Ruth 1

Ruth Hlɛ

Ruth Na Naomi

Nyjila ŋga nu kalalifɛɛnlɛ naa Israel leele le kre, klo ka na to pe tra kre nu. A blɔ wa wra yiri Bethlehem na Judah tra nu, a wre na u chɔ na u bibilɛ shiin na kɔ mna sɛ tni Moab waŋgra nu nyjila chiɛri. 2 Blɔ wre mɛɛ naa Elimelech, a u chɔ wre mɛɛ naa Naomi, a pe bibilɛ shiin pre mɛɛ naa Mahlon na Kilion. Pe kro na pe Ephrath jlom wolo, mna yiri Bethlehem ŋga kii wa Judah tra nu kre na. A pra yiri wa mna sɛ tni Moab tra nu. 3 Elimelech na ku wa, a kra sɛ kro Naomi na u bibilɛ shiin pre chiin. 4 Biile pre na Moab chiɛlɛ wru mu leŋge. Nunu mɛɛ naa Orpah, a shiinwo wre mɛɛ naa Ruth. Ŋga pra tni wa kie pe yɛlɛ kɛ nyu na kre, 5 Mahlon na Kilion na ku na, a kra kro Naomi chiin. Blɔ, ndee pɔ nsraa wa u pan na.

Naomi Na Ruth Na Ndru Mna Sɛ Bethlehem Na

6 Ŋga Naomi naa wa Moab na wa kre, wra loo na o Tafun Nyiɛkpɔɔ wre u leele dwan Israel tra nu wa, a sro bɔ pe na, kra tia wra uyɛ kna mbe yiri Moab na, wre na u najaala shiin pre ni mbe sɛ u waŋgra nu. 7 A wre na u najaala shiin pre na yiri mna to kolo na shie Judah tra nu. 8 Bawa Naomi na yo u najaala shiin pre pan mbo, “E ndru e sɛ tni e loolo pan. Nyiɛkpɔɔ we e ŋga tnimu chichie, imi na e na nyu mi na ni leele mblɛ pe ku pre na kre. 9 Nyiɛkpɔɔ we e ŋga bilɛ mbe e leŋge na, mbe e ŋga tnimu chichie.”

Naomi na pe fa mu yii mna pe gbenyi shiun shiun, a praa nyɛni. 10 A pra kna mna yo u pan mbo, “Ɔɔhɔn, wre na ŋu we sɛ mu leele pan.”

11 A Naomi na kna mbo, “Ni biile, e jande e ndru e sɛ. Yira ŋgi na e chaa mbe mi na yire sɛ hin? Mbe jaa bibilɛ se mbe e ta mbe leŋge naa? 12 Ni biile, e ndru e sɛ katoo. Fuŋgaami ni lɛ chalɔ, a mba jaa leŋge na. Hali na ni dankna na mbe jaa blɔ ta blee ŋga, mbe siire ta mbe bibilɛ shiin se kuraa kre, 13 ee jaa pe shie mbe pe lɛ ree? Ndee ee tni chakulo mbe pe shie ra? Ni biile, kre wa jaa pe. O Tafun Nyiɛkpɔɔ wre u kɛ laa ni na, a kee kre ni pe fooro ni mu wɛ e na.”

14 Bawa pra nyɛni na. A Orpah na u najɔ Naomi fa mu yii mna u gbekaan shiun mna u kla, mna ndru mu sɛ u leele pan. La, Ruth na je mu kun mu mbra u na.

15 A Naomi na yo Ruth pan mbo, “Le, mu yenyjɔ ndru mu na shie u leele na sɛɛnlɛ nyjɛ u sumi yire nu. Kena ŋu na wre e sɛ.”

16 A Ruth na kna mbo, “Maa yo na ni laa mu kro. Mna mu sɛ kpan, bawa mbe sɛ, a mna mu tni, bawa mbe tni na. Mu leele we pe ni leele, a mu Nyiɛkpɔɔ we pe ni Nyiɛkpɔɔ. 17 Mna mu ku bawa mbe ku, a bawa pie ni le. Nyiɛkpɔɔ u ni ndie tini imi na ki fna, na mbaa tia yaka waa ja mu mi na ŋu lalaa kun, fɔna kumu bɔkɔ.”

18 Ŋga Naomi na nya na Ruth je na we ka sɛ kre, u nsra paara na.

19 Ŋga kra pan ma kre, pra taa peyɛ na mna se le Bethlehem na. Ŋga pra le Bethlehem na kre, chia kre leele na tin gri, a chia kre chiɛlɛ naa peyɛ wie poŋgo mbo, “Naomi wi ŋmbaa?”

20 A Naomi na kna mbo, “Yaa ni yeeri Naomi na, la, e ni yeeri Mara. Ŋgi na hin? Jaŋgafun Nyiɛkpɔɔ wre tia ni kee sro ni nyu na. 21 Ŋga ndaa shie, na ni kɛ nyi, la, o Tafun tia ni ndru mu na paan kɛ waara. Ŋgi ki tia mbe e ni yeeri Naomi na hin? Ŋga o Tafun Jaŋgafun wre yiɛ wɔ ni na, mu tia ki peere ni na.”^a

22 Kena imi kra le a Naomi na u najɔ Ruth Moab ndro wre na yiri Moab tra nu na yi kre. Ŋga pra le Bethlehem na kre, na yua kun nyjila yi.^b