3 Ki tia pra kila mna bichable chichie cha Israel tra nu mu tro, mna sɛ Abishag ta, wra pe Shunem lechlɔ, a pra pan na u ni mna ŋunu ŋga. 4 Bichable wre na nyu titi, a wra tni tolɛɛ jaara mnaa u le, la, tolɛɛ nsra u chin chlɔ.

5 Kre nyjila kre Adonijah ŋmba lo na wi Haggith wre, na yiri mna uyɛ wɔ mbo, “Mi mbe pe ŋunu.” Ki tia wra sookɛɛ, na yi ŋmaafɛɛnlɛ cha, mna bilɛ fuloe shiin na kɛ cha mblɛ pie na u sri, mbra yiɛklu u pan. 6 U lɛ David nsra kee sisaa ka yo, ndee mna u wie na, “Mni a mna kee nyjɛ mu pini ŋga pini hin?” Adonijah na nyu titi, a wre pra se mu taa Absalom na. 7 Adonijah na Zeruiah pɔ Joab, na srawɔfun Abiathar praa paara na fni, a pra yire u kro. 8 La, srawɔfun Zadok, na Jehoiada pɔ Benaiah, na Nyiɛkpɔɔ keenyanyofun Nathan, na Shimei, na Rei, na Ŋunu David shiefɛɛnlɛ pre rɛ, pre nsraa wa Adonijah kro.

9 Adonijah na yiri mna sɛ mbaala, na nui, na nabiile mblɛ nu nyina nyi gbo mna sra wɔ Zoheleth Dnɛ kpɔɔ ŋga kraa wa En-Rogel blo kre lawee. Wra kɛ wa mna u lɛ bibilɛ kro yeeri, pre na bilɛ mblɛ praa Judah ŋunu sumi pre kro, 10 la, Nyiɛkpɔɔ Keenyanyofɛɛnlɛ Nathan, na Benaiah, na ŋunu shiefɛɛnlɛ pre, na u lɛ pɔ Solomon pre rɛ, u nsra pre yeeri.

11 A Nathan na sɛ Solomon lo, Bathsheba wre wie mbo, “Mu n loo na Haggith biblɔ, Adonijah wre uyɛ pe ŋunu, hali a o tafun Ŋunu David n chin ki nuu? 12 Kena ti mbe ni mu ŋga jawala, imi mu pe mbe ŋu na mu pɔ Solomon ŋmaa shɔ. 13 Sɛ Ŋunu David pan mu sɛ yo u pan na, ‘Ni tafun ŋunu, mu nsra da mu mu sumifun ŋga na, “Kpra na, ni yo mu pan na mu pɔ Solomon we ni krɔ li mbe ŋunumu li kree?” A yira ŋgi ki tia Adonijah pe ŋunu hin?’ 14 Kena nyjila ŋga muu wa wa na paara ŋunu ni kre to, mbe pan wa mbe paan yo mbe ya mu kee kre na.”

15 A Bathsheba na le blɛlɔɔ ŋunu kro u nyuŋgo. Na Abishag, Shunem ndro wre wa wa na u sri. 16 A Bathsheba na sɛ kosie kan ŋunu yiɛ, mna ndra soo. A ŋunu na u wie mbo, “Yira ŋgi mu chaa hin?” 17 A Bathsheba na kna mbo, “Ni tafun, ŋu mna da o Tafun Nyiɛkpɔɔ mɛɛ ni mu ni ŋga na, ‘Mu pɔ Solomon we ni krɔ li, mbe ŋunumu li, mbe tni ni ŋujɔɔn kre na.’ 18 La, fuŋgaami ŋga, Adonijah uyɛ pe ŋunu, a ŋu ni tafun ŋunu, mu n ki kee ka chin. 19 U sɛ nui, na mbaala, na nabiile mblɛ nu nyina nyi gbo tataara, mu kɛ wa mu mu bibilɛ pre, na Srawɔfun Abiathar, na Joab sojae lopom wre yeeri, la, Solomon rɛ, u n wre yeeri. 20 Ni tafun ŋunu, ŋu na Israel leele kro yiɛ nyi, mbe mu pe nyina ŋmba we mu krɔ li, mbe ŋunumu li. 21 Na kre ma, na ki pan na ni tafun ŋunu ku, mu mu tolɛɛlɛ kɔŋgɔ ni, pie mi na ni pɔ Solomon yii mbe gbo na sisampefɛɛnlɛ lɛ wre.”

