Jerusalem To
25
Ŋga Zedekiah na li yɛlɛ kɔɔnanyjirɛ jɔɔn na kre, ki nyiɛpɔ kɛ wo kre ble kɛ na, Babylon ŋunu Nebuchadnezzar na u ŋunɔwifɛɛnlɛ kro wru mna pan mu Jerusalem tɔ. Pra sɛ chia kre fɛ mu mu kun, mna yirɛ koli mu gbun ki mboo na, mbe nduu mbe le chia kre na. 2 Pra chia kre fɛ mu kun mna sɛ su yɛlɛ kɛmbɔnunu wo ŋga Zedekiah na li jɔɔn na kre nu. 3 Ki nyiɛpɔ jijirɛwo kre nu, ki ble kɔɔnanyjirɛ na, na klo ŋga ki to chia kre na kre nyu wɛɛri mu tro. Sro nsraa wa haka mbe ndro ta mbe li. 4 Babylon wifɛɛnlɛ pre na mboo kre lawee ka ja, a kra tia Jerusalem ŋunu wre, na ŋunɔwifɛɛnlɛ pre na lawee ta mna fɛ blee mu yili. Lawee ŋga nu pra yili kre na mbra ŋunu kagbla kre na, a pra yɔ mu tro Babylon wifɛɛnlɛ mblɛ pra pe fɛ mu kun pre nu, mna yiɛ le Jordan Lɔɔ kre landɛɛ nu. 5 Ŋga kra pan ma kre, Babylon ŋunɔwifɛɛnlɛ pre na yiri mna pe kɔŋgɔ ni, mna sɛ Ŋunu Zedekiah da Jericho tra mbrɛrɛ kre nu. U ŋunɔwifɛɛnlɛ pre na laa u na, mna fɛ mu u ti, 6 a pra u yii mna sɛ Babylon ŋunu ŋga Riblah na, a pra u kala li mna u gbun pimi ni. 7 Pra Zedekiah bibilɛ gbo u yiɛ na, mna wre titi nyiɛlɛ foli, mna swafre jlɔnyi tɛɛ mna u pɔ, mna sɛ na u ni Babylon na.8 Ŋga Babylon ŋunu Nebuchadnezzar na li jɔɔn na yɛlɛ kɛmbɔkɔɔnanyjirɛ kre, nyiɛpɔ kunɔ wo kre ble kɔɔnashin na, kre ŋunu shiefɛɛnlɛ pre lopom Nebuzaradan ŋmba wraa ŋunu kaan jawala wre, na ŋunu lopom wa, na sɛ Jerusalem na. 9 Nebuzaradan wre na sɛ kanhun le o Tafun Nyiɛkpɔɔ Suminyuŋgo kre na, kre na ŋunu katoo kre, na chia kre kalonyi yire kro na, mna yi sro. 10 Nebuzaradan na yiɛklu Babylon ŋunɔwifɛɛnlɛ pre kro ni, a pra Jerusalem mboo ŋga pra sin mu ki fɛ mu kun kre juari mu wo. 11 A wra tia pra leele mblɛ pra kro Jerusalem na, na mblɛ praa wa Babylon ŋunu kro pre kro yii mna sɛ na pe ni Babylon na wa. 12 La, pe shianfɛɛnlɛ titie pre, pre Nebuzaradan na ti Judah tra kre nu, a praa tnumu tuni pe kagblɛ, na pe seele nu na lii.
13 Babylon leele pre na swafre pilɛɛ, na trogo nyjɛ pra pe mna yira ŋga praa yeeri swafre epo kre taa, a kraa wa mu yire o Tafun Nyiɛkpɔɔ Suminyuŋgo wa kre juari, mna swafre yire koli mna sɛ na yi ni Babylon na. 14 Pra chɔɛ, na sofi, na yirɛ nyjɛ ni praa kaniɛ muni yire, na tahɛɛ, na swafre yirɛ nyjɛ ni praa tnumu tuni Suminyuŋgo wa yire kro koli. 15 Ŋunu shiefɛɛnlɛ lopom wre na yirɛ nyjɛ pra swanyiɛ, na swafiŋge tɛɛ mu pe yire, na kotie, na taahɛɛ nyjɛ ni praa kanhun naŋgua woni yire kro koli mu sɛ. 16 Swafre ŋga pra pe mu taa pilɛɛsi shiin na kre, na trogo yire, na epo ŋga Solomon na pe mna tɛɛ o Tafun Nyiɛkpɔɔ Suminyuŋgo wa yire, na sna mu tro, a ndro nsra ja mbe yi kra mbe yi snamu chin. 17 Pilɛɛ yire nunu gedem naa fiiti fulo na kɔɔnashin. A pra swafre tɛɛ mna ki ndra tɔyira pe, a ki gedem naa fiiti jijirɛ na yɔɔ, a pra ki ndra tɔyira kre pe mu ki san, na jlɔnyi pe tin mu tɛni yiyɛ na, mna swafre tɛɛ mu yirɛ pe kpoolo kpoolo na pomegranate sɛnyi yi mu tɛni mu fɛ mu ki kun. A pan pilaasi shiinwo kre na nyi na jlewo kre yi.
