O Tafun Nyiɛkpɔɔ Nyjeeri Bituŋu//Paara Na Israel Leele Ni
2
Ki ble ka o Tafun Nyiɛkpɔɔ bituŋu wa na yiri Gilgal na, mna sɛ paara Israel leele pre pan chia ŋga pe yeeri Bokim kre na mbo, “Mi ndaa e wɔ mu yili Egypt tra nu mna pan na e ni tra ŋga nyu ndaa yo na mbe e tolɛɛlɛ ŋga kre na. Ndaa yo e pan na, ‘Nyu nunu ŋga ni pe na e ni kre, mba kɔ ki na fio. 2 Ndaa yo e pan na yire na leele mblɛ pee wa mu tni tra ŋga nu kre waashia nyu nunu pe kee ka na. Ndaa yo na e pe sragbuɛnlɛɛ yire kro juari.’ A e je mu ndikana pe ni kee ŋga ndaa yo e pan kre na. Kena yira ŋgi ki tia e pe ma hin? 3 Kre kee ŋga e pe ŋga ndra na, ni yuu e pan na ‘Mba leele pre ni e yiɛ na. Pan pie kro mbra e tɔɔra, a pia ti mbe e wejinyiŋge ta fio, a pe sɛɛnlɛ nyjɛ pe sumi yire we kaari e pan pɛlɛ.’” 4 Ŋga o Tafun Nyiɛkpɔɔ nyjeeri bituŋu wre na paara Israel leele pre ni a u nyu na to kre, a leele pre naa nyɛni na julo poŋgo. 5 A pra sra wɔ wa mna o Tafun Nyiɛkpɔɔ wre ŋga, mna lawee kre mɛɛ tɛɛ Bokim, ki nyina Hebrew yolo nu na “Nyɛnɛɛ.”6 Ŋga pra nyɛni mu kɔ kre, Joshua na tia pra nyina, mu sɛ tni trɛ nyjɛ wra yɔɔlɛ mu pe ŋga krɔyirɛ yire nu. 7 Joshua ŋmaa nyjila nu kro, Israel leele pre naa o Tafun Nyiɛkpɔɔ wre sumi, hali u kumu kɔkro kre, nyjila ŋga ni loplombo mblɛ praa wa Joshua nyjila, mna kekpɔɛ nyjɛ o Tafun Nyiɛkpɔɔ na pe mu Israel leele pre ŋga yire nya kre, pre ŋmaa nyjila chɔɔ, Israel leele pre naa o Tafun Nyiɛkpɔɔ wre sumi.
8 O Tafun Nyiɛkpɔɔ sumifun Joshua Nun biblɔ wre na li yɛlɛ lafaa na kɛ mna ku. 9 A pra u le u tra ŋga wra ta krɔyira kre chia ŋga praa yeeri Timnath-Heres, a kraa wa Ephraim nyambie lawee yire nu, na shie nyua Gaash nyjeeri haa wa.
10 Ŋga Joshua nyjila leele pre na ku mu kɔ kre, pe nɔɔ leele mblɛ pra yiri pre nsra o Tafun Nyiɛkpɔɔ wre chin, ndee mna kaalɛɛ nyjɛ wra klu mu pe mna Israel leele ŋga yire chin. 11 Ki tia Israel leele pre na sisam pe mu o Tafun Nyiɛkpɔɔ wre taan, mna na sɛɛnlɛ nyjɛ praa yeeri Baal yire sumi. 12 Pra o Tafun Nyiɛkpɔɔ ŋmba na wi pe tolɛɛlɛ Nyiɛkpɔɔ ŋmba wra pe wɔ mu yili Egypt tra nu wre ti, mna kna mu taa leele mblɛ pra pe fɛ mu kun pre sɛɛnlɛ nyini nyini yire kro, mna tia o Tafun Nyiɛkpɔɔ wre krɔ na kun. 13 Ŋgi na hin? Pra o Tafun Nyiɛkpɔɔ wre je, mna kna na sɛɛnlɛ nyjɛ praa yeeri Baal na pe sɛɛ chlɔ Ashtoreth yire sumi. 14 Ŋga kra pan ma kre, o Tafun Nyiɛkpɔɔ wre krɔ na kun na Israel leele pre ni, a wra tia leele plɛ na pan mu pe tɔ, mna pe yirɛ foolo. Wra pe le pe loŋgoolo mblɛ pra pe fɛ mu kun pre kɛɛ, a pra pan mu pe tɔ mna sɛ su na pe nsra ja mbe peyɛ shɔ na. 15 Nyjila ŋga ni Israel leele pre we yiri mbe sɛ wi na pe loŋgoolo ni kpan, o Tafun Nyiɛkpɔɔ wre we ti pe wi mbe to, imi na wra yo pe pan kre. Kra tia fooro kpɔɔ na pe da.
16 Ŋga kra pan ma kre, o Tafun Nyiɛkpɔɔ na kɔ mu yɛkulo wɔ pe nu, a pra yiɛklu mna pe shɔ mu yili pe loŋgoolo pre kɛɛ. 17 A nde pra je pe nsra li pe yɛkulo pre nyu kee na. Pra ayɛte, mnaa shie na sɛɛnlɛ yire sumi tɛ. Pe nsra pe na pe tolɛɛlɛ mblɛ pra li o Tafun Nyiɛkpɔɔ wre nyu kee na pre lɛ. Pe nɔɔ leele mblɛ pra kɔ mu yiri kre na laa pe tolɛɛlɛ pre kolo ŋga pra pe nyina kre na nyaanyaa. 18 Nyjila ŋga nu o Tafun Nyiɛkpɔɔ wre we pe ŋga yɛklo kpan, we ya yɛklo wre na, u ŋmaa nyjila, mbe Israel leele pre shɔ pe loŋgoolo kɛɛ. Na ki pan na leele pre taanri pe kanyana, na pe fiŋgee kɛɛ kre, o Tafun Nyiɛkpɔɔ wre naa pe fooro le. 19 La, na ki pan na pe yɛklo wre ku to, mu nya na pe kna na kefuɛn nyjɛ yi wɛ pe tolɛɛlɛ wee yire na. Mbe pe kna mbe taa sɛɛnlɛ yire kro mbra yi sumi. Pe nsraa chaa mbe laa pe sisam, na pe ndikana kee yire kro.
Nyiɛkpɔɔ Na Tia Israel//Loŋgoolo Na Pe Pe Mu Le
20 Kra tia o Tafun wre krɔ na kun kpɔɔ na Israel leele pre ni, a wra yo mbo, “Ŋga pre leele mblɛ ni nyu nunu ŋga ndaa pe na pe tolɛɛlɛ ni kre kla, mu je na pia taa ni nyu kee na ŋga ndra na, 21 mba pe loŋgoolo mblɛ Joshua na ku mu ti tra kre nu kre ni pe yiɛ na. 22 Pre leele pre ni mbe tɛɛ mbra Israel leele pre pini mbra le na pie taa ni kolo ŋga na pe tolɛɛlɛ pre na tro kre na, ndee pia taa ki na.” 23 Kre ki tia o Tafun Nyiɛkpɔɔ wre na leele pre ti tra kre nu, a u nsra tia Joshua na pe ni poŋgo tra kre nu.