22 Nyjila ŋga ni Bathsheba naa wa na paara ŋunu ni kre to, a Nyiɛkpɔɔ keenyanyofun Nathan na le pe kro nyuŋgo wa. 23 A pra kna mu yo ŋunu pan mbo, “Tolɛɛ, Nyiɛkpɔɔ keenyanyofun Nathan pan.” A Nathan na flo mu da ŋunu na mna kosie kan u yiɛ, mna yiɛ juule tra, 24 mna kna mbo, “Ni tafun ŋunu, ŋu mu yo na Adonijah u mu krɔ li mbe pe ŋunu ra? 25 Aŋga u sɛ nui, na mbaala, na nabiile mblɛ nu nyina nyi gbo tataara mu sra wɔ. Mu kɛ wa mu mu bibilɛ pre kro yeeri, pre na mu sojae lopom wre, na srawɔfun Abiathar ni kro. Fuŋgaami ŋga ni paara ŋga, pre na wree wa na lii na gboo, a pra yuu mbo, ‘Ŋunu Adonijah ŋmaa ki tnu.’ 26 La, mi mu sumifun, na srawɔfun Zadok, na Jehoiada pɔ Benaiah, na mu biblɔ Solomon rɛ, u n wre yeeri wa. 27 Kena ni tafun ŋunu, ŋu mu kre kee ŋga pe, a mu n tia o chin ki nu ŋgaa? Hali mu n tia mu sumifɛɛnlɛ chin ndro ŋmba we mu krɔ li, mbe pe ŋunu.”

28 A Ŋunu David na kna mbo, “E Bathsheba yeeri e ni ŋga.” A Bathsheba na pan mu yire ŋunu yiɛ. 29 A Ŋunu David na da mbo, “Ŋga o Tafun Nyiɛkpɔɔ ŋmba u ni shɔ ni kanyana kro nu wree wa ŋga, 30 mbe ti kee ŋga na ndaa o Tafun Nyiɛkpɔɔ, Israel leele Nyiɛkpɔɔ wre mɛɛ tɛɛ mu da mu mu ŋga, na mu biblɔ Solomon we ni krɔ li, mbe pe ŋunu kre, mbe ti ki pe ma aŋga.” 31 A Bathsheba na lɛɛlɛ mna kosie kan, mna yiɛ juule tra mna kna mbo, “Ni tafun Ŋunu David, mu ŋmaa ki tnu!”

32 A Ŋunu David na kna mbo, “E srawɔfun Zadok yeeri e ni ŋga, wre na Nyiɛkpɔɔ keenyanyofun Nathan, na Jehoiada pɔ Benaiah ni.” Ŋga pra pan mu yire ŋunu yiɛ kre, 33 a ŋunu na yo pe pan mbo, “E ni sumifɛɛnlɛ pre wru e ya eyɛ na, e ni pɔ Solomon wru e taa ni bubnɔ wre na, e sɛ na u ni Gihon blo kre jaara. 34 Na e da wa, mbe srawɔfun Zadok, na Nathan simi wo u ndra na, mbe ki nyina na wre wi ŋunu. E bnɔɛ fɔ, e na gble leni e na yuu na, ‘Ŋunu Solomon ŋmaa ki tnu!’ 35 Mbe e taa u kro mbe pan mbe u tɛɛ ni ŋujɔɔn kre na mna, mbe u tni ni titɛɛ mbe ŋunumu li. Mi ni u wɔ mbe u pe Israel na Judah ŋunu.” 36 A Jehoiada pɔ Benaiah wre na kna mna ŋunu kee kre nyu wɔ mbo, “Ami, o Tafun Nyiɛkpɔɔ, ni tafun David Nyiɛkpɔɔ wre u ti mbe ki pe ma. 37 Imi na o Tafun Nyiɛkpɔɔ wre na yire ni tafun David kro kre, u yire ma Solomon kro, mbe ti mbe u ŋunumu kre kpɔɔ mbe wɛ ni tafun Ŋunu David wo kre na.”

