3 La, Joab na yo ŋunu pan mbo, “Tolɛɛ Jaŋgafun, mu Tafun Nyiɛkpɔɔ wre u ti mbe Israel leele nɛɛ mbe ya ma gbee lafaa, mbe mu ŋmaa ta, mbe nya na wre Nyiɛkpɔɔ u ki pe. Tolɛɛ Jaŋgafun, kena ŋgi ki tia mna chaa mbe leele pre tɔɔnri hin?” 4 La, ŋunu wre na tia pra li kee ŋga wra yo kre na, mna tia Joab, na u loplombo pre na yili mna sɛ Israel leele pre tɔɔnri.

5 Pra sɛ Jordan lɔɔ kre kun, mna sɛ tuu Aroer tapan haa. Aroer na pe kakpɔɔ ŋga kraa wa nyuɛ lalaa tra ka nu, a chia kre naa wa tra kre lalaa, Gad tra nu. Bawa pra yire mna sɛ nyjeeri haa Jazer na, 6 mna yire wa mna sɛ Gilead na, mna sɛ yili Kadesh na, Hittite tra nu. Bawa pra yire mna sɛ Dan na, ŋga pra yiri wa, a pra sɛ yilatohaa Sidon na. 7 Bawa pra yire mna sɛ tapan haa Tyre kakpɔɔ ŋga pra mboe sin mu fɛ mu kun kre na, mna yire wa mna sɛ Hivite leele, na Canaan leele Kakpɔɛ yire na, mna sɛ ki nyu le Beersheba ŋga kraa wa Judah tra tapan haa kre na. 8 Ki tia nyiɛpɔ kɔɔnanyjirɛ, na blee fulo nyu na kre, pra ndru mna sɛ Jerusalem na, na pe waŋgra kre kro kila mu kɔ. 9 Pra sɛ mandiɛ bɔ ŋunu wre pan, mna u nyina bilɛ mblɛ pie jaa ŋunɔ wi tnumu tun pre nyu. Kagbenyi lafɛɛ kɔɔnatarɛ praa wa Israel na, a Judah wolo na pe kagbenyi lafɛɛ kunɔ.

10 La, ŋga David na pe tɔɔnri mu kɔ kre, u lam nsra to u nu, a wra yo Nyiɛkpɔɔ pan mbo, “Kee ŋga ni pe kre pe sisaa kpɔɔ. Jande, ki ti mu ni kɛ, ni jijiere kee pe.” 11 Ŋga nyiŋge na se bnimi kre, na David n ta mu nyi tun, a Nyiɛkpɔɔ na yo Gad, David Nyiɛkpɔɔ keenyanyofun wre pan mbo, 12 “Sɛ yo David pan na ni u kaan kaalɛɛ taarɛ, mbe u ka le mbe wɔ. Ŋga we wɔ kpan, kre mbe pe.” 13 Gad na sɛ David pan, mna sɛ kala ŋga Nyiɛkpɔɔ yo u yo kre bɔ, mna u wie mbo, “Yire kaalɛɛ nyjɛ, ŋgi haa mu chaa hin? Mu chaa mbe klo to mu tra ŋga nu yɛlɛ taarɛ, ndee mu chaa mbe mu loŋgoolo mu ni nyiɛpɔ taarɛ, ndee mu chaa mbe yira to mu tra ŋga nu ble taarɛ hin? Fuŋgaami, kee ŋga jawa chiriri mu ka le mu wɔ, mbe ni sɛ yo Nyiɛkpɔɔ pan.” 14 A David na yo mbo, “Fuŋgaami, ni n chin kee ŋga mbe yo! La, ni n na chaa mbe leele ni ndie tini. Kena ti mbe Nyiɛkpɔɔ o ndie tini. Ŋgi na hin? Wre foorochiɛn ki kpɔɔ.”

15 Ki tia Nyiɛkpɔɔ na tia yira na pan mu le Israel leele pre nu, mu yire ki ble kre bnimi mna sɛ su nyjila ŋga u chaa nu. Mu yire waŋgra kre kɛ ŋga na, mu sɛ su ŋgaa na. Israel leele kagbenyi fuloe taarɛ na kɛ pra ku. 16 Ŋga Nyiɛkpɔɔ bituŋu wre na leele pre gbo mu chaa da Jerusalem na kre, Nyiɛkpɔɔ na u jawala chinɛ leele pre ndie tiniɛ kre na mna yo bituŋu ŋmba wraa pe kuu wre pan mbo, “Ti ma! Ki yila ma!” Kre nyjila kre, na nyjeeri bituŋu wree wa Araunah, Jebusite wo wre shunshun na. 17 David na nyjeeri bituŋu ŋmba wraa leele pre kuu wre nya mna yo Nyiɛkpɔɔ pan mbo, “Mi ni punu mu na, mu pimi li. A pɔlɛfɛɛnlɛ mblɛ, ŋgi pre pe hin? Mi na ni sele wolo ndie ki fna mbe mna tini.”

18 Ki ble kre lam, Gad na sɛ David pan mna sɛ yo mbo, “Nduu mu sɛ Araunah shunshun na wa mu sɛ sragbunu sin mu Nyiɛkpɔɔ ŋga.” 19 David na loo Nyiɛkpɔɔ nyu kee na, mna pe imi na Gad na yo kre. 20 Araunah na yiɛ wa mu le, mna nya na Ŋunu wre na u loplombo paan u pan. A wra to mu sni David yiɛ, 21 mna u wie mbo, “tolɛɛ jaŋgafun, a ki tna woo?” David na kna mbo, “Mu shunshun kre lɔ haa ni pan, mbe sragbunu sin wa mbe o Tafun Nyiɛkpɔɔ ŋga, mbe u ti yira kre laa o na.” 22 A Araunah na kna mbo, “Tolɛɛ Jaŋgafun, ki bali mu tɛɛ mu yira ŋga mu chaa mbe pe mbe Nyiɛkpɔɔ ŋga kro pe. Nui lɛ kre, mbe mu tɛɛ mbe sra wɔ sragbunu kre na. Kɛɛn nyjɛ o poo pe yulɔɛ na yi kre, a kɛɛn nyjɛ ni o tnumu tuni shunshun na wa yi kre, mu jaa yire pe kejenyi.” 23 A Araunah na yirɛ nyjɛ kro wru mu u ŋga mna yo mbo, “Mu Tafun Nyiɛkpɔɔ we mu sra shɔ.”

24 La, ŋunu wre na yo mbo, “Ɔɔhɔn, mbe ki fɔlɔ tɔ mbe mu ŋga. Ni n na chaa mbe yaka wru finfin, mbe ki tɛɛ mbe sra wɔ mbe ni Tafun Nyiɛkpɔɔ ŋga.” Ki tia wra shunshun kre, na nui pre lɔ swafiŋge fuloe shiin na kɛ. 25 A wra sragbunu sin mu o Tafun Nyiɛkpɔɔ ŋga, mna yirɛ sroo sra, na wejinyiŋge sra wɔ, mna o Tafun Nyiɛkpɔɔ ŋga. A o Tafun Nyiɛkpɔɔ na u nyiɛtalaa loo, mna tia yira kre na laa pe na.