Judah Ŋunu Jehoahaz
36
Ŋga Ŋunu Josiah na ku kre, Judah leele pre na sɛ u biblɔ Jehoahaz yii mu pan mu tɛɛ jɔɔn kre na Jerusalem na, a wra u lɛ krɔ li. 2 Jehoahaz na li yɛlɛ fulo na taarɛ a pra chin mna u tɛɛ jɔɔn kre na, a wra tni jɔɔn kre na nyiɛpɔ taarɛ Jerusalem na. 3 Egypt ŋunu Neco na pan mna u kɔ jɔɔn kre na mna u yii mu sɛ, mna tia Judah leele naa tɔɔ toni na u kaan jaŋga na. Praa toni swafiŋge kradnɛ kagbenyi kɔɔnashin na lafɛɛ kunɔ, na swanyiɛ kradnɛ fuloe taarɛ na kɛmbɔkunɔ na u kaan. 4 A Egypt ŋunu wre na Jehoahaz lɛ pɔ Eliakim yii mu tɛɛ Judah, na Jerusalem ŋunumu na, mna u mɛɛ chinɛ mna u ŋga Jehoiakim, mna Jehoahaz yii mna sɛ na u ni Egypt tra nu.Jehoiakim Judah Ŋunumu Li
5 Ŋga wra Jehoiakim tɛɛ ŋunumu na kre, na u li yɛlɛ fulo na kunɔ, a wra tni Jerusalem na mna jɔɔn kre li yɛlɛ kɛmbɔnunu. U nsra chichie pe o Tafun Nyiɛkpɔɔ wre yiɛ. 6 U nyjila Babylon ŋunu Nebuchadnezzar na pan mna wi na u ni, mna swafre sɛɛrɛ le u na mna sɛ na u ni Babylon tra nu. 7 Nebuchadnezzar na o Tafun Suminyuŋgo wa keshian yirɛ yire koli mna sɛ tɛɛ u ŋunu katoo Babylon na. 8 Jehoiakim kee nyjɛ wra pe u ŋunumu nyjila kre, afuŋgo, na kefuɛn nyjɛ wra pe kro, pe yi nyunɔ mu le Israel na Judah ŋulo fakee hlɛ nu. Ŋga kra pan ma kre, a u biblɔ Jehoiachin na u krɔ li mna jɔɔn kre li.
Judah Ŋunu Jehoiachin
9 Ŋga Jehoiachin na jɔɔn li kre, na we pe yɛlɛ kɛmbɔkɔɔnatarɛ mna tni Jerusalem na nyiɛpɔ taarɛ na ble kɛ, jɔɔn kre na. U nsra chichie pe o Tafun Nyiɛkpɔɔ wre yiɛ. 10 Dabrasisaa nyjila, Ŋunu Nebuchadnezzar na tia pra pan mna u yii, mna ndru mu Suminyuŋgo wa keshian yirɛ yire wru mu ya u na, mna sɛ na u ni Babylon na. A Nebuchadnezzar na Jehoiachin lɛɛlɛ pre ŋmba praa yeeri Zedekiah wre wɔ mna tɛɛ Judah na Jerusalem ŋunu.
Zedekiah Na Ŋunumu Li Judah Na Jerusalem Na
11 Ŋga pra Zedekiah tɛɛ ŋunu kre, na u li yɛlɛ fulo na nunu, a wra tni Jerusalem na mna jɔɔn kre li yɛlɛ kɛmbɔnunu. 12 Wra sisaa pe o Tafun Nyiɛkpɔɔ wre yiɛ. U nsra uyɛ nyjii mna Nyiɛkpɔɔ keenyanyofun Jeremiah ŋga. 13 Babylon ŋunu Nebuchadnezzar na tia Zedekiah na da mna u ŋga jaŋga na Nyiɛkpɔɔ mɛɛ ni na we kpra li. Zedekiah na je mna ndikana pe, u nsra ndru mu pan Israel leele Nyiɛkpɔɔ wre pan. 14 Judah leele pre, na srawɔfɛɛnlɛ mblɛ na lɛ pe loplombo pre kro na ayɛte, pra taa waŋgrɛ yire afunyi kee nyjɛ praa pini yire kro, mna o Tafun Nyiɛkpɔɔ wre Suminyuŋgo ŋga wra pe cheche Jerusalem na kre tɔ nɛɛrɛ ni.