38 A srawɔfun Zadok, na Nyiɛkpɔɔ keenyanyofun Nathan, na Jehoiada biblɔ Benaiah, na Kereth leele, na Pelet leele na sɛ Solomon wru mu taa Ŋunu David bubnɔ na, mna taa u kro mna sɛ na u ni Gihon na. 39 A srawɔfun Zadok na sɛ nyambɛ ŋga nu simi na nyi kre wru Nyiɛkpɔɔ Yoŋgo Nyuŋgo wa mna pan mu ki wo Solomon ndra na. A pra bnɔ fɔ mu taa u kro, a leele pre kro naa gble leni na yuu mbo, “Ŋunu Solomon ŋmaa ki tnu.” 40 A leele pre kro na pan mu taa u kro, na bnɔɛ foo, na yɛshɔɔrɔ kpɔɔ lii, a bnɔɛ yire tiŋge na tia tra naa seeri.

41 Ŋga Adonijah na u fumblɔ pre na li mu kɔ kre, pra bnɔɛ tiŋge loo. Ŋga pra yi tiŋge loo ma kre, a Joab na kna na wie mbo, “Gblee ŋga o ndru chia lam ŋga nɔɔ yi ŋgi hin?” 42 Nyjila ŋga ni Joab naa paara kre to, a srawɔfun Abiathar pɔ Jonathan na da wa. A Adonijah na yo u pan mbo, “Le lamu. Lewo chichie wi ŋu, ki tia o chin na mandiɛ taan ni mu paan.” 43 A Jonathan na kna mbo, “Mandiɛ taan ni ma ni paan, o tafun Ŋunu David u Solomon pe ŋunu. 44 Ŋunu David tia srawɔfun Zadok, na Nyiɛkpɔɔ keenyanyofun Nathan, na Jehoiada pɔ Benaiah, na Kereth leele, na Pelet leele sɛ Solomon wru mu taa u bubnɔ na, 45 a srawɔfun Zadok, na Nyiɛkpɔɔ keenyanyofun Nathan u ndra fa na simi ni Gihon blo kre lawee, a ki nyina na wre wi ŋunu. A pe taa u kro na gble leni, a chia na teele poŋgo. Kena kre gblee e ndru ma kre. 46 Ŋga ki taa yi na, Solomon sɛ lebiile ŋujɔɔn kre wru mu tni. 47 A lebiile loplombo pre na paan na o tafun Ŋunu David kaa lefɔɔ na yuu mbo, ‘Mu Nyiɛkpɔɔ wre u ti mbe Solomon mɛɛ kpɔɔ mbe wɛ mu mɛɛ na, mbe u ŋunumu kre kpɔɔ mbe wɛ mu wo kre na.’ A Ŋunu David na tni u dɛŋglɛ na mna lɛɛlɛ mu o Tafun Nyiɛkpɔɔ sumi, 48 mna kna mbo, ‘o Tafun Nyiɛkpɔɔ wo yi mɛɛ, Israel leele Nyiɛkpɔɔ wre tia ni ndro ŋmba we tni ni titɛɛ, ni ŋujɔɔn na wre nya aŋga.’”

49 Ŋga Adonijah fumblɔ pre na kre kee ŋga loo kre, a fiɛrɛ na tia pra yiri mu nyina. 50 Solomon fiɛrɛ na tia Adonijah na sɛ sragbunu kre nyamblɛ chomchom yire fa mu yii. 51 A pra sɛ yo Solomon pan mbo, “Adonijah mu fiɛ, ki tia u sɛ sragbunu kre nyamblɛ yire fa mu yii. Kee ŋga u yire wa na yuu yi na, ‘E ti mbe Ŋunu Solomon da mbe ni ŋga aŋga na, wa u sumifun gbo na brɔfiɛn yiɛ shiin ni.’” 52 A Solomon na kna mbo, “Na u tia ni u nya na ndro chichie wi kre, hali u ndra nyjuro nunu chom kuraa wa kɔ mbe to tra, la, na ni waa sisam kee ka nya u nu, mbe ti mbe pe u gbo.” 53 A Ŋunu Solomon na leele wɔ mu tun, a pra sɛ Adonijah laa sragbunu kre na mna pan na u ni. A wra pan mu kosie kan Ŋunu Solomon yiɛ, a Solomon na kna mbo, “Yiri mu sɛ mu katoo!”