Samuel Hlɛ Jle
Elkanah Na U Sele Leelee Wa Shilo Na
1
Blɔ wa na yiri Ephraim sele nu a praa u yeeri Elkanah, a wraa wa mu tni chia ŋga praa yeeri Ramah kre na. Ephraim sele chia na yi, a kraa wa nyuɛ lawee ka nu. Elkanah lɛ na wi Jeroham, a u tolɛɛ wre tolɛɛ na wi Tohu, a Zuph na wi pe kro tolɛɛ. 2 Elkanah chiɛlɛ naa shiin, Hannah na Peninnah. Peninnah naa biile ni, a Hannah wre nsra se. 3 Na yɛlɛ da kpan, Elkanah we sɛ Shilo na mbe sɛ sumi, mbe sra wɔ mbe o Tafun Nyiɛkpɔɔ Jaŋgafun wre ŋga. Kre chia kre na Eli biile shiin, Hophni na Phinehas na nyi mna pe o Tafun Nyiɛkpɔɔ wre srawɔfɛɛnlɛ. 4 Na Elkanah sra wɔ kpan, we u chɔ Peninnah na u biile ŋga kaara yire yɛ, 5 mbe Hannah ŋga ma gbee shiin. Ŋgi na hin? Wra Hannah kori, ŋga o Tafun Nyiɛkpɔɔ nsra tia wra se kre na. 6 Ŋga o Tafun Nyiɛkpɔɔ wre nsra tia wra se kre ndra na, u yenyjɔ wre naa u pini krɔkun kee na u gbun fiiri. 7 Yɛlɛ nyini ŋga, pan wraa kre kee kre pini. Na pe sɛ o Tafun Nyiɛkpɔɔ wre katoo kpan, Peninnah we Hannah pe mbe u nyɛni, hali sro kuraa wa le u nyuu. 8 Na ki pan ma, u plɔ Elkanah we u wie mbo, “Hannah, mni a mna nyɛni, a ma li, na fooro lii ma hin? Kena ni n wɛ mu pan biile kɛ na ra?”9 Ki ble ka, na pe li mu kɔ Shilo na, a Hannah na yiri mu yire. Na srawɔfun Elii wa mu tni jɔɔn na mu gbun o Tafun Nyiɛkpɔɔ Suminyuŋgo kre krɔ kaan na. 10 A Hannah na fooro kpɔɔ tɛɛ mna nyiɛtali mna nyɛni mu o Tafun Nyiɛkpɔɔ wre yeeri. 11 Mna nyu yo u pan mbo, “O Tafun Nyiɛkpɔɔ Jaŋgafun, na mu mu sumifun fooro le, mbe ni sɔɔnri, mbe ma ni fɛɛ, la, mbe ni ŋga biblɔ mbe ni se kre, mbe u wru mbe ŋu o Tafun Nyiɛkpɔɔ wre ŋga u ble nyjɛ we li tra ŋga na kro, a brɔfiɛnklo wa taa u ndra na fio.”
12 Hannah na yire mu o Tafun Nyiɛkpɔɔ wre tali mu mu, na Elii wa na u nyu le. 13 Hannah naa nyiɛtali u loloŋgo nu, u nyu naa wa na gbuun, a kee nyjɛ wraa yuu kre nsraa ndru. Ki tia Eli na jawa na simi u gbɔ, 14 a Eli na kna mu yo u pan mbo, “Nyjila ŋgi nu mu simi nyjɛ we kun mu yiɛ na hin? Mu simi kee yire ti.”
15 A Hannah na kna mbo, “Ni tafun, simi ma ni gbɔ a ni n da mu simi ka na ka gbɔ. La, fooro kpɔɔ ki ni yii, a ndaa nyiɛtali na ni keshian waa o Tafun Nyiɛkpɔɔ wre yiɛ. 16 Maa ni jawa na lewaa wa wi mi, ni foorolie ki nɛɛ, a ki tia ndaa nyiɛtali ma.”
17 A Eli na kna mbo, “Sɛ na wejinyiŋge ni, Israel leele Nyiɛkpɔɔ wre u mu ŋga yira ŋga mu chaa.”
18 Hannah na kna mbo, “Ta ni jawa na chichie ni ma.” A wra yiri wa mna sɛ yaka cha mu ka, a u nsra fooro yiɛ tɛɛ na.
19 Ŋga nyiŋge na se bnimi pupu kre, Elkanah na u chiɛlɛ pre na sɛ o Tafun Nyiɛkpɔɔ wre sumi. Ŋga pra kɔ kre, a pra ndru mu sɛ Ramah na. Ŋga pra sɛ kre, Elkanah na u chɔ Hannah na sni, a o Tafun Nyiɛkpɔɔ wre na Hannah nyiɛtalaa kre loo. 20 Mu yire kre ble kre, Hannah na siire ta, mna biblɔ se, mna u mɛɛ tɛɛ Samuel. Ki nɔɔ yi na, Nyiɛkpɔɔ loo. A wra kna mbo, “Nyiɛkpɔɔ pan ndaa u tali.”
21 Yɛlɛ na ndru mu da, a Elkanah na u chiɛlɛ na u biile na sɛ Shilo na, mbe sɛ u yɛlɛ nyu sra, na yirɛ nyjɛ nyu u yo na we wɔ mbe o Tafun Nyiɛkpɔɔ ŋga yire wɔ. 22 Ŋga praa shie kre, Hannah nsra ka sɛ. Wra yo u plɔ pan mbo, “Na pɔ wre waa nyinimi kun, kre mbe sɛ u wɔ mbe o Tafun Nyiɛkpɔɔ wre nyina, mbe u tni o Tafun Nyiɛkpɔɔ wre katoo nyjila kro nu.”
23 A Elkanah na kna mbo, “Peere ma, ŋga mu jawa na ki nyu pe, tni katoo mu sɛ su na mu pɔ wre kun nyinimi na. La, o Tafun Nyiɛkpɔɔ u ti mbe u nyu kee kre pe kpra.” Ki tia chlɔ wre na tni katoo, a pɔ wre na ŋgɔɔri mna sɛ su na wra u kun nyinimi na.
24 Ŋga wra pɔ wre kun nyinimi na kre na u n lɛ, a wra sɛ na u ni Shilo na. Ŋga praa shie kre, wra sɛ na nuu ŋmba u da yɛlɛ taarɛ ni, mna mimi cha yira nyini, mna simi gbɔwo cha yurɔ hlɛ gbolo nyini mna ya, mna sɛ na yi ni Suminyuŋgo wa. 25 Ŋga pra nuu wre gbo mu kɔ kre, pra sɛ Eli cha mna pɔ wre wru mu u ŋga. 26 Bawa Hannah na kna mbo, “Ni tafun, mu ni chin ŋgaa? Mi wi chlɔ ŋmba wra da mu pan mu yire mna, na nyɛni na o Tafun Nyiɛkpɔɔ wre yeeri kre. 27 Ndaa u tali pɔ ŋmba, a wra ni ŋga u wi. 28 Ki tia ni u wru na leni o Tafun Nyiɛkpɔɔ wre kɛɛ. Nyjila ŋga we li tra ŋga nu kro, o Tafun Nyiɛkpɔɔ wre wo wi.” A pra o Tafun Nyiɛkpɔɔ wre sumi wa.