Babiloniacta camacaycünanpämi willacun
51
Tayta Diosmi nin:
“Babiloniap cuntranmi,
Babilonia nunacunäpa cuntranmari
sumä-sumä waywactanu śhalcachishä.
2 Juc nasyuncunactamá Babiloniap cuntran caćhamuśhä.
Imapis mana canancamamá trïgucta
waywachïcänu nunacunäta wicapälälinꞌa.
Chay mana allin muyunćhu intirun
lädupïmá camacaycülunꞌa.
3 Flïcha ćhächïnincuna ćhächicuncunacta
ćhächinanpäpis manañamá timpu canꞌañachu;
chalicu-yupaynincunacta ćhulaculcänanpäpis
timpu manamá canꞌañachu.
Sumä-cama pilyä müsuncunapis manañamá salbaculcanꞌachu.
Lluy-lluy pilyänincunamá camacaycüśha canꞌa.
4 Jinantin Caldeo läducunap cällincunaćhu
lansawan tucsiy pawäśhamá maśhtalapäcunꞌa.
5 Masqui yaꞌa Tayta Diospa puntäćhu Israel,
Juda läducunaca malcancunacta juchawan
juntayalcächiptinpis Israelpa sumä munayniyu
yaꞌa Chuya Tayta Diosnin manalämá caćhaycüchu.
6 “¡Babiloniapïta ayipäcuy!
¡Juchayquicunapi
camacaycüśha mana capäcunayquipä ayiculcay!
Yaꞌa Tayta Dios cutichicuná muyunca ćhämunñamá;
tincüninman-cama uycuná timpuca ćhämunñamá.a
7 Yaꞌa Tayta Diospa maquïćhu
ürupi bäsumá Babilonia cala.
Jinantin allpäćhu cäcunätamá shincächila;
nasyuncunaca chaypi upyapäculmi lücutaculcäla.b
8 Ñatac Babilonia juclla
cućhpälulmi pasaypi amshülun.c
Ichaläpis allinyanman;
paypïta waꞌapäcuy.
Nanayninpä balsamu jampicta apapämuy.
9 Waquin malcacuna Babiloniacta jampiyta
ćhapapäculpis manamá allinyachipäculachu.
Chaymi nipäcula:
‘Caćhaycüśhunña.
Malcanchicta-camaña cuticuśhun.
Paycuna mućhuchisha cananca pucutaycäcamañamá ćhälun,
sïlucämañamá ishpïlun.d
10 Tayta Diosmá yaꞌacunaman
śhalculcul paycunacta tincüninman uycülun.
Acuchun,
Sionman lilcul willaycamuśhun
Tayta Diosninchic lulaycuśhanta’ nil.
11 “Media nishan nasyunpa mandacünincuna flïchayquicunacta afilapäcuy;
atajachicuyquicunacta allichaculcay.
Babiloniactamá camacaycälälinqui.
Tayta Diospa alawana wasinta jalutacuśhanpïmá
Tayta Dios tincüninman cutichicülunꞌa.
12 Babiloniap murällanta camacaycälälinayquipä bandiracta śhalcachipäcuy.
Täpä pilyäcunacta masïsucta ćhulaycäliy;
muyülïninćhu licäcunacta ćhulaycäliy.
Juclla camacaycälälinayquipä pacaculcay.
Babiloniap cuntran camachishätamá
yaꞌa Tayta Dios lulaycuśhä.
13 Am Babilonia,
achca-achca yacup patanćhu
yaćhäcuna,e
sumä cäniyü-cama cäcuna,
camacayniqui timpu ćhämunñamá;
pampaman muyunayqui timpu janayquićhüñamá cayan.
14 Sumä munayniyu yaꞌa Tayta Diosmi cawsaynïta śhaycaycachil limalicú:
Paćhcaśhcunäwannümi ćhïnicüniquicunawan intuchishayqui.
Paycunamá llallilcul cushicuypïta apalipäcunꞌa” nil.
Tayta Diostam alawan
15 Cay allpäta Tayta Diosmi sumä munayninwan lulala.
Sumä yaćhayninwanmi jinantin pachäta tacyaycachila.
Sumä tantiayninwanmi sïlütapis maśhtaycula.
16 Pay sumä-sumä limalcuptinmá sïlüćhu yacucunäpis bululunyapäcun;
paymá allpäpa sapinpi pucutaycunäta pallalcachin.
