Amon lädup cuntranmi willacun
49
Amona läducunäpïmi Tayta Dios nin:
“¿Israel,
mana chuliyüchun cayan imamá?
¿Mana milayniyüchun cayan imatá?
¿Imapïtá Amon lädup taytachan Milcom,
Gad ayllup allpanta duyñuchacuycun?
¿Imapïmá taytacha Milcomta alawäcunaca,
Gad ayllup malcancunaćhu yaćhayalcan?
2 Yaꞌa Tayta Diosmi ní:
Amon lädup Raba malcan gïrraćhu
apalcaćhaśhanta uyalinapä timpu śhacayämunñamari.
Raba malca pampaman muyüchishamá licalïlunꞌa;
lluy malcancunapis cañaycüśhamá quïdanꞌa.
Chayćhümi lluy waycaśhancunäta
israelcunaca waycapäcunꞌa.
3 “Hai nishan malca pampaman muyüchisha
caśhanpïta Hesbon lädu nunacuna apalcaćhapäcuy.
Raba lädu walmicuna,
waꞌapäcuy,
llaquicuypi
shicacü müdanacunawan ćhulaculcay,
awćhupäcuy,
murällap muyülïnincunaćhu cürricaćhapäcuy.
Taytachayqui Milcomtamari sasirdütincunactawan,
puydïnincunactawan cuscacta juc nasyunman prïsu puśhaculcan.
4 Amon läducuna,
¿imapïmá allin pampayquicunapi,
chay sumä allin pampayquicunapïpis alawacuyanqui?
Cullu linlicuna,
¿imapïmá cäniquicunaman chalapacüśha:
‘Mayanmá yaꞌapa cuntrá śhalcunman’ niyanquilä canpis?
5 Ñatac Israelpa sumä munayniyu Tayta Diosninmi ní:
Amcunacta manchacuycämi
mayćhüñapis aticaćhapäcuśhunqui.
Chay malcayquipi alapacüśhamá capäcunqui.
Chay ayïcunäta cutichimü manañamá
mayanpis canꞌañachu.
6 Chaypïtañam Amon läducunäta
prïsu puśhaśha caśhanpïta cutichimuśhä.
Yaꞌa Tayta Diosmi niyá” nil.
Edom lädup cuntranmi willacun
7 Edomb lädupïtam sumä munayniyu Tayta Dios nin:
“¿Manañachun Teman malcaćhu yaćhayca cayanlä imamá?
¿Allin tantiayniyünincuna limapayta manañachun atipapäcun imatá?
¿Allin yaćhaynin chincacunñachun imatá?
8 Esaupa milaynincunacta mućhuycachil pasaypicta
camacaycuná timpu ćhämunñamari.
Chayurá Dedan malcaćhu yaćhäcuna ayiculcay,
ipaman cutipäcuy;
allpap lulinman pacacalcämuy.
9 Üba palläcunäpis,
¿manachun juccuna pallapacunanpä caćhaycälin imatá?
Tutanpa suwa yaycämul
¿manachun atipäśhallanta apaculcan imatá?
10 Ñatac Esauta calallactam yaꞌa caćhaycüśhä.
Pacacunanpä cäcunätapis camalayäta
caćhaycüluptïmari mayman pacacunanpäpis nï canꞌañachu.
Milaynincuna,
aylluncuna,
lisinacuśhancuna lluy camacaycüśhañamá capäcunꞌa;
manañamari mayanpis canꞌañachu.
11 Manañamá mayanpis ninꞌañachu:
‘Mana mamayu-taytayu quïdäcunäta yaꞌami ñawilläćhu caycachishä.
Japanyäśha quïda walmicunätapis yaꞌami yanapaycuśhä’ ” nil.
12 Tayta Diosmi nin:
“¿Am,
ayinquichun imamá?
Manamari.
Aśhwanpa mućhuycachinäpä cä ćhacćhayä cüpapïtamá upyanqui.
Chayurá mućhuchicuypi am manamari ayinquichu;
ampis chay ćhacćhayä bäsupïta upyanquimá.