18 Ŋunu shiefɛɛnlɛ lopom Nebuzaradan wre na srawɔfun lopom Seraiah, na Zephaniah ŋmba wra taa srawɔfun lopom wre na, na Suminyuŋgo kre jlonwee nyu shiefɛɛnlɛ pre taarɛ yii mna sɛ na pe ni. 19 Wra leele mblɛ pra kro Jerusalem na kre plɛ yii mna ya pe na mu sɛ, pre na lɛ, pe ŋunɔwifɛɛnlɛ lopom, na lebiile pre paaranyinafɛɛnlɛ pre kunɔ. Wra ŋunu nyunɔfun ŋmba wraa le a praa ŋunɔwifɛɛnlɛ wru wre yii, mna ŋunɔwifɛɛnlɛ fuloe taarɛ yii wa na mna ya. 20 Nebuzaradan na pre leele mblɛ kro yii mna sɛ na pe ni Riblah na, mna sɛ Babylon ŋunu ŋga. 21 A ŋunu wre na tia pra leele pre kro gbo Riblah ŋga kraa wa Hamath tra nu kre na. Pan kra le a pra Judah leele yii mna yili pre titi tra nu mna sɛ tnibim nu waŋgra fɔŋgɔ nu.
Pra Gedaliah Pe Judah Tra Kre Lefun
22 Ŋga kra pe ma kre Babylon ŋunu Nebuchadnezzar na Ahikam biblɔ Gedaliah ŋmba tolɛɛ na wi Shaphan wre wɔ, a wraa Judah leele mblɛ pra kro tra kre nu pre le. 23 Ŋga Judah ŋunɔwifɛɛnlɛ pre loplombo pre, na leele pre kro na loo na Babylon ŋunu wre Gedaliah wɔ, na wra Judah tra kre leele le kre, loplombo pre na sɛ Gedaliah pan Mizpah na. Leele mblɛ pra sɛ wa pre na lɛ Nethaniah biblɔ Ishmael, na Kareah biblɔ Johanan, na Tanhumeth biblɔ Seraiah ŋmba wra yiri Netophah na wre, na Maacah biblɔ Jaazaniah, na pe leele. 24 Bawa Gedaliah na da mna loplombo pre, na pe leele pre kro le gbun, mna yo pe pan mbo, “Yaa shia Babylon loplombo pre fiɛ, e tni tra kre nu, e na Babylon ŋunu wre sumi, kee kro we nyu mbe e ŋga.” 25 La, kre yɛlɛ kre nyiɛpɔ kɔɔnashin wo kre nu, Nethaniah biblɔ Ishmael ŋmba tolɛɛ wi Elishama, a wra yiri lebiile nu wre, na leele kɛ plɛ na sɛ Gedaliah gbo. Pra Judah leele, na Babylon leele mblɛ praa wa u jaara Mizpah na wa pre kro gbo mu ya. 26 Ŋga kra pan ma kre, Israel leele pre swafɛɛnlɛ, na pe shianfɛɛnlɛ, na pe ŋunɔwifɛɛnlɛ loplombo pre kro na fɛ mna sɛ Egypt tra nu, ŋgi na hin? Praa Babylon leele pre fiɛ.
Pra Ŋunu Jehoiachin Wɔ Nyuŋgo
27 Ŋga pra Judah ŋunu Jehoiachin yii mu sɛ tnibim nu kre, ki yɛlɛ fulo na kɛmbɔkɔɔnashin kre na Babylon ŋunu ŋmba praa yeeri Evil-Merodach na pan mu jɔɔn li, wre wra sɛ Jehoiachin wɔ nyuŋgo nyiɛpɔ kɛmbɔshiinwo kre ble fulo na kɔɔnashin na. 28 Babylon ŋunu wre na nyu Judah ŋunu wre na, mna u ŋga kpɔɔmu tnihaa u ŋunumu kre nu mna wɛ ŋulo mblɛ wre na pre naa wa Babylon tra nu wa kre na. 29 Ŋunu wre na Jehoiachin ŋga kolo a wraa dodonyi wɛɛ leni mna u nyuŋgo lee dodonyi yire lee ti. A mu yire kre nyjila kre, mna sɛ su nyjila ŋga wra li kro nu, wre na ŋunu wre praa chaa na lii. 30 Ble kro nu ŋunu wre naa Jehoiachin kaan swa chɛchiɛri, a wraa taa na yirɛ nyjɛ yi u shian loni, mna sɛ su nyjila ŋga wra li kro nu.