2 A Boaz na chia kre loplombo kɛ yeeri na, mna pe ŋga jɔɔn a pra tni mbe loo pe pan. 3 A wra kna mu yo u sele ndro titi wre pan mbo, “Naomi ŋmba u yiri Moab tra nu mu pan kre, wre u pan mu na o sele ndro Elimelech tra ka prɛ. 4 A ki fna mbe ni ki yo mu pan, kena na mu ki chaa mbe mu ki lɔ loplombo mblɛ, na ni loplombo mblɛ pe tni mna ŋga kro yiɛ na. A na mu n na ki chaa naa, mbe mu ki yo, ŋgi na hin? Ndro wa ja mbe kun mu kro mbe sɛ ki lɔ, na ŋu waa pra ki na, kre mbe chiin jaa yo na mbe ki lɔ.” A blɔ wre na kna mbo, “Mbe ki lɔ.” 5 A Boaz na kna mbo, “Na mu tra kre lɔ mbe yili Naomi pan kre, kena mu Ruth wru mbe leŋge, mbe biile se u na, mbe tra kre tni mbe pe gboo wre biile wo.”

6 A blɔ wre na kna mbo, “Na pan yi rɛ, kena mba jaa tra kre lɔ, na ki nyina na mi titi biile ma pie kɔɔ tra kre ta krɔyira kre, kena ŋu mu ki lɔ, mba jaa ki lɔ.”

7 Imi na Israel leele paala na nyi fa kre, na ndro wa chaa mbe u krɔ yira prɛ, ndee mbe ki chinɛ yira ka na kre, ki fna mbe ŋmba wo yi yira wre u kpawrɛ wɔ mbe ŋmba we ŋga ki yi kre ŋga. Na ki pan ma kena kolo sni.

8 A blɔ wre na yo Boaz pan mbo, “Ŋu mu ki lɔ,” A blɔ wre na u kpawrɛ wɔ jele na mna Boaz ŋga.

9 A Boaz na kna mna yo loplombo pre na leele mblɛ praa wa wa kre kro pan mbo, “E kro pe dansiɛfɛɛnlɛ aŋga na ni Elimelech, na Kilion, na Mahlon yirɛ nyjɛ yii wa Naomi pan kro, ni yi lɔ. 10 A Ruth Moab chlɔ wre, Mahlon lekuchɔ wre, ni u wru mu leŋge mu ya. Kie ti mbe krɔyirɛ yire kro pe gboo wre biile wee. Mbe ki ti krɔyirɛ yire kro gboo wre mɛɛ na, mbe u mɛɛ wa fun u chia, na u sele leele nu. Kena yire lɛ ni dansiɛfɛɛnlɛ aŋga.”

11 A loplombo pre, na leele mblɛ praa wa chia kre jlonwee nyu na wa pre kro na kna mbo, “Ɛnhɛɛn, o pe dansiɛfɛɛnlɛ. O Tafun Nyiɛkpɔɔ wre u ti mbe mu chlɔ ŋmba u paan mbe mu leŋge ŋga pe na Rachel, na Leah wi. Pre chiɛlɛ shiin mblɛ pra se mna Israel sele nɔɔhle. Nyiɛkpɔɔ u ti mbe mu kɛ nyu, Ephrath jlom na, mbe ndro kro mu mɛɛ loo Bethlehem na. 12 O Tafun Nyiɛkpɔɔ u ti mbe ŋu na bichable ŋmba biile se, mbe pe ti mu mɛɛ ta na Tamar na Judah pɔ Perez wi.”

13 A Boaz na Ruth wru mu leŋge, mna da u na, a o Tafun Nyiɛkpɔɔ na tia wra siire ta, mna biblɔ se. 14 A chia kre chiɛlɛ na yo Naomi pan mbo, “O Tafun Nyiɛkpɔɔ ŋga mɛɛ, ŋgi na hin? U mu ŋga nana mbe u mu le. Nyiɛkpɔɔ we ti mbe u pe lekpɔɔ Israel tra nu. 15 Mu najɔ Ruth mu kori, u prɔ mu pan mu wɛ bibilɛ kɔɔnashin na. U nana se mu mu ŋga, mbe u mu ŋga ŋmaa fɔŋgɔ, mbe mu le mu chalɛm nyjila.”

16 A Naomi na pɔ wre shɔ, mna u pɔɔri, na u kee chaa. 17 A chiɛlɛ mblɛ pre na pre naa wa mu mbra wa pre naa yuu mbo, “Naomi biblɔ ta.” A pra u mɛɛ tɛɛ Obed. Wre wra yiri mna Jesse se, a Jesse na yiri mna Ŋunu David se. 18 Kena Perez sele nɔɔ leele mɛɛ yi kre, Perez wra Hezron se, 19 a Hezron na Ram se, a Ram na Amminadab se, 20 a Amminadab na Nahshon se, a Nahshon na Salmon se, 21 a Salmon na Boaz se, a Boaz na Obed se, 22 a Obed na Jesse se, a Jesse na Ŋunu David se.