Babilonia nasyunpa cuntranmi willacun
50
Babiloniaa nasyunpa,
Caldeo lädup cuntranmi willacünin Jeremiasta Tayta Dios nin:
2 “Nasyuncunäta willamuy.
Tantiachinanpä bandiracta pallalcul niycamuy.
Lluypapis yaćhaśhañamá cayan;
manaña pacaycul caynu niy:
‘Babilonia nasyun,
llallïsham canꞌa;
taytachan Bel pinꞌayćhümá licalinꞌa.
Taytachan Marduc pasaypi camacaycüśhamá muyülunꞌa.
Lluy labräśha taytachancuna pampaman muyüchishamá canꞌa’ nil.b
3 Juc nasyunmi nurti lädupi Babiloniap cuntran śhacayämun.
Caldeo lädu malcacunätamá pasaypi pampaman muyüchishacta caćhaycülunꞌa.
Nunacunapis uywacunapis manañamá canꞌañachu.
Lluy-lluyñamá ayiculcanꞌa,
chincaculcanꞌa.
4 “Chay timpu,
chay muyun
ćhämuptinmi Israel,
Juda läducunaca waꞌaśhtin
yaꞌa Tayta Diosta ashimäní śhapämunꞌa.
Yaꞌa Tayta Diosmari niyá.
5 Sion läduman lï caminup liyalcalmi ninaculcanꞌa:
‘Acuchun Tayta Diosta cäsucunanchicpä limalicamü lishun.
Chay limalicuy wiña-wiñaypä manam unꞌaycuśhachu canꞌa’ nil.
6 “Uwish jitäśhanümi malcá cala.c
Michïnincunamá caminucunäćhu pantälälichin;
ulꞌucunäćhu pintïshacta caćhaycälälin.
Ulꞌun-ulꞌun puliyalcalmari
canćhancunactapis unꞌälälinña.
7 Talïlulmi ćhïnicünincuna lacsacalpälila:
‘Yaꞌanchic manamá juchayüchu canchic.
Paycunamá tincüllanman
uycü Tayta Diospa cuntran,
awquilluncuna
chalapaculcäśhanpa cuntran lulapäcuśhanpi juchayüca’ nil.
8 “Babiloniapid ayiculcayꞌari.
Caldeo läducunäpi yalapäcuy.
Uwishcunäpa ñawpäninta puntanninta lï capishcunänu puntapäcuy.
9 Sumä munayniyü-cama nurti lädu nasyuncunätam
juntuycuyá Babiloniacta camacaycünanpä.
Nurti lädupïmá paycunacta camacaycü śhapämunꞌa;
nurti lädupïmá llallïsha capäcunꞌa.
Paycunap flïchancuna sumä yaćhaśha pilyänümá cayalcan;
jinanllá manamá cutipämunchu.
10 Caldeo lädu lluy waycäśhamá canꞌa;
waycänincuna aminancamamá apaculcanꞌa.
Yaꞌa Tayta Diosmari niyá.
11 “Am Caldeo läducuna,
tücäní malcäta pampaman
muyulcälichil cushiculcälanquimá,
asiculcälanquimá.
Malta wäcacunanümá pastucunäćhu
paćhcaycaćhapäculanqui;
wira cawallucunänümá wijijij-yapäculanqui.
12 Cananñatacmi ichá nasyunniqui pinꞌayćhu canꞌa;
näsishayquita licä malcayqui uyshulächishamá quïdanꞌa.
Juc nasyuncunapïtapis mas piyurninlämá licalinꞌa.
Pasaypi chaqui pulumäśhamanmá muyunꞌa.
13 Yaꞌa Tayta Dios piñacülulmá
chay läducta mana nunayütaña caćhaycüśhä;
pasaypi pulumäśhactaña licalïchishä.
Chay Babilonia lädunpa lluy pasäcunämá äśhalayllaman camapäcunꞌa;
chaynu luläśhäta licapäculmá asipapäcunꞌa.
14 “Am,
flïcha ćhächïcuna flïcha ćhächicuyquitari alistaculcay.
Mana llaquipaycul flïchayquiwan Babiloniap
muyülïninman ćhulanacaycälil camacaycäläliy.
Yaꞌa Tayta Diospa cunträmá mana allinta lulälälin.
15 Paycunap muyülïninman
ćhulanacaycälil apalcaćhapäcuy.
¡Babilonia llallïshañamá cayan!
¡Sumä türrincunapis palpülunñamá!