13 Yaꞌa Tayta Diosmi quiquïta śhaycaycachil limalicú:
Bosra lädu manchacuyllaćhu,
lluy pulumäśha,
chunyäśha,
jamuyäśha,
mana allinpä licaśhamá canꞌa.
Malcancunapis wiña-wiñaypä pasaypi camacaycüśhamari canꞌa.
14 “Willacüninwan Tayta Dios willacachimula,
nasyuncunäman willaycunäpämi:
‘Edom lädup cuntran juntunaculcay.
Paycunawan pilyapäcunayquipä alistaculcay’ nil.
15 “Lluy nasyuncunapïtapis mana cäpa
licaśhanninmanmi muyuycachishayqui.
Lluy nunacunapa pinꞌayninmanmi ćhulaycüśhayqui.
16 Am,
sumä wancacunäpa ućhcuncunaćhülä yaćhäcuna,
altunnin ulꞌucunäćhülä cäcuna:
śhunꞌuyquićhu allintucuyniquiwan,
nunatucuyniquiwanmi ingañachiculanqui.
Masqui ancacunänu mas altunninćhülä
ishñachacuptiquipis,
chaypïmi palpachimuśhayqui.
Yaꞌa Tayta Diosmari niyá.
17 “Pasaypi manchanaśhmanmi Edom licalïlunꞌa.
Chayninpa lluy pasäcunäpis licapayllamanmi camapäcunꞌa;
camacaycüśha caśhanpïmari lluypis asipäculcanꞌa.
18 Maynümi Sodoma,
Gomorra,
jinaman muyülïninćhu cä malcacunäpis camacaycüśha cala,
chaynümá camacaycüśha canꞌa.c
Chayćhu manañamari mayanpis yaćhanꞌañachu,
nï jamayllapis jamapäcunꞌañachu.
19 “Jordan mayu patan muntipïta tuqui
pastucunaćhu,
alli-cama uywacuna caśhancäman
liyun yalamücänümi,
Edom lädu nunacunäta
chay allpanpïta,
juclla yaꞌa manchächishä.
Jinalculmi aclaśhäcäta paycunacta mandananpä ćhulaycuśhä.
¿Mayanmá imallactapis niycamanman?
Yaꞌanuꞌa ¿mayanmá canman?
¿Mayan uwish michïmá cuntrá śhalcunman?
20 “Chayurá Edom lädup cuntran,
Teman malcap cuntran yaꞌa Tayta Dios camachishäta uyalipäcuy.
Tacsha chulichancunapis
prïsu apaśhamá capäcunꞌa;
wasincunapis pampaman muyüchishamá canꞌa.
21 Edom lädup palpuynin sumä-sumä
captinmá allpäpis śhaśhanꞌa.
Apalcaćhaynincunapis Puca Lamarcäcamari uyalisha canꞌa.d
22 Má,
maynümi ancaca altuman pälilcul laplantapis
quićhapacüśhalä juclla jiꞌalpamun,
chaynümari ćhïnicünin Bosra malcap cuntran ćhämunꞌa.
Chay muyunmi Edom lädu alli-cama nunacunäpa
śhunꞌunpis waćhacuywan ñacä walmip śhunꞌunnu canꞌa” nil.
Damasco malcap cuntranmi willacun
23 Damascoe malcap cuntranmi Tayta Dios caynu nin:
“Mana allin willacuytamá Hamat malca,
Arfad malca uyalïlälin.
Chaymi manchacuypïta imanaytapis mana atipapäcunchu.
Lamarcänümá jawcayayta nï atipapäcunchu.
24 Damascoćhu yaćhäcunaca mana callpayüña
licalïlälilmá ayiyta allaycälin.
Ñatac waćhacü walmictanümi manchacuyca,
llaquicuyca ñiticalpun.
25 ¿Imapïmá unꞌäśhaña canꞌa alawäśha malcaca,
cushichimäní sumä lisisha malcaca?
