Ruth 2

Ruth Na Sɛ Na Yua Yaa Boaz See

Blɔ wa naa wa Bethlehem na wa a u mɛɛ naa Boaz, a wra yiri Naomi plɔ Elimelech jlom na, wra pe lekpɔɔ mnaa swa ni. 2 Ki ble ka, Ruth na yo Naomi pan mbo, “Mbe jaa sɛ leele seele nu mbe sɛ na yua yaai ree? Ndro ŋmba we ni ŋga kolo na ni sɛ u see kre, wre see mbe sɛ.” A Naomi na kna mbo, “Ɛnhɛɛn najɔ, mu jaa sɛ.” 3 Ki tia Ruth na yili mna sɛ see ka nu, mna sɛ taa yua kunfɛɛnlɛ plɛ kro, na yaai mu taa pe na. Wra kɔ mu nya na see ŋga nu u sɛ na yaai kre, Boaz ŋmba wra yiri Elimelech sele nu kre see yi. 4 Praa wa wa na tnumu tuni maa to, a Boaz na yiri Bethlehem na mna pan see wa, mna tnumutunfɛɛnlɛ pre ŋga lefɔ mbo, “O Tafun wre u ya e na.” A pra shɔ u pan mbo, “O Tafun Nyiɛkpɔɔ we mu dwan.”

5 A Boaz na kna mna tnumutunfɛɛnlɛ pre lopom wre wie mbo, “A sena bichable ŋmba yiri hin?”

6 A lopom ŋmba wraa pe le, wre na kna mbo, “Moab tra nu u yiri. Wre na Naomi pra pan. 7 Nii wa mna a u pan mu ni tali na ni ti mbe u taa o kro mbra yaa. Mu yire bnimi, pan u tnumu tun chiin mu pan mu su imi nyu ŋga na, fuŋga u chin mu tni na wuui chiɛri, asɛkɛ kre nu.”

8 Bawa Boaz na yo Ruth pan mbo, “Ni pɔ, loo ni pan. Maa shia yili see ŋga nu mbe sɛ yaa see fɔŋgɔ ka nu na. Ŋu na bichabɛɛlɛ tnumutunfɛɛnlɛ pre e tni. 9 Ta lawee nyjɛ nu pe kuun na tro yire le mu taa pe kro mna yaai wa, ni yo bilɛ pre pan na wa waa shia mu tɔɔra. A na gbɔɔ waa mu ta mu sɛ gbɔ bilɛ pre yirɛ nyjɛ nu pe ko mu le yire nu.”

10 Ŋga blɔ wre na yo Ruth pan ma kre, a Ruth na kosie kan, mna yiɛ juule tra, mna kna mbo, “Mi fuŋu, mni kuraa ki le, a ni kee mu shian, a mu nyu ni na ma hin?”

11 A Boaz na kna mbo, “Mu yire ŋga mu plɔ ku, kee nyjɛ mu pe mu mu najɔ ŋga yire kro, pe yi yo ni pan. Imi na mu mu waŋgra, na mu lo, na mu lɛ ti, mu pan mu tni leele mblɛ mu n chin fa nu. 12 Ni nyiɛtali na o Tafun wre we mu ŋga chichie ŋga mu pe kre fɔtɔɔrɔ. O Tafun Israel leele Nyiɛkpɔɔ ŋmba jaara mu pan mbe u mu shɔ wre u mu ŋga fɔtɔɔrɔ chichie.”

13 A Ruth na kna mbo, “Ni tafun, ni mu kaan mboo na ni kee wa mu mu yiɛ nyi tɛ. Mu paara mu sumifun pan chichie, mu ni gbun nyiŋge, a nde ni n da na mu bichabɛɛlɛ mblɛ pe mu sumi pre wa ni kple.” 14 Ŋga pe li nyjila na da kre, a Boaz na yo Ruth pan mbo, “Pan mu paanu shɔ mu ni chiin nu mu ka.” A Ruth na pan mu tni mu chaa tnumutunfɛɛnlɛ pre nu, a Boaz na u ŋga shɔlɔ kla wee yɛ. Wra yi ka mna yɔɔ mna pra kuɛn na. 15 Ŋga Ruth na yiri mbe sɛ yaa kre, a Boaz na yo u tnumutunfɛɛnlɛ pre pan mbo, “Hali, na bichable wre waa sɛ na yaa mna pe yɛ pɔ pɔ mu tɛɛ kre, ndro waa shia u tɔɔra. 16 E na yua zezee yire yɛ foli nyjɛ e ble ble yire nu e na waa u pan mbe u ta mbra kolii, a e wa wa shia kee fɔɔn ka yo u na.” 17 Ruth na yaa see kre nu a yila na pan mu kɔ. A wra nyjɛ wra ta yire gbun mu yi fɔ. Ŋga wra kɔ kre nyjɛ wra ta yire snamu na da kradnɛ fulo na kunɔ. 18 A Ruth na yi tio mu sɛ katoo, mna sɛ u najɔ wre nyina yi yi. Mna sro nyjɛ wra ka mu pra yire wɔ mu u ŋga.

19 A u najɔ wre na kna mu u wie mbo, “Ndro ŋmbi see mu sɛ yaa aŋga ma hin? Ndro ŋmbafun u nyu mu na ŋga, Nyiɛkpɔɔ we ufun dwan.” A Ruth na kna mna yo u najɔ wre pan mbo, “Blɔ ŋmba see ni sɛ tnumu tun kre mɛɛ Boaz.”

20 A Naomi na kna mu yo Ruth pan mbo, “O Tafun Nyiɛkpɔɔ we Boaz wre dwan. O Tafun Nyiɛkpɔɔ wa na nyɔɔ gboolo, na lefɛɛnlɛ na, ŋgi na hin? Wre blɔ wre, o jlom ndro titi wi, a leele mblɛ pe fna mbe o le pre wa wi.” 21 A Ruth na yo u najɔ wre pan mbo, “Hali wra yo ni pan na, ndaa shie mbra chaa u tnumutunfɛɛnlɛ pre nu mbra yaai, mbe sɛ su, na pie shɔlɔ yire kro kun mbe kɔ.”

22 A Naomi na yo Ruth pan mbo, “Ni pɔ, kie nyu na ŋu na Boaz bichabɛɛlɛ pre we na shie mbra tnumu tuni u see wa. Ŋgi na hin? Na lefuŋu wa see yi kre, pie na jaa mu pe sisaa ka.”

23 Ki tia Ruth naa taari Boaz bichabɛɛlɛ pre kro, na shie na shɔlɔ yire yaa, mna sɛ su na yira pan mu kɔ, a wre na u najɔ wre na tni.