Paymá tamyachimul räyucunätapis ćhächimun.
Paymá waywätapis wićhaläśhanpïta caćhaycämun.f
17 Lluy nunacunaca pasaypi mana yaćhayniyu,
tullu uma-camamá.
Chay lulaśhan taytachacunaca mana cawsayniyu,
mana bälï caśhanpïta
taytacha luläcunaca uyshulapäcunmi.
18 Chay imapäpis mana bälïcunamá,
asipäcunallamá.
Cäraycunan muyuncäćhuꞌa camacaycüśhamá capäcunꞌa.
19 Ñatac Jacobpa Tayta Diosninꞌa manamá chaynüchu.
Payꞌa lluy imactapis Lulaycücämá.
Israel ayllupis paypa aclacuśhancämá.
Paypa “Sumä Munayniyu Tayta Diosmá” śhutinpis.
Babilonia nasyunwanmi Tayta Dios mućhuycachin
20 Tayta Diosmi nin:
“Am Babiloniam mayantapis
camacaycunäpä mäsú,g
pilyapä armá canqui.
Amwanmá nasyuncunactapis pampaman muyüchishä;
amwanmá mandacücunactapis camacaycüśhä.
21 Amwanmá cawalluncunactawan
sillacüśha cänintintapis chincächishä.
Amwanmá carritacunactapis
manijänintinta-cama camacaycüśhä.
22 Amwanmá wayapacunätawan walmicunätapis,
awquishcunätawan müsucunätapis,
walaśhcunätawan wamlacunätapis camacaycüśhä.
23 Amwanmá michïcunätawan uwishnintinta,
äräcunätawan yundantinta,
mandacücunätawan puydïnintinta camacaycüśhä.
Babilonia nasyunta mućhuycachinanpämi willacun
24 “Babilonia nunacunäta,
Caldeo nunacunäta,
malcäta Jerusalenćhu mana allincunacta lulaśhanpïmari
tincüninman uycuśhä.
Yaꞌa Tayta Diosmi niyá.
25 Yaꞌa Tayta Diosmari ní:
nasyuncunäta cućhpachï ulꞌu,
jinantin allpäta camacaycüśhayquipïmá
ampa cuntrayqui cayá.
Anmanmi maquïta ćhulaycuśhayqui
ulꞌucunäpi cućhpamunayquipä.
Pasaypi cañäśha ulꞌumanmari muyüchishayqui.
26 Wiña-wiñaypä camacaycüśhamá canqui.
Chaymi ampïta mas allin puydï chalänin
lumictapis manaña apapäcunꞌachu;
nï wasipä simintunpäpis lumicta apapäcunꞌañachu.
Yaꞌa Tayta Diosmari niyá.
27 “Nasyuncunäćhu bandiracta aywipäcuy.
Nasyuncuna alistaculcänanpä curnitillacunacta tucapäcuy.
Babiloniap cuntran pilyäcuna śhalcapäcuy.
Paypa cuntran Ararat,
Mini,
Askenaz lädućhu cä malcacuna jucllachanaculcay.
Pilyaćhu mandananpä juc puydïta ćhulaycuy.
Cawallucunaman sillacüśha cäcunaca
timpuypa-timpul paćhcaśhnu camacaycü yaycapäcuchun.
28 Babiloniap cuntran lluy nasyuncunäta,
Media lädup mandacünincunacta,
puydïnincunacta,
licaycünincunacta alistapäcuy.
Maquinćhu cä lluy nasyuncunäta alistapäcuy” nil.
29 Tayta Dios lulananpä caśhanca lulacacuptinmá
cay allpäpis chucchuyta,
śhaśhayta allacuycun.
Pasaypi chunyäman Babilonia muyüchisha
cananpämá Tayta Dios camachila.
30 Babiloniap alli-cama pilyänincuna
callpan mana captinñamá nï pilyapäcunñachu;
pacacuna cäcämanñamá śhaticacälälin;
walmicunänüñamá licalïlälin.
Wasincunapis cañaycüśhamá cayan;
malcanpa puncu wićhacuncunapis paquïshañamá cayan.
31 Jinantin nasyunnin llallïshaña
caśhanta willaycü atinacuyllamá
willacücunaca pinquiylla-pinquiyalcan.