26 Chay muyunmari müsuncuna läsacunäćhu wañüśha maśhtalapäcunꞌa;
pilyä nunancunapis lluymá wañupäcunꞌa.
Sumä munayniyu yaꞌa Tayta Diosmi niyá.
27 Damasco malcap murällancunacta
yaꞌa Tayta Diosmá cañaycüśhä;
mandacü Ben-adadpa palasyuncuna lupälunꞌamá” nil.
Cedar lädup, Hazor malcap cuntranmi willacun
28 Babiloniap mandacünin Nabucodonosormi chunyäcäćhu cä Cedar läductawan Hazor lädup mandacünincunacta camacaycülun.
Chay nunacunäpämi Tayta Dios nin:
“Cedar lädup cuntran liy,
inti yalamunan lädućhu cä pilyäcunäta camacaycüluy.
29 Carpancunacta apaculcanꞌamá;
uywancunacta aticulcanꞌamá.
Curtïnancunacta,
sirbichicunanpä ima cänincunactapis,
aśhta camïllu uywancunactapis apaculcanꞌamari.
Nunacunämi apalcaćhapäcunꞌa:
‘Jinantin lädućhu manchacuyllamá cacuyan’ nil.f
30 Yaꞌa Tayta Diosmi ní:
Hazorćhu yaćhäcuna,
calu-calucta ayiculcay,
allpäpa śhunꞌunman pacacalcämuy.
Babiloniap mandacünin Nabucodonosormá
amcunap cuntrayqui śhalcülun,
amcunap cuntrayquimá limanacuyalcan.
31 “Yaꞌa Tayta Diosmi ní:
Chay jawcalla,
chalapacüśha cä nasyunta camacaycälälimuy.
Puncunpis,
wićhacuncunapis manamá canchu.
Paycunap läduncunaćhu
manamá ima malcallapis canchu.
32 Yaꞌa Tayta Diosmi ní:
Camïllu uywancunactamá aticulcanꞌa;
lluy uywancunactamari apaculcanꞌa.
Umanta siplay-siplayta lutucücunätamá
wicman-cayman lluy chiꞌichishä.
Cay allpap camacaynincamamá chiꞌichishä.
May lädupïñapis mana allinnintamá paycunaman ćhächimuśhä.
33 Hazor malca wiña-wiñaypämá pulumäśha quïdanꞌa;
atücunap pacacunallanñamari cacunꞌa.
Chayćhu manañamá mayanpis yaćhapäcunꞌañachu;
chayćhu manañamá jamapayllapis jamapäcunꞌañachu” nil.
Elam lädup cuntranmi willacun
34 Juda läducta Sedequias mandacuyta allaycuśhan timpum willacünin Jeremiasman Elam lädupïta Tayta Dios nin:
35 “Sumä munayniyu Tayta Diosmi ní:
“Elam lädup flïcha ćhächicuntamá paquïshä.
Sumä chalapacuśhan flïcha ćhächicuntamari paquïshä.
36 Cay allpap tawan lädupïtamá
Elampa cuntran waywactanüpis ćhächimuśhä.
Tawan lädumantacmari lluy chiꞌichishä.
Ayïcunaca may nasyunćhüñapis manamá faltaycunꞌachu.
37 Yaꞌa Tayta Diosmi ní:
Ćhïnicünincunap
ñawpäninćhümi Elam läducunäta chucchuchishä.
Wañuchiyta munänincunap puntanćhümá manchächishä.
Sumä piñacuynïtamá paycunaman ćhächishä;
sumä ñacaytamari paycunaman uycuśhä.
Camacäśha capäcunancamamá gïrracta caćhamuśhä.
38 Yaꞌa Tayta Diosmi ní:
Elam lädumanmi
mandacunäpä dispächüta ćhulaycuśhä.
Elam lädup mandacünintawan
puydïnincunacta camacaycüśhämá.
39 Yaꞌa Tayta Diosmi ní:
Śhamü timpucunäćhüñatacmi ichá Elam lädu
prïsu puśhaśha cäcunäta yaꞌa cutichimuśhä” nil.