Jerusalentam pampaman muyuchin
25
Chayurá isun wataña Sedequias Jerusalenćhu mandacuyaptinmi,a
ćhunca quillap ćhunca muyunninćhu Babiloniap mandacünin Nabucodonosor,
lluy pilyänincunawan Jerusalenta camacaycü lipäcula.
Jinalmi malcacta cunćhacaycälil,
murällap lädunman allpacta muntunälälin yaycapäcunanpä.
2 Chaynu cunćhalapäcula Sedequias ćhunca jucniyu mandacuśhan watacamam.
3 Ñatac chay malca lulićhu micuy wanayca mas-masña cacuyaptinmá tawa quillap isun muyunninpá imacta micapäcunanpäpis manaña calañachu.
4 Babilonia läducunaca murällacta tuniyculmi nurti lädup yaycälälila.
Jinaptinmi Israel lädup pilyänincuna pilacta aśhaycälil tutanpa ayiculcäla.
Awari,
chay mandacüca,
Araba läduman lï caminunnintamari ayiculcäla.
5 Babilonia lädu pilyäcunäñatacmi aticulcal Jericopa pampanćhu alcansälälin.
Jinaptinmi Sedequiaspa nunancunañatac caćhaycul wicta-cayta ayiculcan.
6 Chayćhu Sedequiasta chalalcälilmi Babiloniap mandacüninman pasachiculcäla.
Chay Sedequias Ribla malcäćhu cayalmari cäraycuśha cala.
7 Chayćhu Sedequias licayaptinmi lluy chulincunacta muꞌulälin.
Paytañatacmi ñawincunacta jululcul brunsi cadinawan ćhänalcul Babiloniacta puśhacula.b
Juda läducunätam prïsu puśhacun
8 Canan má,
Babiloniap mandacünin Nabucodonosor ćhunca isunniyu (19) wata,
picha quillap anćhish muyunninćhu mandacü cayaptinmi Jerusalenman ćhälun Nabuzaradan.
Paymi palasyućhu täpäcunäpa puydïnin,
jinaman mandacücäpa puydï licaycünin cala.
9 Paymari ćhaycul Tayta Diospa alawana wasinta,c
mandacücäpa palasyunta,
mas allincunäpa jatućhä-cama wasincunacta,
jinantin Jerusalenćhu lluy wasicunätapis cañaycülun.
10 Puydïnin Nabuzaradanwan śhapämü pilyäcunämi,
Jerusalenpa lluy murällancunacta camacaycülun.
11 Chaynüpam Nabuzaradan Babiloniaman prïsu puśhacula Jerusalen malcaćhu quïdäcunäta,
Babiloniap mandacünin partiman pasacücunäta,
jinaman ima lulay yaćhäcunätapis.
12 Mas wacchannincunactañatacmi ichá caćhaycüla üba lantacunäta,
ćhaclacunäta lulapäcunanpä. d
13 Chaynu Babilonia läducunämi Tayta Diospa alawana wasinćhu brunsipi cä paradïruncunacta,e
brunsipi cä simintuncunacta,f
brunsipi yacu ćhulacuncunactapis paquiypa pawälun.
Lluy brunsicunätañatacmari apaculcäla.
14 Chaynütacmi apaculcäla ućhpa ćhulacunta,
pälanta,
micha cuchucuncunacta,
tinidurninta,
śhanśha ćhulacunta,
brunsipïta lluy sirbichicunancunactapis.g
15 Jinaman ürupi,
illaypi cä insinsiu cañacuncunacta,
tasunnincunactapis puydïca apaculamari.
16 Chay Tayta Diospa alawana wasinćhu Salomon lulachishan brunsipïta cä ishcay paradïrucunaca,
täcunanca,
istanqui cäcunäpis tupuyta mana atipänam cacula.
17 Ñatac paradïrucunaca pusä mitru-camam capäcula.
Chaypa umanćhu argullancuna brunsipïta cäcämi altunninman mitru ćhawpin cala.
Chaypa muyülïninćhu awäśha mällanümi cala.
Chayćhu brunsipïta granadillacunawan adurnäśham calapis.
Chaynu adurnapacüśham ishcay paradïrucunaca capäcula.
18 Má,
caycunactam puśhacula:
puydï sasirdüti Seraiasta,
atimünin puydï sasirdüti Sofoniasta,
jinaman quimsan täpäcunätapis.
19 Chaynütacmi pilyäcunap puydïninta,
mandacücäpa picha yanapänincunacta,
pilyanancunapä juntuycul isquirbï nunacta,
jinaman süta ćhunca (60) nunacunactapis prïsu puśhacula.
20 Lluy paycunactam Nabuzaradan puśhacula Riblaćhu cä Babiloniap mandacüninman.
21 Chaymi Babiloniap mandacünin wañüchila,
Hamat lädu Ribla malcaćhu.
Chaynüpamari Juda lädu nunacunaca juc malcaman prïsu puśhaśha capäcula.
Juda lädu puchücunämi Egiptoman ayicun
22 Chay Juda lädućhu puchücunäta mandananpämi Babiloniap mandacünin Nabucodonosor ćhulaycula Gedaliasta.
Paymi Ahicampa chulin,
Safanpa willcan cala.
23 Chaynu Gedalias mandacüpä ćhulaycuśha caśhanta pilyäcunap puydï-masincuna yaćhälälilmi,
lipäcula tincuycü Mizpa malcäman.
Paycuna capäcula:
Netaniaspa chulin Ismael,
Careap chulin Johanan,
Netofa lädu Tanhumetpa chulin Seraias,
Maaca lädup chulin Jaazaniaspis.
Lluy paycunamari nunancunawan lipäcula.
24 Paycunactam lluy nunantinman Gedalias limalicula:
“Babilonia läducunäta ama manchaculcaychu.
Cay Babiloniap mandacüninta sirbishtin quïdaculcaptiquiꞌa,
allinmi chayćhüpis capäcunqui” nil.
25 Ñatac anćhish quillaćhümi Juda lädup mandacünincunap milaynin Ismael,
ćhunca nunacunawan lilcälil Gedaliasta wañülächin.
Cay Ismaelꞌa Netaniaspa chulin,
Elisamap willcanmi cala.
Jinaman paywan cä Juda läducunäta,
jinaman Caldeo nunacunätapis Mizpaćhümari wañülächila.
26 Jinäluptinmi Caldeo läducunäta manchacuypi Egipto nasyunman jinantin malcaca lluy pilyänincunap puydïnincunawan ayiculcäla.h
Babiloniap maquinpïtam Joaquinta libraycun
27 Canan má,
Juda lädup mandacünin Joaquin quimsa ćhunca anćhishniyu (37) wataña Babiloniap maquinćhu cayaptinmi,
chay nasyunćhu Evil-merodac mandacuyta allaycula,
ćhunca ishcayniyu (12) quillaćhu,
ishcay ćhunca anćhishniyu (27) muyuncäćhu.
Paymari wamä wata mandacuyninćhu Joaquinta carsilcäpi caćhaycächila.
28 Jinalculmi Babiloniaćhu cä juc mandacücunäpïtapis mas allinpä licaycul mas allinmanlä payta taycaycachila.
29 Chaynüpam Joaquin carsilćhu cä müdanantapis caćhaycul,
mandacücäwan cuscaña cawsaśhancama micapäcula.
30 Chaynütacmi wañucunancama Joaquinta micunanpä,
müdacunanpä mandacüca muyun-muyun yanapäla.