Araba pampa chunyä läduman.
5 Babiloniap pilyänincunañatacmi atipäcul Jerico pampaćhu Sedequiasta alcansälälin.
Chayćhu chalalculmi Babiloniap mandacünin Nabucodonosorman puśhaculcan.
Paymari Hamat lädu Ribla malcaćhu cayäla.
Chayćhümari Sedequiasta cäraycülun.
6 Chay Ribla malcaćhümi Sedequiaspa ñawquin lluy chulincunactawan Juda lädućhu lluy puydïcunäta muꞌuywan lluy wañülächin.
7 Sedequiastañatacmi ñawinta jululcachil brunsi cadinawan ćhänälun Babiloniaman puśhachinanpä.
8 Mandacücäpa palasyuntawan nunacunäpa wasincunactamá Babilonia läducunaca cañaycälälin.
Jerusalenpa murällancunactapis lluymá tunïlälin.
9 Malcaćhu quïdäcunätawan pay läduman pasacücunätamari pilyäcunäpa puydïnin Nabuzaradan Babiloniaman prïsucta puśhacun.
10 Ñatac puydï Nabuzaradan Juda lädućhu caćhaycüla pasaypi mana cäniyu wacchacunällactañamari.
Paycunamanmá ćhaclacunactawan üba lantacunacta uycula.
Nabucodonosormi Jeremiasta ñawillanćhu caycachin
11 Ñatac Babiloniap mandacünin Nabucodonosormi pilyäcunap puydïnin Nabuzaradanta Jeremiaspi nin:
12 “Ñawillayquićhümi Jeremiasta caycachinqui.
Amam imanaycunquipischu.
Aśhwanpamá pay munaśhanmannu licaycunqui” nil.
13 Chaymi pilyäcunäpa puydïnin Nabuzaradan,
capachicüśhacunäpa puydïnin Nabusazban,
sirbïcunäpa puydïnin Nergal-sarezer,
jinaman mandacücäpa juc puydïnincunapis,
14 Jeremiasta julachipämula carsilpa patyunpïta.
Jinalculmi Safanpa willcan,
Ahicampa chulin Gedaliaspa maquinman ćhulaycälälin wasinta puśhacunanpä.
Chaynüpam nunacunäwan cusca Jeremias yaćhala.
Ebed-melecta librananpämi Tayta Dios limalicun
15 Ñatac carsilpa patyunćhu Jeremias wićhalayaptinlämi Tayta Dios payta nin:
16 “Etiope lädu Ebed-melecman lilcul nimuy:
‘Israelpa sumä munayniyu Tayta Diosninmi nin:
Cay malcap mana allinninpä limalicuśhäcunactamá mana llaquipaycullal lulaycuśhä.
Chay pasaśhanta am quiquiquimá licäca canqui.
17 Ñatac chay muyun amta libraycuśhayquimá.
Manchacuśhayqui nunacunap maquinman manamari ćhulaycuśhachu canqui.
Yaꞌa Tayta Diosmari niyá.
18 Ispädawan mana wañunayquipä yaꞌami salbaycuśhayqui.
Jinayaptïpis,
cawsayniyülämari quïdaycälinqui yaꞌaman chalapacamäśhayquipi.
Yaꞌa Tayta Diosmi niyá’ ” nil.