Chaqui püsumanmi Jeremiasta jitalpapäcun
38
Matanpa chulin Sefatias,
Pasurpa chulin Gedalias,
Selemiaspa chulin Jucal,
Malquiaspa chulin Pasurpis uyalïläliña jinantin malcäta Jeremias caynu nishantam:
2 “Tayta Diosmi nin:
‘Cay malcaćhu quïdäcunaca micuypïmi,
gïrrawanmi,
ishyaywanmi wañupäcunꞌa.
Caldeo läducunäman jucllachacücunäñatacmi ichá cawsayniyülä quïdaycälinꞌa yaꞌaman chalapacamäśhanpi.a
3 Rasunpa,
Babilonia mandacücäpa pilyänincunap maquinman cay malcacta ćhulaycuptïmi llallisha capäcunꞌa.
Yaꞌa Tayta Diosmari niyá’ ” nil.
4 Chaynu nishanta uyalïlälilmi chay puydïcunaca mandacücäta nicuyalcan:
“Chay nunacta wañüchishun.
Chaynu limaynincunawanmá pilyäninchiccunacta,
jinantin malcanchicta yanꞌal jucmanyayächin.
Chay nunaca manamá malcanchicpä allinnintachu ashiycun,
sinuꞌa mana allinnintamá” nil.
5 Niptinmi mandacü Sedequias nin:
“Chay nunaca,
amcunap maquiquićhüñamá cayan.
Masqui yaꞌa mandacüca cayalpis amcunap cuntrayquiꞌa manamá ima lulaytapis atipämanchu” nil.
6 Chaynu niptinmi chay puydïcunaca Jeremiasta chalalcul mandacücäpa chulin Malquiaspa püsunman watuwan jitalpaycälälila.
Chay püsu carsilpa patyunćhu mana yacuyümi cayäla.
Chaymi Jeremias ñiꞌicäman siniala.
7 Ñatac Etiope lädu Ebed-melec capäśha nuna mandacücäpa yanapäninmi cala.
Paymi püsuman Jeremias jitalpüśha caśhanta yaćhäña.
Ñatac mandacüca Benjamin Puncu nishanćhümi juntunacuyćhu cayalcäla.
8 Chayćhümi Ebed-melec palasyupïta yalulcul mandacücäta willaycula:
9 “Mandacü taytallay,
willacü Jeremiasta püsuman jitalpapäcuśhanwan nunacta wañuchishannüñamari mana allinta lulälälin.
Chayćhu micuypïtamá wañülunꞌa;
cay malcaćhu manañamá tantapis canñachu” nil.
10 Niptinmi mandacüca nin:
“Willacü Jeremias manalä wañuśhancama quimsa ćhunca (30) umricunacta puśhaculcul püsupïta julamuy” nil.
11 Niptinmi achca umricunacta puśhaculcul mandacücäpa palasyunman yaycula.
Chay illaycuna ćhulana cuartup ulapayninmanmari Ebed-melec yaycula.
Chaypïta mawca müdanacunacta apacalcälilmi watuwan cuscacta Jeremias caśhan püsuman caćhalpapäcula.
12 Jinalculmi Ebed-melec nin:
“Jeremias,
chay watuca mana nanachishunayquipäri licla chucuyquiman chay lataśhcunäta ćhulacuy” nil.
Chay nishantanüllamari Jeremias lulaycula.
13 Chaynüpa püsupïta watucunawan Jeremiasta julälälimuptinmi carsilpa patyunćhüña cala.
Mandacü Sedequiasmi Jeremiasta ayachin
14 Chaypïtam mandacü Sedequias willacü Jeremiasta ayachimula alawana wasip quimsa cä puncunman.
Chayćhümi Jeremiasta nin:
“Canan tapuycuptïmi imam cäcällacta niycamanqui” nil.
15 Niptinmi Jeremias:
“Rasuncällacta willaycuptí wañüchimanquimanmá.
Allin limapayta limapaycuptïpis manamá uyaliycamanquimanchu” nin.
16 Niptinmi mandacü Sedequias pacallap Jeremiasman limalicula:
“Cawsayta umäninchic Tayta Diosta tistïgupä ćhulayculmi limalicú mana wañuchinacpä,
jinaman chay wañuchiyta munaśhüniqui nunacunäpa maquinmanpis mana ćhulaycunacpä” nil.
17 Niptinmi Jeremias nin:
“Israelpa sumä munayniyu Tayta Diosninmi nin:
‘Babilonia mandacücäpa puydïnincunap maquinman ćhulaculꞌa ampis aylluyquicunapis cawsapäcunquimá.
Cay malcapis manamá cañaycuśhachu canꞌa.
18 Pay puydïcunap maquinman mana ćhulacuptiquiñatacmi ichá cay malca Caldeo lädup maquinman ćhulaycuśha canꞌa.
Chaymi paycuna cañaycüluptin ayiyta manaña atipanquiñachu’ ” nil.
19 Niptinmi mandacü Sedequias nin:
“Juda läducunaca Caldeo läducunäman pasaculcäśhanpi rasunpa manchacümi.
Paycuna Caldeo läducunäpa maquinman ćhulaycälälimaptin ñacachipämanꞌaćh” nil.
20 Niptinmi Jeremias nin:
“Paycunap maquinman manamá ćhulaycälishunquichu.
Tayta Diospa nimäśhan willaycuśhäcäta uyalicuptiquiꞌa allinmi yaluycuśhunqui;
cawsayniquitapis salbaycunquimá.
21 Paycunap maquinman mana ćhulacuptiquiñatacmi ichá Tayta Dios tantiaycachiman caynu:
22 Juda lädu mandacücäpa palasyunćhu cä lluy walmicunaca Babilonia mandacücäpa puydïnincunap maquinmanmi ćhulaycüśha capäcunꞌa.
Jinaptinmi chay walmicunaca nipäcunꞌa:
“ ‘Allin apanacuśhayquicunämi
ipanchalcul llallïshunqui.
Ñiꞌicäman sinialuptiquim jitälälishunqui’ ” nil.
23 Chaynütacmi Jeremias masta nin:
“Lluy walmicunäwan chuliquicunamá Caldeo läducunap maquinman ćhulaycuśha capäcunꞌa.
Am mandacücäpis manañamá ayinquichu;
Babilonia mandacücäpa maquinman palpuptiquim malcayquipis cañaycüśhaña canꞌa” nil.
24 Niptinmi mandacü Sedequias nin:
“Jeremias,
wañuyta mana munalꞌa cay limaśhanchicpïta ama mayanpis yaćhachunchu.
25 Cay limaśhanchicpïta puydïcunaca yaćhälul ichapis tapupäcuśhunqui:
‘Mandacücäwan imam limaśhallayquita nipämaptiquiꞌa manam wañuchipäcuśhayquichu.
¿Imactam mandacücäta nilanqui?
¿Pay imactam nishulanqui?’
nil.
26 Chaynu nishuptiqui:
‘Mandacücäta mañacuyälá Jonatanpa wasinman manaña cutiycachimänanpämi;
chayćhu manaña wañunäpämari’ nilmi ninqui” nil.
27 Chay nishannüllamari puydïcunaca Jeremiasta tapü lipäcula.
Jeremiasñatacmi mandacüca yaćhachishantanülla niycula.
Chaymi imactapis manaña mastá nipäculañachu.
Mandacücäwan limapäcuśhanca manamá mayanpapis uyalishachu cala.
28 Chaynüpamari carsilćhu Jeremias quïdacula Jerusalen malca llallïsha canancama.b