24
Ŋga Ŋunu Jehoiakim na jɔɔn li kre, Babylon ŋunu Nebuchadnezzar na pan mna Judah tra kre tɔ, ki tia Jehoiakim na sɛ le Nebuchadnezzar jaara yɛlɛ nununu taarɛ. La, wra ndru mna u jawala chinɛ mna yiri mu Nebuchadnezzar taan. 2 Kre nyjila kre o Tafun Nyiɛkpɔɔ na tia wifɛɛnlɛ na yiri Babylon, na Syria, na Moab, na Ammon leele nu mna pan mu wi na Jehoiakim ni. Wra tia pra Judah tra kre kla, imi na wre Nyiɛkpɔɔ na yire u keenyanyofɛɛnlɛ pre na mna ki yo kre. 3 Kpra na, yire kee nyjɛ na Judah leele pre nya, imi na Nyiɛkpɔɔ na ki yo na we pe ni mbe flo u yiɛ, sisam kee nyini nyini nyjɛ Manasseh na pe yire ndra na, 4 wre wra leele gbo finfin, mna leele mblɛ pe nsra sisaa pe nyimi tɛɛ mna Jerusalem tɔ, a o Tafun Nyiɛkpɔɔ nsraa chaa mbe u hakɛ ti mbe u kɛ. 5 Kee nyjɛ Jehoiakim na pe u ŋunumu nyjila kre, na kee nyjɛ wra pe yire kro, pra yi nyunɔ mna le hlɛ ŋga nu pra Judah ŋulo fakee nyunɔ mu le kre nu. 6 Jehoiakim na ku, a u biblɔ Jehoiachin na u krɔ li, mna ŋunumu li. 7 Ŋunu Nebuchadnezzar na wi na Egypt ŋunu Neco ni, mna u tra kre shɔ mna yire Egypt nyjeeri haa, mna sɛ su Euphrates lɔɔ kre na. Ki tia Egypt ŋunu Neco nsra ja mbe yili mbe sɛ Judah tɔ na.Judah Ŋunu Jehoiachin
8 Jehoiachin na li yɛlɛ kɛmbɔkɔɔnatarɛ a pra u tɛɛ jɔɔn na. A wra jɔɔn li mu tni Jerusalem na nyiɛpɔ taarɛ. U lo mɛɛ naa Nehushta, Elnathan bichlɔ na wi, a wra yiri Jerusalem na. 9 Jehoiachin na sisaa pe o Tafun Nyiɛkpɔɔ yiɛ, imi na u lɛ na pe kre chɔɔ.
10 Kre nyjila kre Ŋunu Nebuchadnezzar loplombo na yiri mna pan mu Jerusalem fɛ mu kun. 11 Kre nyjila kre chɔɔ Ŋunu Nebuchadnezzar titi na pan wa, na u loplombo pre wa mu Jerusalem fɛ mu kun. 12 A Judah ŋunu Jehoiachin, na u lo, na u loplombo, na u sumifɛɛnlɛ kro na sɛ kosie kan Nebuchadnezzar yiɛ. Ŋga Nebuchadnezzar na ŋunumu li kre, ki yɛlɛ kɔɔnatarɛ wo na, kre wra Jehoiachin yii mna sɛ le nyuŋgo. 13 Imi na o Tafun Nyiɛkpɔɔ na ki yo kre, Nebuchadnezzar na sɛ yirɛ titi yirɛ nyjɛ yiraa wa Suminyuŋgo wa yire, na ŋunu katoo wa kro, yire na Ŋunu Solomon yirɛ nyjɛ wra pe na swanyiɛ ni mu tɛɛ o Tafun Nyiɛkpɔɔ Suminyuŋgo wa yire kro wra yi koli mu ya. 14 Mna Jerusalem loplombo pre, na ŋunɔwifɛɛnlɛ, na kɛ nyu tnumu tunfɛɛnlɛ pre yii mna sɛ na pe ni. Pe kro naa leele kagbenyi kɛ. Tra kre shianfɛɛnlɛ chiin pra kro Judah na. 15 Nebuchadnezzar na Ŋunu Jehoiachin yii mna sɛ na u ni Babylon tra nu. Wra ŋunu wre lo, na u chiɛlɛ, na u loplombo, na leele titie mblɛ praa wa tra kre nu kro yii mu sɛ. 16 Babylon ŋunu wre na ŋunɔwifɛɛnlɛ mblɛ nu faŋga nyi mbe pe jaa wi kagbenyi kɔɔnashin yii mna sɛ na pe ni Babylon na. Mna kɛnyu tnumutunfɛɛnlɛ, na tutumblɔ kagbeŋge nunu yii mna ya. 17 A wra Jehoiachin nalɔ Mattaniah yii mna u pe ŋunu, a wra tni Jehoiachin titɛɛ, a wra u mɛɛ tɛɛ Zedekiah.
Zedekiah Na Judah Ŋunumu Li
18 Zedekiah na li yɛlɛ fulo na nunu, a wra u tɛɛ jɔɔn na, a wra tni Jerusalem na yɛlɛ kɛmbɔnunu jɔɔn kre na. U lo mɛɛ naa Hamutal, Jeremiah bichlɔ na wi, a wra yiri Libnah na. 19 Wra sisaa pe o Tafun Nyiɛkpɔɔ yiɛ, imi na Jehoiakim na pe kre. 20 Nyiɛkpɔɔ krɔ ŋga kra kun kre kra tia yire kee nyjɛ krɛrɛ na pan Jerusalem, na Judah tra nu, a kra tia wra pe ni mu flo u yiɛ.
Kraa wa wa a Zedekiah na yiri mna Babylon ŋunu wre taan.