Ruth 3

Ruth Na Blɔ Ta

Ki ble ka, Naomi na yo Ruth pan mbo, “Ki fna mbe ni blɔ cha mbe mu ŋga mbe mu leŋge, imi kie pe mbe ŋu titi mu katoo ta mbe tni. 2 Ŋu titi chin na Boaz pe o sele ndro, a ŋu na u bichabɛɛlɛ e shie u see na tnumu tuni, le, yilakɔŋgɔ ŋga we sɛ shɔlɔ fɔ u shunshun na wa. 3 Weli, mu tlade fa, mu yoŋgo chichie wɔ mu paari mu sɛ ndra shunshun kre na wa, maa shia ti mbe u chin na muu wa wa, ti mbe u li, mbe gbɔɔ kɔ tun. 4 Lawee ŋga nu we sni kre dɔɔta, na waa sni na ŋunu kre, mu sɛ yoŋgo laa u tlɔɛtapan, mu sni wa, we mu nyina ŋga mu pe.”

5 A Ruth na kna mbo, “Ŋga mu yo kro mbe ki pe ma.” 6 A Ruth na sɛ shunshun kre na wa, mna sɛ pe imi na u najɔ na yo u pan kre.

7 Ŋga Boaz na li, mu gbɔ mu kɔ, a u lam na to u nu kre. A wra sɛ sni lawee ŋga nu pra shɔlɔ yire kun mu ble kre nu na ŋunu. Bawa Ruth na yiri brɛmm mna sɛ Boaz yoŋgo laa u jeelee na, mna sni wa. 8 Kie pe ndroo, a Boaz na fo mu nyi, mna nya na chlɔ ŋmba u sni u tlɔɛtapan haa.

9 A wra u wie mbo, “Ŋu wi ŋmbi hin?” A chlɔ wre na kna mbo, “Mi wi mu sumifun Ruth. Yira ŋga o! Mu sele ndro titi wi mi, a ŋu mu ni le, kena mu yoŋgo kre kokoo tini mu ni tɔ.”

10 A Boaz na kna mbo, “Ni pɔ, o Tafun Nyiɛkpɔɔ wre u mu dwan. Kre chichie ŋga nyini kuraa kpɔɔ mu wɛ ŋga mna pe mna mu najɔ ŋga kre na. Mu na jaa yiɛ taa nyanyjɛbɛɛlɛ swafɛɛnlɛ, ndee shianfɛɛnlɛ na, la, mu n ma pe. 11 Ni pɔ, maa shia fiɛ, yira ŋga mu chaa kpan mbe ki pe mbe mu ŋga. Ŋgi na, chia ŋga leele kro chin na mu pe chlɔ chichie.

12 Ki pe kpra na ni sele ndro titi wi ŋu, a ki fna mbe ni mu le. La, blɔ waa wa, ŋmba ŋu na wre mbra mu wɛ mi na. 13 Sni mna mbe nyiŋge se, na ndram waa saan, mbe u le, na we jaa mu yii, kena ki nyu, a na u nsra ja mbe mu yii naa, kena ni o Tafun Nyiɛkpɔɔ ŋmba uu wa nyjila kro nu wre da na mbe mu yii. Kena sni mna mbe nyiŋge se.”

14 Ki tia Ruth na sni u tlɔɛtapan wa, la, wra gbolo mu yiri, imi kie pe mbe ndro wa u nya, ŋgi na hin? Boaz nsraa chaa mbe ndro chin na Ruth sɛ sni wa.

15 A Boaz na kna mu yo Ruth pan mbo, “Mu yoŋgo nyjeeriwo kre laa mu chan tra mna.” A wra ki laa mu chan tra, a Boaz na yua kna a yi snamu na da kradnɛ fulo na kɛ, a wra yi kɔ mna taa u patia na, a wra sɛ na yi ni katoo.

16 Ŋga wra le katoo kre, u najɔ Naomi na u wie mbo, “Ni pɔ, mni e ki tɛɛ hin?” A Ruth na kee ŋga Boaz na pe mu u ŋga yire kro yo u pan. 17 Ŋga wra bɔ mu taa na mbo, “Wre u ni ŋga yua nyjɛ, mbo, ‘Mba ti mbe mu ndru mbe sɛ mu najɔ pan katoo kɛwaara.’”

18 A Naomi na kna mbo, “Ruth frɔ ta mu le ŋga kie pe. Boaz wa tni, fɔna kee kre kro pe nunu aŋga.”