Judges 1

Kprakunfɛɛnlɛ Hlɛ

Israel Leele Pre Na Sɛ Wi Na Canaan Leele Hamblɛ Pre Ni

Ŋga Joshua na ku kre kɔkro, Israel leele pre na o Tafun Nyiɛkpɔɔ wie mbo, “Kena o jlom yire ŋgi haa kie klu mbe sɛ wi na Canaan leele pre ni hin?” 2 A o Tafun Nyiɛkpɔɔ na yo pe pan mbo, “Judah jlom kre kie klu mbe sɛ wi mbe tra ŋga ni e ŋga kre shɔ. Mbe ya pe na mbe tra kre le pe kɛɛ.” 3 A Judah jlom leele pre na sɛ pe wolo Simeon jlom leele pre wɔ ndie mbo, “Canaan leele pree wa mu tni tra ŋga Nyiɛkpɔɔ na o ŋga kre nu, kena e pan e sɛ ya o na mbe o sɛ wi na pe ni, na o kɔ wa, mbe o paan ya e na mbe e wi mbe e tra ŋga pe e ŋga kre shɔ.” Kra tia Simeon jlom leele pre na sɛ ya pe na. 4 Ŋga pra sɛ wi na pe ni kre, o Tafun Nyiɛkpɔɔ wre na ya pe na, a pra Canaan leele pre, na Perizzite leele pre ja, mna bilɛ kagbenyi kɛ gbo chia ŋga praa yeeri Bezek kre na. 5 Bawa pra ŋunu ŋmba praa yeeri Adoni-Bezek wre lawee nya, mna sɛ wi wa. 6 Ŋga praa wii kre, ŋunu Bezek naa feni, a pra u nya, mna u kɔŋgɔ ni mna sɛ u yii, mna u kambɛlogbonyi, na u jekambɛlogbonyi kro knumu. 7 A Adoni-Bezek na kna mbo, “Ni ŋulo fuloe taarɛ na kɛ kambɛlogbonyi, na pe jekambɛlogbonyi knumu pe na, a praa fulo ni tebru ŋga na ni lii jaara, na sro knumɛɛ yoori na kaa. Ni nya na Nyiɛkpɔɔ u kee ŋga ni pe kre fɔlɔ toni ni na.” A pra sɛ na ŋunu wre ni Jerusalem na, a wra sɛ ku wa.

8 Judah leele pre na sɛ wi na Jerusalem leele ni na mna ki shɔ. Pra ki leele gbo, mna kanhun le chia kre na mu ki sro. 9 Ŋga pra yiri wa kre, a pra sɛ wi na Canaan leele mblɛ praa wa mu tni nyambie na, na pe mblɛ praa wa mu tni nyambie yire jaara na shie yila tohaa, na pe mblɛ praa wa mu tni tablɔ tra kre nu na shie tapan haa kre ni. 10 Pra yire wa mna yiɛ le Canaan leele mblɛ praa wa chia ŋga praa yeeri Hebron, ŋga praa yeeri Kiriath-Arba fa kre na. Bawa pra sɛ wi na Sheshai, na Ahiman, na Talmai jlom yire leele ni mna pe ja.

11 Ŋga pra yiri wa, a pra sɛ wi na chia ŋga pe yeeri Debir kre leele ni. Kre chia kre chɔɔ, praa yeeri Kiriath-Sepher. 12 Bawa Judah loplombo pre ŋmba praa yeeri Caleb wre na yo mbo, “Ndro ŋmba we jaa wi mbe Kiriath-Sepher chia ŋga ja kpan, mbe ni bichlɔ Acsah wru mbe ufun ŋga mbe u leŋge.” 13 Caleb wre titi chunu Kenaz pɔ ŋmba praa u yeeri Othniel wre, wre wra sɛ wi mu chia kre leele ja, a kra tia Caleb na u bichlɔ Acsah wre wru mna u ŋga, a wra leŋge. 14 Ŋga pra leŋge mu kɔ kre, chlɔ wre na kro na yuu u plɔ Othniel pan na ki fna u u lɛ Caleb tali mbe u u ŋga tra. Ki ble ka chlɔ wre na nduu u bubnɔ na mna sɛ u lɛ pan, ŋga wra tii to, a u lɛ Caleb na u wie mbo, “Yira ŋgi mu chaa hin?” 15 A Acsah na kna mbo, “Ndoo, mu ni ŋga tra tapan haa tablɔ tra ŋga nu nyumu n wa, kena jande ni ŋga bloe nyjɛ nu nyumu nyi.” A Caleb na u ŋga bloe shiin nyjɛ praa yeeri nyjeeri, na tapan haa bloe yire.