Jerusalem Na Ja
15 Pe tolɛɛlɛ Nyiɛkpɔɔ wre na yire u bitumblɔ na, mna pe jaari gbee tataara, ŋgi na hin? U leele pre fooro naa wa u na, a u Suminyuŋgo kre la naa wa u na. 16 La, leele pre naa bitumblɔ pre pini na tɛɛ, pe nsra u kee yire le mu nya, a praa u keenyanyofɛɛnlɛ pre tɛɛlɛ, pra pe tɛɛlɛ mna sɛ su na Nyiɛkpɔɔ krɔ na kun na u leele pre ni kpɔɔ, a yaka nsra ja mbe u krɔ nyiŋge.
17 O Tafun Nyiɛkpɔɔ wre na tia Babylon ŋunu wre na pan mna wi na Jerusalem leele pre ni. Ŋunu wre na pe yirifumblɔ mblɛ kɛɛ brɔfiɛn yiɛshiin na nyi Suminyuŋgo wa pre gbo, u nsra nyanyjɛble, ndee bichable, ndee yɛkɔɔn, ndee blɛlɔɔ fooro chin. Nyiɛkpɔɔ na pe kro wru mna le ŋunu Nebuchadnezzar kɛɛ. 18 A wra yirɛ nyjɛ yira wa Nyiɛkpɔɔ Suminyuŋgo wa yire kro koli, yi kpɔɛ, na yi bɛɛlɛ kro, yire na keshiɛn yirɛ nyjɛ yiraa wa wa, na ŋunu keshian yirɛ, na u loplombo pre yirɛ titi nyjɛ mu chin ŋga kro, wra yi koli mu sɛ Babylon tra nu. 19 Pra kanhun le Nyiɛkpɔɔ Suminyuŋgo kre na, mna Jerusalem mboo kre juari, mna ŋunu katoo kre sro putuu, mna keshian yirɛ nyjɛ yiraa wa wa kro kla.
20 Leele mblɛ pra kro, a pe nsra pe gbo kre, ŋunu wre na pe yii mu sɛ Babylon na, a pra sɛ pe wre na u biile tinlɛ, mna sɛ su na Persia waŋgra kre na jaŋga ta. 21 Judah tra kre na sni waara ma yɛlɛ fuloe taarɛ na kɛ, kra tia tra kre na wuu, imi na o Tafun Nyiɛkpɔɔ na yire u keenyanyofun Jeremiah na mna ki yo kre.
22 Yɛlɛ ŋga na Persia ŋunu Cyrus na ŋunumu li kre, kre nyjila kre, na Babylon tra wa u kɛɛ, a imi kie pe mbe o Tafun Nyiɛkpɔɔ kee ŋga wra yire Jeremiah na mna yo kre pe kpra kre, Nyiɛkpɔɔ na tia Ŋunu Cyrus na kee ka kpali mu tro tra ŋga kro nu, a pra ki nyunɔ mu tɛɛ mbo, 23 “Kee ŋga Persia ŋunu Cyrus yuu yi kre, ‘O Tafun Nyiɛkpɔɔ ŋmba uu wa nyjeeri wre tra kro le ni kɛɛ, a u ni wɔ mbe ni Suminyuŋgo sin u pan Jerusalem na Judah tra nu. Kena Nyiɛkpɔɔ leele mblɛ pee wa o nu mna, na chaa mbe ndruu sɛ Judah tra nu kre, Nyiɛkpɔɔ we ya e na, mbe e jaa sɛ.’”