Babiloniap mandacüninman willaycümari cürriyalcan.
32 Mayup bäduncunacta duyñuchacaycälinñamá.
Śhuꞌuśh-śhuꞌuśh cäcunäpis cañaycüśhañamá cayan.
Pilyäcunäpis chucchuyllaman camäśhañamá cayalcan.
33 “Israelpa sumä munayniyu yaꞌa Tayta Diosninmi ní:
Jaluchina timpućhu cä ïränümá Babilonia cayan.
Cusichana timpuca jananćhüñamá cacuyan.
34 “Jerusalenmi nin:
‘Babiloniap mandacünin
Nabucodonosormi lacsacalpaman;
jinanllan mancactanümi mana imayüta caćhaycäman.
Lamarćhu cä jatućhaćha manchanaśh cawsäcämari millpacalpaman.
Lluy allinnïcunawan maćhacuyculmari paycuna ätüman.
35 Sion nunacunämi nipäcun:
Yaꞌacta ñacachipämäśhancunapïta
Babiloniapis ñacachisha cachun.
Jerusalenmi nin:
Yaꞌacta wañuchipämäśhannu
quiquincunapis wañuchisha cachun’ ” nil.
36 Niptinmi Tayta Dios nin:
“Yaꞌami tincüniquiman licaycuśhayqui;
ampïta yaꞌami cutichicüśhä.
Lamarnintamá chaquïchishä;
pucyuncunapis chaquïshamá licalinꞌa.
37 Babilonia juntüśha amunümá quïdanꞌa;
manañamá mayanpis yaćhanꞌachu.
Atücuna yaćhanallanmanñamá licalinꞌa.
Lluypapis jamuyänan,
asipänanmanmá muyunꞌa.
38 Babilonia läducunaca liyuncunanümá apalcaćhapäcunꞌa.
Uña liyuncunanümá awćhupäcunꞌa.
39 Sumä calintüraćhu cacuyalcaptin
yaꞌami cumbiducta lulaycapul shincächishä.
Jinaptïmi imanuy caśhantapis manaña tantiapäcunꞌañachu.
Manaña lichcapaculmá imaycamapis puñuculcanꞌa.
Yaꞌa Tayta Diosmi niyá.
40 Wañuchisha cananpä malta uwishcunactanu,
cumbacunactanu,
capishcunactanümi wañuyman apachishä.
Babilonia llallïsha cananpämi willacun
41 “Sumä allin Babiloniam llallïsha licalïlun.
Jinantin allpäpa alawäśhan Babiloniamari palpülun.
Lluy nasyun licäcunämá äśhalayllaman camälälin.
42 Babiloniap cuntranmá lamarca ishpïmun;
sumä yacu mächicacamuśhancämá ñitïlun.
43 Malcancunam pasaypi chunyäman,
ima-aycapis mana canan chaqui allpaman muyülun;
jinaman mayanpis mana yaćhananman,
pipis mana pulinanmanmari licalïlun.
44 “Babiloniap taytachan Bel nishanta mućhuycachishämá.
Lacsaśhanta shiminpïmá julüśhä.
Manañamá pï nasyunpis alawaycunꞌachu.
Babiloniap murällan pampamanñamá muyunꞌa.
45 “Am,
aclacuśhá nunäcuna
chay malcapïta yalapäcuy.
Sumä walayä piñacuynïpïta ayipäcuy.h
46 Jinantin nasyuncunaćhu
limaycuna captin ama jucmanyapäcuychu
nï manchaculcaychu.
Watan-watanmá juc willacuycuna licalimunꞌa,
ñacaycuna cananpä,
mandacü-pulacuna pilyananpä.
47 Chayurá Babiloniap taytachancunacta
camacaycünäpä muyunca jiꞌacaycayämunñamá.
Jinantin nasyunninmá pinꞌayćhu licalinꞌa;
wañüśha ayancunapis jinantin malcanćhümá maśhtalapäcunꞌa.
48 Nurti lädupïmá camacaycünin śhayämun.
Babilonia pampaman muyüchisha caśhanpi
cay allpäpis sïlüpis cushicuypïta taquipäcunꞌamari.i
Yaꞌa Tayta Diosmi niyá.
