3
O Tafun Nyiɛkpɔɔ na tia waŋgrɛ yire leele plɛ na kro tra kre nu, a wra pe tɛɛ na Israel leele mblɛ pe nsra ŋunɔ wi Canaan tra nu wa kre pini na le. 2 Wra kre kee ŋga pe mna yire ki na mu na Israel nɔɔ leele mblɛ pe nsra ŋunɔ wi mu chin pre nyina imi na pe wii ŋunɔ. 3 Leele mblɛ pra kro tra kre nu na lɛ, ŋulo mblɛ praa wa Philistine kakpɔɛ kunɔ yire na, na Canaan leele pre kro, na Sidon leele, na Hivite leele mblɛ praa wa mu tni Lebanon nyua lawee yire nu, mu yire nyua Baal-Hermon na, mu sɛ su Lebo-Hamath na. 4 O Tafun Nyiɛkpɔɔ wre na pe ti wa mna pe tɛɛ na Israel leele pre pini na le, na pie li u nyu kee nyjɛ wra tro Moses na mna pe tolɛɛlɛ ŋga yire na.5 Israel leele pre na tni mu chaa na Canaan, na Hittite, na Amora, na Perizzite, na Hivite, na Jebusite leele pre ni. 6 A Israel leele pre na pe bichiɛlɛ wru mu leŋge, mna pe bichiɛlɛ wru mna pe bibilɛ ŋga a pra leŋge, mnaa pe sɛɛnlɛ sumi.
Othniel
7 Israel leele pre na sisam pe o Tafun Nyiɛkpɔɔ wre na. Pra pe Tafun Nyiɛkpɔɔ wre fɛɛ, mna sɛ na sɛɛn Baal, na sɛɛn chlɔ Asherah yire sumi. 8 Kra tia o Tafun Nyiɛkpɔɔ wre krɔ na kun na pe ni kpɔɔ, a wra pe wru mu le Mesopotamia ŋunu Cushan-Rishathaim kɛɛ, a wra wi na pe ni mu pe ja, mna jaŋga li pe na yɛlɛ kɔɔnatarɛ. 9 A Israel leele pre na nyɛni mna o Tafun Nyiɛkpɔɔ wre yeeri, a wra ya pe na mna tia Caleb chunu Kenaz wre biblɔ Othniel, na wi mu pe shɔ. 10 O Tafun Nyiɛkpɔɔ wre ŋumu jaŋga na pan mu le u nu, a wra yiri mna Israel leele pre yiɛklu, a o Tafun Nyiɛkpɔɔ na Mesopotamia ŋunu wre le u kɛɛ, a wra u ja. 11 A kra tia wejinyiŋge na pan tra kre nu yɛlɛ fuloe shiin, a Othniel na chin mu ku.
Ehud
12 Kraa wa wa na, a Israel leele na ndru mu sisam pe o Tafun Nyiɛkpɔɔ wre yiɛ. Pe sisam ndra na, o Tafun Nyiɛkpɔɔ wre na Moab ŋunu ŋmba praa yeeri Eglon wre ŋga faŋga a wra Israel leele pre ja. 13 Ŋunu Eglon wre na Ammon leele, na Amalek leele wru mna ya uyɛ na, a pra sɛ wi na Israel leele ni mna Jericho shɔ, kre kakpɔɔ kre praa yeeri shuɛ tinyi kakpɔɔ kre. 14 Israel leele na Moab ŋunu Eglon wre sumi yɛlɛ nununu kɛmbɔkɔɔnatarɛ.