16 Leele plɛ na yiri Kenite jlom na, Moses nafun blɔ nanae na lɛ. Pre leele pre, na Judah leele pre na kɔ mu yili Jericho na, kre chɔɔ praa yeeri shuɛ tinyi kakpɔɔ kre. Ŋga pra yiri wa kre, pra sɛ tni Judah tablɔ tra kre tapan haa, mu mbra chia ŋga praa yeeri Arad kre na. 17 Bawa Judah leele pre na sɛ ya pe lɛbiile Simeon jlom leele pre na, a pra sɛ wi na Canaan leele mblɛ praa wa Zephath na pre ni, mna leele na yirɛ nyjɛ yiraa wa wa kro kla putuu, mna ki ŋga mɛɛ Hormah, ki nɔɔ nyina Hebrew yolo nu na, “Klaa.” 18 O Tafun Nyiɛkpɔɔ na ya Judah ŋunɔwifɛɛnlɛ plɛ na, a pra wi mu chiɛ nyjɛ praa yeeri Gaza, na Ashkelon, na Ekron, na trɛ nyjɛ yiraa wa yi mbɛɛlɛ na yire kro shɔ.

19 O Tafun Nyiɛkpɔɔ wre na ya Judah leele na, a pra wi mna nyambie chia kre shɔ. La, pe mblɛ praa wa mu tni tra mbrɛrɛ kre nu kre naa wa na sookɛɛ tɔɔnrɔ wee ni, ki tia Judah leele pre nsra pe ja mu pe ni pe tnihaa wa.

20 Moses na nyu yo Caleb pan fa na Hebron chia kre we pe u wo, ki tia ŋga Judah jlom leele pre na wi na legbakrɛ jlom taarɛ mblɛ praa yeeri Anakim pre ni mna pe ni tra kre nu kre, a pra ki wru mna Caleb ŋga, imi na Moses na ki yo mu tɛɛ kre. 21 Jebusite leele mblɛ praa wa mu tni Jerusalem na kre, Benjamin jlom leele pre nsra pe ni, ki tia pe kro na chaa mu tni tra kre nu mu pan mu su aŋga na.

22-23 Ephraim na Manasseh jlom leele mblɛ pra pe Joseph nanae pre naa chaa mbe sɛ wi kakpɔɔ ŋga praa yeeri Bethel kre leele ni, kre chia kre praa yeeri Luz fa kre. Ŋga pra leele tun mbe pe sɛ chia kre ju mbe le kre, o Tafun Nyiɛkpɔɔ na ya pe na. 24 Leele mblɛ pra wɔ mbe pe sɛ chia kre ju mbe le pre na blɔ wa nya na u yiri chia kre na na paan, a pra u wie mbo, “O nyina mna oo tro mbe le chia lam, oo le na waa mu pe yaka.” 25 A wra pe nyina kolo, a pra tro ki na mu le chia kre na, mna ki leele gbo peii, la, pe nsra blɔ wre wra pe nyina kolo kre na u katoo leele pe yaka. 26 A blɔ wre na kɔ mna yili chia kre na mna sɛ tni Hittite leele tra nu, mna chia ka kun wa mna ki mɛɛ tɛɛ Luz. Pan pe ki yeeri mu pan mu su aŋga na.

27 La, Manasseh jlom leele pre nsra Beth-Shan, na Taanach, na Dor, na Ibleam, na Megiddo na yi mbɛɛlɛ chiɛ yire leele ni. Canaan leele pre naa chaa mbe pre na Manasseh lele pre tni tra kre nu. 28 Ŋga Israel leele pre na kɔ mu nɛɛ mna faŋga ta mu wɛ pre Canaan leele pre na kre, a praa pe yiri jaŋga na a praa tnumu tuni pe pan, la, pe sra pe ni mu yili poŋgo.

29 Pan chɔɔ Ephraim jlom leele pre nsra Canaan leele mblɛ praa wa Gezer na pre ni, pe kro na chaa mu tni. 30 A Zebulun jlom leele pre chɔɔ, pe nsra Canaan leele mblɛ praa wa mu tni chiɛ nyjɛ pe yeeri Kitron, na Nahalol na pre leele pre ni. Pe kro na chaa mu tni, la, praa pe yiri jaŋga na, pra tnumu tuni pe pan.

31 Asher jlom leele pre nsra leele mblɛ praa wa mu tni Acco, na Sidon, na Ahlab, na Achzib, na Helbah, na Aphek, na Rehob na pre ni pe tnihaa wa, 32 ki tia Asher jlom leele pre na pre Canaan leele pre na tni mu chaa tra kre nu.

33 Pan chɔɔ Naphtali jlom leele pre nsra leele mblɛ praa wa mu tni Beth-Shemesh, na Beth-Anath pre ni mu yili pe tnihaa wa, la, Naphtali jlom leele pre na chaa mu tni Canaan leele mblɛ praa wa mu tni tra kre nu pre ni. La pra tia pre Canaan leele pre naa tnumu tuni pe pan jaŋga na.

34 Amora leele mblɛ praa wa Canaan tra nu wa pre n nsra kolo ŋga a Dan jlom leele pre na tni nyua lawee mbrɛrɛ kre nu, a kra tia pra kro nyambie yire ndra na. 35 Amora leele pre plɛ naa wa mu tni nyua ŋga praa yeeri Heres kre, na Aijalon, na Shaalbim chiɛ yire na, la, Ephraim, na Manasseh jlom wolo pre naa jaŋga lii pe na, mna tia praa tnumu tuni pe pan jaŋga na. 36 Kena tra ŋga Amora leele na ta fa kre sam na yire nyuɛ lalaa trohaa ŋga praa yeeri Akrabbim na, mna sɛ to Sela na, mu sɛ ki kro.