¡Sumä pilancunapis pampaman muyüchishañamá cayan!
Juccunawan pay lulaśhantanu paycunawanpis luläläliy.
Caymari Tayta Diospa cutichicuśhanca cayan.
16 Babiloniaćhu sumä-sumä pilyay cacuyaptinmá
juc lädu caśhtacunaca malcanta cuticulcanꞌa;
nasyunnintin-cama ayiculcanꞌa.e
Chayurá Babiloniaćhu talpücunäta camacaycüluy;
cusichaćhu lutücunäta pampaman muyüchiy.
17 “Liyuncuna pintïchiptin chiꞌisha
uwishcunanümá israelcunaca cayan.
“Puntallactá Asiria lädup mandacüninmi camacaycülun.
Chaypïta Babiloniap mandacünin Nabucodonosorꞌa
tulluncunactapis amshülunmá.
18 Chaymi Israelpa sumä munayniyu Tayta Diosnin ní:
Maynümi Asiria lädup mandacüninta mućhuycachilá,
chaynümi Babiloniap mandacüninta,
malcantinta mućhuycachishä.
19 Israelta allpanman cutichimuptïmá Carmelo ulꞌućhu,
Basan lädućhu micapäcunꞌa.
Efrainpa,
Galaadpa ulꞌuncunaćhümá maćhaycapäcunꞌa.
20 Chay timpućhu Israelpa mana allin lulayninta ashipäculpis,
Juda lädup juchanta ashipäculpis manamá talipäcunꞌañachu.
Cawsayniyu quïdäcunäta yaꞌa pampachaycuptïmari
ima juchactapis nï talipäcunꞌañachu.
Yaꞌa Tayta Diosmari niyá” nil.
21 Tayta Diosmi nin:
“Merataim läduman pilyä yaycapäcuy;
Pecod ayllu cäcunäman yaycapäcuy.
Wañülächiy;
pampaman
muyuchinayquicama camacaycäläliy.
Imam yaꞌa nishätanülla lulaycäliy.
22 Gïrrap suynaynintamá jinantin nasyunćhu uyaliyanchic;
sumä manchanaśh camacaycuytamá uyaliyanchic.
23 Martillunuf juccunacta amshü
Babiloniamá cananꞌa sumä
amshuypa pawäśha cayan.
Lluy nasyuncunap jamuyänanmanmá licalïlun.
24 Yaꞌami trampacta ćhulälac;
manaläpis tantiaculmá chayman am Babilonia jiꞌacalpunqui.
Yaꞌa Tayta Diospa cuntrá śhalcuśhayquipïmá
chalachicülunqui,
ćhänachicülunqui.
25 Yaꞌa Tayta Diosmi pilyanapä cä ćhulacuśhäcunacta quićhaycülú;
sumä piñacuynïwan camacaycünäpä
armäcunactamá julamuśhä.
Sumä munayniyu yaꞌa Tayta Diosmari
Caldeo läducunäćhu caynu lulaycuśhä.
26 Jinantin allpäpi Babiloniap cuntran śhapämuy.
Micuy pilwancunacta quićhapäcuy.
Juntuycul,
muntunaycul camacaycäläliy.
Pampaman muyüchiy,
jucllayllapis mana puchuycunanpä.
27 Lluy nubillucunacta wañuchipäcuy.
Wañuchinapä cäcäman apapäcuy.
Ay,
imanuylä capäcunꞌa,
mućhuchinan muyunninmá ćhämun;
mućhuchinan timpu janäninćhüñamá.
28 “Babiloniapi ayïpämü nunacuna,
Sionćhu nishanta uyalipäcuy;
yaꞌa imanuypa cutichicuśhäta,
paycuna willaculcäśhanta uyalipäcuy:
‘Tayta Diospa alawana wasinta pampaman
muyuchishanpïtamá Babilonia
läducunäta camacaycülun’ nil.
29 “Flïcha ćhächï nunacunacta juntupäcuy.
Babiloniap cuntran yaycunanpä juntupäcuy.
Muyülïninman ćhulanaculcay.
Jucllayllapis ama ayichunchu.
Lulayninman-cama uycäläliy;g
juccunacta lulaśhanmannu paycunawanpis lulaycäliy.
Paycuna Israelpa Chuya Tayta Diosninpa
cuntranmá śhalcülälila.
30 Chaymi caminucunäćhu müsuncuna
wañülälisha maśhtalapäcunꞌa.
Chay muyunmi lluy pilyänincuna camacaycüśha capäcunꞌa.