15 Israel leele pre na ndru mna nyɛni mu wo o Tafun Nyiɛkpɔɔ wre na, a wra shɔfun wa wɔ mna pe ŋga, u mɛɛ naa Ehud, kamiuŋu na wi. Blɔ ŋmba praa yeeri Gera, a wra yiri Benjamin jlom na wre biblɔ na wi. Ki ble ka Israel leele pre na yirɛ wɔ mna Ehud tun na yi ni mbe u sɛ Moab ŋunu Eglon wre ŋga. 16 Ehud naa wa na brɔfiɛn yiɛshiin ka ni, a ki titnɔmu naa fiiti nunu na yɔɔ. Ŋga wraa shie kre, wra ki wru mu pɔ u kalie haa, mna dodonyi le mu wo ki na. 17 A wra yirɛ yɛ wru mbe sɛ Moab ŋunu Eglon wre ŋga. Ŋunu wre lɛɛ na kpɔɔ titi. 18 Ŋga Ehud na ŋunu wre ŋga yirɛ yire mu kɔ kre, a wra leele mblɛ pra yirɛ yire tio mu ya u na, a pra sɛ pre wa kolo, a pre naa yiɛklu. 19 La, ŋga Ehud na pe troo mu da sɛɛnlɛ nyjɛ yiraa wa Gilgal lawee wa kre, a wra ndru mna sɛ ŋunu Eglon pan mna sɛ yo u pan mbo, “Tolɛɛ, ni paan mbe kee ka ju mbe yo mu pan.” A ŋunu wre na kna mna yo u sumifɛɛnlɛ mblɛ praa wa u jaara pre pan mbo, “E yili fimi na.” A pra yili mna pe ti wa. 20 A ŋunu wre na sɛ tni wre nunu, u fuflɛ shɔ lawee nyjeeri nyuŋgo wa, a Ehud na flo mna mbra u na mbo, “Nyiɛkpɔɔ yo ni kee ka yo mu pan.” Ŋga ŋunu wre na yo we yiri u jɔɔn na mbe yire sholo to, 21 a Ehud na u kamɛŋɛ kna mna brɔfiɛn yiɛshiin kre tini mu foli u dodonyi nu u kalie jekpɔlɔ haa, mna ŋunu wre su na ki ni lɛɛ nu. 22 Brɔfiɛn kre na ki kaan kre na le mu ya mna sɛ yili u pnuŋgo, a u nyina na ki tɔ peii. Ehud nsra brɔfiɛn kre foli, pan wra ki ti u nu, 23 mna yili fimi na, mna nyjeeri nyuŋgo kre krɔɛ yire yii mu tɔ, mna yi kan u na.
24 Ŋga wra sɛ mu kɔ kre, a ŋunu wre sumifɛɛnlɛ pre na pan mu nya na pe krɔɛ yire kan. A pra kna mbo, “Aada tia na u nyi nyjeeri nyuŋgo wa.” 25 Pra yire wa chiin a sra na kɔ mu wɔ pe na, ŋga pra kɔ mu nya na u n na krɔ kre nyaari kre, a pra safwa cha mna krɔɛ yire nyaala. Bawa pra chin mu nya na pe tafun wre ku mu sni wa.
26 Nyjila ŋga ni leele pre na yire na sri kre, Ehud na yili mna tro sɛɛnlɛ yire mbɛɛ na mna fɛ mu sɛ chia ŋga praa yeeri Seirah kre na. 27 Kre chia kre naa wa Ephraim nyambie yɛ lawee, bawa wra bnɔɛ fɔ mna Israel leele pre yeeri mbe pe fni mbe pe sɛ ŋunɔ. Ŋga pra fni kre a wra yiɛklu pe pan. 28 Mbo, “E taa ni kro. Ŋgi na hin? O Tafun wre o loŋgoolo Moab leele pre le e kɛɛ.” A pra tii mu taa Ehud na, a pra sɛ lawee ŋga nu Moab leele pre naa Jordan lɔɔ kre kuun kre shɔ mu ta. Pe nsra ndro ŋga kolo mbe u kun lɔɔ kre kro. 29 Ki ble kre, pra Moab ŋunɔwifɛɛnlɛ faŋgafɛɛnlɛ pre kagbeŋge kɛ gbo, pe wa nsra shɔ pe kɛɛ. 30 Kre ble kre Moab leele pre na pe fiɛn Israel leele yiɛ, a mu yire kre nyjila kre wejinyiŋge na pan Israel tra kre nu yɛlɛ fuloe jijirɛ.
Shamgar
31 Ehud kumu kɔkro kre, Anath biblɔ ŋmba praa yeeri Shamgar wre wra wi mna Israel leele shɔ na. Wre wra gaŋga tɛɛ mna Philistine leele lafɛɛ kɔɔnanu gbo.