49 Israel läducunäta wañuchishanpïtamá Babilonia camacaycüśha canꞌa.
Jinantin allpäćhu nunacunäta wañuchishanpïtamá
pampaman muyuchisha canꞌa.j
Babiloniaćhu cä Israel läducunäpämi willacun
50 “Gïrrapi am lluptïcunaca
mana śhaycaycälilñari juclla ayiculcay.
Calu malcaćhu cayalcal Tayta Diosta yalpapäcuy;
Jerusalenta ama unꞌapäcuychu.
51 Amcuna nipäcunqui:
‘Palapämäśhanpïmi pinꞌaculcá.
Tayta Diospa alawana wasinpa chuyanninman
juc caśhtacuna yaycuśhanpïmá pinꞌacuypïta
cäräta mayman śhatiytapis mana atipapäcüchu’ nil.
52 “Chaymi yaꞌa Tayta Dios ní:
Babiloniap
taytachancunacta camacaycuná muyunca jiꞌacaycayämunñamá.
Jinantin malcanćhümá dañäducüśha cäcunaca awćhupäcunꞌa.
53 Masqui Babilonia sïlücama ishpiptinpis,
atajachicü pilancuna altu-altu captinpis,
chaycamamá camacaycüta caćhaśhä.
Yaꞌa Tayta Diosmari niyá.
Babilonia pampaman muyuchisha cananpämi willacun
54 “Babiloniaćhu ayaycaćhapäcuśhanta uyalinchicmá.
Caldeo lädućhu sumä-sumä camacaycüśhanta uyalinchicmá.
55 Babiloniacta Tayta Diosmá camacaycülun;
anchap äśhaycaćhayninta pampamanmá muyüchin.
Lamarpa sumä suynaynintanümá
ćhïnicünincunap apaliyninta uyalinchic.
56 Camacaycüca Babiloniap cuntranmá śhacayämun.
Sumä-cama pilyänincuna prïsu chaläśhamá capäcunꞌa;
flïcha ćhächicuncuna camacaycüśhamá canꞌa.
Tayta Diosꞌa tincüninman-camamari lluyta uycun.
57 Yaꞌami Babiloniap mandacünincunacta,
puydïnincunacta,
yaćhänincunacta,
pilyäcunäpa puydïnincunactapis shincächishä.
Imaypis mana licaćhacüñam wiña-wiñaypä puñunꞌa.
Sumä munayniyu Tayta Diosmari niyá” nil.
58 Sumä munayniyu Tayta Diosmi nin:
“Babiloniap sumä anchu-cama murällancuna
mana cämanmá muyunꞌa.
Altu-cama puncuncunapis ninap lluy lupäśhamá canꞌa.
Malcacunaca yanꞌal-yanꞌalmá lulapäcula;
nasyuncunaca nina lupanallanpämá
wañuy-wañuy lulapäcula” nil.
Jeremias willacuśhantam Babiloniaman ćhächipäcun
59-60 Chaynu Babiloniaman ima ñacaycuna ćhämunantapis utapi cä pitwiläcämanmá Jeremias isquirbiycula.
Chay nasyunman mana allin ćhänancunämi chayćhu isquirbisha cala.
Willacü Jeremiasmari Juda lädućhu Sedequias tawa wataña mandacü cayaptin juc willacuyta Seraiasman willachila.
(Pay cala Neriaspa chulin,
Maasiaspa willcanmi.
Mandacü Sedequias Babiloniaman liptinmari puydï yanapäninnu Seraias liwshila).
61 Jeremiasmari Seraiasta caynu nin:
“Babiloniaman ćhälulmi cay willacuycünäta lluy lïgiycunqui.
62 Jinaman ninqui:
‘Tayta Diosllay,
anmi niyanqui,
cay läducta camacaycünayquipä.
Chayćhu ima nunallapis nï uywallapis wiña-wiñaypä mana canancamamá camacaycülunqui’ nil.
63 Chay isquirbïsha cäcunäta lïgiyta camacalculmi lumicta wataycul Eufrates mayup ćhawpinman jitalpuycülunqui.
64 Jinalculmi ninqui:
‘Caynümi Babilonia jiꞌacalpunꞌa.
Tayta Dios mućhuchicuy caćhamuśhanwanmi cućhpälul manaña mastá śhalcunꞌañachu’ ” nil.k
Chaynüpamá Jeremiaspa willacuynincuna camacan.