Yaꞌa Tayta Diosmari niyá.
31 “Nunatucüśha malca,
ampa cuntrayquimá yaꞌa cayá.
Mućhuchisha canayqui muyunca,
timpuca ćhämunñamá.
Sumä munayniyu Tayta Diosmi niyá.
32 Puydïtucüśha malcaca saytacaculculmá cućhpälunꞌa.
Manañamá mayanpis śhalcachïnin canꞌachu.
Malcanmanñatacmi ninacta lataycächishä;
jinantin muyulïnincunactamá cañaycüśhä” nil.
33 Sumä munayniyu Tayta Diosmi nin:
“Israel lädu,
Juda lädu nunacunaca
anchap ñacachisham cayalcan.
Ćhïnicünincuna prïsu chalacaycälil
caćhaycuyta manamá munapäcunchu.
34 Yaꞌañatacmi sumä munayniyu libraycüca cayá.
Śhutïpis sumä munayniyu Tayta Diosmá.
Yaꞌami juluycüniqui caśhä;
nasyunniquiman jawca cawsaytamá apaycamuśhä.
Babilonia läducunämanñatacmi ichá ñacayta apamuśhä.
35 “Caldeo läducunap cuntran pilyapämuy.
Babilonia nasyunpa cuntran lipäcuy.
Puydïnincunap,
yaćhänincunap cuntran pilyapämuy.
Yaꞌa Tayta Diosmari niyá.
36 Lucluyänancama willacüpa pasachicücunäpa cuntran pilyapämuy.
Chucchupäcunancama alli-cama pilyäcunäpa cuntran pilyapämuy.
37 Cawalluncunap,
carritancunap cuntran pilyapämuy.
Chayćhu cä lluy pilyänincuna walminu
capäcunancama camacaycüluy.
Cänincuna waycäśha canancama pilyapämuy.
38 Mayuncunapis lluy chaquïchun.
Chaynu canꞌa millachicuy taytachacunalla Babiloniaćhu cayaptinmá;
imaymana taytachacunawan shipuchicüśha cayaptinmá.
39 “Chaymi Babiloniaćhu munti uywacunallaña,
atücunallaña,h
tucucunallaña yaćhapäcunꞌa.
Manañamá mayanpis yaćhapäcunꞌañachu;
pasaypi jitäśhañamá pulumanꞌa.
40 Maynümi Sodoma,
Gomorra,
jinaman muyülïninćhu cä
malcacunäpis camacaycüśha cala,
i
chaynümá camacaycüśha canꞌa.
Chayćhu manañamá mayanpis yaćhanꞌañachu;
nï jamapacunallapäpis canꞌañachu.j
Yaꞌa Tayta Diosmari niyá.
41 “Licapäcuy,
nurti lädupïmi pilyäcuna śhacayämun.
Cay allpap manyancunapïmi sumä munayniyu nasyun,
achca mandacücuna śhalcämun.
42 Flïchancunawan,
lansancunawanmi śhacayalcämun.
Mana llaquipayniyu juyu-camamá caculcällan.
Cawalluncunaman sillacälälisha śhapämuptin
lamarcäpa suynayninnümá suynaynin.
Babilonia nunacuna,
juc nunanüllamá cuntrayqui śhacayalcämun.
43 Cayta Babiloniap mandacünin
uyalïluptinmi maquincunapis mana callpayüña licalïlun.
Llaquicuywan ñitichicülulmi waćhacuywan
ñacä walminu licalïlun.k
44 “Jordan mayu patan muntipïta tuqui pastucunaćhu,
alli-cama uywacuna caśhancäman liyun yalamücänümi
Babilonia lädu nunacunäta chay allpanpïta,
juclla yaꞌa manchächishä.
Jinalculmi aclaśhäcäta paycunacta
mandananpä ćhulaycuśhä.
Yaꞌanuꞌa ¿mayanmá canman?
¿Mayanmá imallactapis niycamanman?
¿Mayan michïtá cuntrá śhalcunman?
45 “Chayurá Babiloniap cuntran,
Caldeo läducunap cuntran
yaꞌa Tayta Dios camachishäta uyalipäcuy.
Tacsha uywancunapis camacaycüśhamá capäcunꞌa;
uywanpa micunan pastuncunapis pampaman muyüchishamá canꞌa.
46 Babilonia lädup palpuynin sumä-sumä captinmá allpäpis śhaśhanꞌa.
Apalcaćhaynincunapis lluy nasyuncunäćhümi uyalisha canꞌa” nil.